ចិនគ្រហឹមដាក់អាមេរិក ដែលចចេសលក់នាវាចម្បាំងឲ្យតៃវ៉ាន់

អន្តរជាតិ

ចិនគ្រហឹមដាក់អាមេរិក ដែលចចេសលក់នាវាចម្បាំងឲ្យតៃវ៉ាន់

17, Dec 2015 , 7:59 pm

រូបភាព

ដោយ:

ចិនបានកោះហៅមន្ត្រីទូតអាមេរិកប្រចាំទីក្រុងប៉េកាំងមកសាកសួរ និងតវ៉ារឿងក្រុងវ៉ាស៊ីងតោនបានអនុញ្ញាតឲ្យមានការលក់អាវុធទៅតៃវ៉ាន់ដែលមានតម្លៃ១.៨៣ពាន់លានដុល្លារ ក្នុងនោះមាននាវាចម្បាំងពីរគ្រឿង។ ចិនព្រមានខ្លាំងៗថា បើអាមេរិកនៅតែរឹងរូសលក់សព្វាវុធឲ្យតៃវ៉ាន់ ចិននឹងដាក់ទណ្ឌកម្មប្រឆាំងក្រុមហ៊ុនផលិតអាវុធដែលពាក់ព័ន្ធ។

សូមស្តាប់ព័ត៌មានលម្អិត៖

ក្រសួងការបរទេសចិនបានកោះហៅភារធារីនៃស្ថានទូតអាមេរិកប្រចាំទីក្រុងប៉េកាំងមកសួរនាំរឿងលក់អាវុធតម្លៃ១.៨៣ ពាន់លានដុល្លារអាមេរិកទៅឲ្យកោះតៃវ៉ាន់។ ហើយរដ្ឋាភិបាលចិនបានព្រមានថា ចិនមិនរារែកក្នុងការដាក់ទណ្ឌកម្មលើក្រុមហ៊ុនអាមេរិកដែលលក់អាវុធទាំងនោះឲ្យតៃវ៉ាន់នោះឡើយ។

ទីភ្នាក់ងារព័ត៌មានចិន Xinhua បានស្រង់សម្ដីអនុរដ្ឋមន្ត្រីការបរទសចិនលោក Zheng Zeguang ក្នុងជំនួបជាមួយមន្ត្រីទូតអាមេរិកនោះថា កោះតៃវ៉ាន់គឺជាទឹកដីដែលមិនអាចបំបែកពីចិនបាន ហើយចិនប្រឆាំងការលក់អាវុធទៅឲ្យតៃវ៉ាន់ដាច់ខាត។ អាមេរិកកំពុងធ្វើឲ្យរដ្ឋាភិបាលក្រុងប៉េកាំងខឹងខ្លាំងព្រោះ រដ្ឋាភិបាលលួចសង្ឃឹមជាស្រេចថា ការផ្សះផ្សារវាងចិនដីគោកនិងតៃវ៉ាន់ អាចនឹងកើតឡើងនៅពេលខាងមុខផង។ ជំនួបដ៏កម្ររវាង ប្រធានាធិបតីចិន និងប្រធានាធិបតីតៃវ៉ាន់កន្លងមក បង្ហាញពីការផ្លាស់ប្តូរប្រកបដោយភាពវិជ្ជមានរវាងទឹកដីតៃវ៉ាន់ និងចិនដែរ។

លើសពីនេះទៅទៀត លោក Zheng Zeguang បានចាត់ទុកការលក់អាវុធនេះ គឺវាជាទង្វើរផ្ទុយនឹងច្បាប់ និងបទដ្ឋានអន្តរជាតិ ជាពិសេសបានប៉ះពាល់យ៉ាងធ្ងន់ធ្ងរដល់អធិបតេយ្យរបស់ចិន។ លោក Zheng បន្តថា ចិននឹងដាក់ចេញរាល់វិធានការចាំបាច់នានាដើម្បីការពារផលប្រយោជន៍របស់ខ្លួន ដែលរួមទាំងការដាក់ទណ្ឌកម្មប្រឆាំងក្រុមហ៊ុនអាមេរិកដែលពាក់ព័ន្ធនឹងការលក់នេះ។ យ៉ាងណាក៏ដោយ គេមិនទាន់ដឹងថា អ្វីនឹងកើតឡើងបើសិនអាមេរិកនៅបន្តបញ្ជូនអាវុធទៅឲ្យតៃវ៉ាន់ទៀតនោះ។

តាមពិតទៅ បញ្ហាតៃវ៉ាន់ជារឿងរសើបបំផុតមួយសម្រាប់ចិន។ ចិនតែងតែអះអាងថា ខ្លួនមិនរារែកនឹងប្រើកម្លាំងយោធាដើម្បីវាយដណើ្តមយកតៃវ៉ាន់មកដាក់ក្រោមឧបសម្ព័ន្ធរបស់ខ្លួនទេ បើសិនជាទឹកដីនេះហ៊ានប្រកាសឯករាជ្យ។

ត្រលប់មកវិញ ថ្ងៃទី១៦ ខែធ្នូ ម្សិលមិញ រដ្ឋបាលលោក បារ៉ាក់ អូបាម៉ា បានសម្រេចចុងក្រោយ ជុំវិញផែនការលក់សព្វាវុធរួមទាំងនាវាចម្បាំងពីរគ្រឿងផងទៅឲ្យតៃវ៉ាន់។ រដ្ឋបាលអាមេរិកអះអាងថា ការលក់សព្វាវុធឲ្យតៃវ៉ាន់ធ្វើឡើងក្រោមក្របខណ្ឌនៃកិច្ចព្រមព្រៀងស្តីពីទំនាក់ទំនងទ្វេភាគីតៃវ៉ាន់-អាមេរិក ។ ចំណែកឯក្រសួងការបរទេសអាមេរិកបានបញ្ជាក់ថា ក្រុមហ៊ុនធំចំនួនពីរគឺ Raytheon RTN.N និង Lockheed Martin បានទទួលសិទ្ធិក្នុងការលក់អាវុធនេះ។

តាមពិតទៅ ច្បាប់បើកផ្លូវឲ្យអាមេរិកលក់សព្វាវុធរួមទាំងនាវាចម្បាំង អាវុធប្រឆាំងរថក្រោះ និងអាវុធផ្សេងទៀតជាច្រើនមុខទៅឲ្យតៃវ៉ាន់ត្រូវសភាអនុម័តតាំងពីខែធ្នូឆ្នាំមុនម្ល៉េះ ហើយលោក បារ៉ាក់ អូបាម៉ា បានចុះហត្ថលេខារួចរាល់ហើយ។ ប៉ុន្តែរដ្ឋបាលលោក ត្រូវផ្តល់ដំណឹងដល់សភាទាំងពីរជាន់ ជុំវិញការសម្រេចចុងក្រោយនេះដែរ។ ហើយបើតាម ក្រសួងការបរទេសអាមេរិក រដ្ឋាបាលលោក បារ៉ាក់ អូបាម៉ា បានជូនដំណឹងផ្លូវការដល់សភាទាំងពីររួចរាល់អស់ហើយ៕