ជាតិ
សង្គមជាតិ
ចម្លាក់ស្បែកជាចម្លាក់ដែលពិបាកតែរកចំណូលបានទាប
× សៀមរាប៖ ចម្លាក់ស្បែក គឺជាចម្លាក់មួយប្រភេទដែលកំពុងទទួលបានការពេញនិយមពីសំណាក់ភ្ញៀវទេសចរ។ ជនជាតិចិន និងជប៉ុន ជាអ្នកដែលចូលចិត្តទិញចម្លាក់ស្បែកច្រើនជាងគេ បើធៀបទៅនឹងភ្ញៀវទេសចរដទៃ។ យ៉ាងណាមិញ មួយរយៈចុងក្រោយនេះ ចម្លាក់ស្បែក ដែលគេដឹងថា ជាចម្លាក់ដែលពិបាកមួយក្នុងចំណោមចម្លាក់ផ្សេងទៀត មិនសូវលក់ដាច់ប៉ុន្មាននោះទេ ដោយសារកំណើនអ្នកធ្វើ និងការឲ្យថ្លៃមិនសមាមាត្រគ្នា។
ជាងចម្លាក់ស្បែក លោក ចាន់ តង ដែលកំពុងប្រកបអាជីវកម្មនៅក្នុងបរិវេណប្រាសាទអង្គរវត្តបាននិយាយថា ការលក់ចម្លាក់ស្បែករបស់លោក កំពុងប្រឈម។ ព្រោះថា បរិមាណលក់ មានការថមថយជាងពេលមុនៗ ។ លោក ចាន់ តង បន្ថែមថា មានថ្ងៃខ្លះ ចម្លាក់ស្បែករបស់លោក លក់មិនបានមួយផង ក៏មាន។ ស្ងាត់ភ្ញៀវ និងការឲ្យតម្លៃទាប ជាមូលហេតុពិតប្រាកដ ដែលលោកកំពុងប្រឈមនឹងអាជីវកម្មមួយនេះ។
លោក ចាន់ តង បន្ថែមថា ចម្លាក់ស្បែក អាចលក់បានក្នុងតម្លៃចន្លោះពី ១៥ ទៅ៤៥ ដុល្លារ តាមទំហំ និងក្បាច់របស់វា។ មានចម្លាក់ខ្លះ លោក ចាន់ តង ត្រូវចំណាយពេលពេញមួយថ្ងៃ ទាំងគូរ និងដាប់។ មានពេលខ្លះ លោក តង មិនអាចធ្វើវាបានមួយផ្ទាំងផង។ ក្នុងរូបមួយ លោកត្រូវចាយពេលពី៤ថ្ងៃ ទៅមួយសប្តាហ៍ ឫកន្លះខែក៏មាន។ លោកពន្យល់ថា៖« ជាក់ស្តែងចម្លាក់រូបសេះនេះ គ្រាន់តែគូររូប យើងត្រូវប្រើពេលមួយថ្ងៃបាត់ទៅហើយ នៅដាប់ទៀត»។
ក្រៅពីប្រើពេលយូរដើម្បីគូរ និងដាប់ហើយនោះ ស្បែកដែលយកមកដាប់ ត្រូវតែជាស្បែកដែលស្ងួតល្អ។ សព្វថ្ងៃ ទីផ្សារស្បែកគោ ដែលប្រើសម្រាប់ចម្លាក់នេះ មានតម្លៃចាប់ពី ៦០០០រៀល ដល់៨០០០រៀល ក្នុងមួយគីឡូក្រាម។ គេត្រូវយកស្បែកទៅហាលចាប់ពី២ថ្ងៃឡើង (ដោយថ្ងៃខ្លះ) ទើបអាចយកមកដាប់បាន។
សម្រាប់ខេត្តសៀមរាប ដែលជាខេត្តទេសចរណ៍ ចម្លាក់ស្បែកជាមុខរបរមួយដ៏ប្រសើរ។ យ៉ាងណា តាមការកត់សម្គាល់របស់លោក ចាន់ តង ដែលជាអ្នកសម្តែងសិល្បៈស្បែកធំមួយរូបផងនោះ មើលឃើញថា វាមានសភាពស្ងាត់ច្រើនក្នុងរយៈពេលចុងក្រោយនេះ។ កត្តានេះហើយ ធ្វើឲ្យមុខរបរប្រចាំថ្ងៃរបស់លោក កំពុងជួបហានិភ័យ ដោយសារលក់មិនដាច់។ ថ្ងៃខ្លះ លោកអាចលក់ដាច់បានមួយផ្ទាំង ឫលក់មិនដាច់សោះក៏មាន។ ទន្ទឹមនឹងនេះ លោកត្រូវបង់ថ្លៃជួលតូមជាប្រចាំខែ តម្លៃពី១៥ ទៅ២០ដុល្លារផង។
ក្រៅពីតូបលក់ចម្លាក់ស្បែករបស់លោក ចាន់ តង នៅប្រាសាទអង្គរវត្ត មានតូបច្រើនទៀត ដែលកំពុងដាប់ និងលក់ចម្លាក់ស្បែក។ សព្វថ្ងៃនេះ ជំនាញមានយុវជនច្រើន ដែលចេះឆ្លាក់ស្បែក។ មានសាលារៀន និងអង្គការ បីទៅបួនកន្លែងនៅខេត្តសៀមរាប បានបើកបណ្តុះបណ្តាល ដើម្បីបង្កើតការងារដល់កុមារកំព្រា អ្នកក្រីក្រ ជាពិសេសនោះគឺលើកស្ទួយសិល្បៈខ្មែរ៕
© រក្សាសិទ្ធិដោយ thmeythmey.com