កីឡាអន្តរជាតិ
អន្តរជាតិ
×![]()
ដោយ: តន ចាន់រិទ្ធារ៉ា
លោក មីឆែល ផ្លាទីនី (Michel Platini) នឹងមិនចូលរួមសវនាការរបស់លោកនៅចំពោះមុខគណៈកម្មាធិការសីលធម៌របស់ FIFA ដែលនឹងធ្វើនៅក្នុងទីក្រុង Zurich ថ្ងៃទី១៨ ខែធ្នូនេះទេ។ នេះបើយោងតាមការបញ្ជាក់របស់មេធាវីរបស់លោកនៅថ្ងៃទី១៦។ លោក មីឆែល ផ្លាទីនី ត្រូវបានព្យួរតំណែងជាប្រធានសហព័ន្ធកីឡាបាល់ទាត់ទ្វីបអឺរ៉ុប (UEFA) ដោយសារតែលោកមានជាប់ពាក់ព័ន្ធរឿងទទួលសំណូកពីលោក Sepp Blatter នាពេលកន្លងមក។ 
យោងតាមលិខិតមួយដែលចេញដោយតំណាងរបស់លោក មីឆែល ផ្លាទីនី បានបញ្ជាក់ជំហថា លោកបានជ្រើសរើសមិនចូលរួមក្នុងសវនាការរបស់លោកនៅចំពោះមុខគណៈកម្មាធិការរបស់ FIFA នោះទេ។ ឯមូលហេតុនោះគឺដោយសារតែសាលក្រមត្រូវបានប្រកាសដល់អ្នកកាសែតជាមុនដោយអ្នកនាំពាក្យម្នាក់ ហើយធ្វើឡើងប្រឆាំងនឹងអ្នកគ្មានកំហុស។
លោក ផ្លាទីនី និង លោក Blatter កំពុងតែស្ថិតក្រោមការហាមឃាត់មិនឲ្យពាក់ព័ន្ធសកម្មភាពកីឡាបាល់ទាត់រយៈពេល៩០ថ្ងៃ។ រឿងព្យួរនេះបានកើតឡើង ក្រោយពេលរដ្ឋអាជ្ញាស្វ៊ីសបានបើកការស៊ើបអង្កេតមួយទៅលើករណីដែលលោក Blatter បានផ្ដល់លុយចំនួន២លានដុល្លារដលលោក ផ្លាទីនី កាលពីឆ្នាំ២០១១ សម្រាប់ការងារដែលបានធ្វើតាំងពីមួយទសវត្សរ៍មុនមកម្លេះ។
ការព្យួរនេះនឹងបញ្ចប់នៅថ្ងៃទី៥ ខែមករា ខាងមុខ តែអ្នកទាំងពីរប្រឈមមុខនឹងការព្យួរអស់មួយជីវិតប្រសិនបើរកឃើញកំហុស។ ខណៈសាលក្រមនឹងប្រកាសនៅសប្ដាហ៍ក្រោយ មេធាវីលោក ផ្លាទីនី បានបង្ហើបថា រដ្ឋអាជ្ញាចង់ពិន័យកូនក្ដីរបស់លោកមិនឲ្យពាក់ព័ន្ធកីឡាមួយជីវិតតែម្ដង។ មេធាវីរូបនេះបន្តថា លោកកូនក្ដីរបស់លោកចាត់ទុកនេះជាអំពើនយោបាយនិងព្យាយាមរារាំងលោក ផ្លាទីនី មិនឲ្យចូលរួមក្នុងការបោះឆ្នោតរើសប្រធាន FIFA។
ចំណែកឯគណៈកម្មាធិការ FIFA ដែលទទួលកាត់ក្ដីរឿងនេះបញ្ជាក់ពីសុច្ចរិតភាពរបស់ខ្លួនតាមរយៈសេចក្ដីប្រកាសមួយ ក្រោយពេលមានព័ត៌មានថា លោកមិនទាន់សម្រេចចិត្តយ៉ាងណានោះទេ។ សេចក្ដីប្រកាសនោះសរសេរថា គណៈកម្មាធិការសីលធម៌របស់ FIFA នឹងដោះស្រាយរឿងក្ដីនេះដោយយុត្តិធម៌និងមិនលំអៀង។ ហើយការប្រកាសនេះបន្តថា ការមិនចូលរួមសវនាការរបស់លោក ផ្លាទីនី មានន័យថា លោកនឹងខកឱកាសដើម្បីបង្ហាញពីមតិរបស់លោក៕
Tag:
Platini
FIFA
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
