ឯកឧត្តម សម រង្ស៊ី ឆ្លាត ហើយចេះរត់គេចចេញពីប្រព័ន្ធច្បាប់ដែលគេមិនឲ្យតម្លៃ

ជាតិ

បទវិភាគ

នយោបាយជាតិ

ឯកឧត្តម សម រង្ស៊ី ឆ្លាត ហើយចេះរត់គេចចេញពីប្រព័ន្ធច្បាប់ដែលគេមិនឲ្យតម្លៃ

20, Dec 2015 , 10:36 am

រូបភាព

ដោយ: ថ្មីៗ

លិខិតមិត្តអ្នកអាន

អ្នកនយោបាយនៅក្នុងគណបក្សប្រឆាំង គឺតែងតែឆ្លងកាត់ជីវិតនៅក្នុងពន្ធនាគារ ប៉ុន្តែប្រធានគណបក្សសង្គ្រោះជាតិ ឯកឧត្តម សម រង្ស៊ី មិនដែលស្គាល់រសជាតិជីវិត នៅក្នុងពន្ធនាគារឡើយ។ ប្រមុខដឹកនាំបក្សប្រឆាំងរូបនេះ ត្រូវបានអាជ្ញាធរកម្ពុជា ចោទប្រកាន់ជាច្រើនលើក ច្រើនសារ ប៉ុន្តែ ឯកឧត្តម អាចចៀសផុតពីសំណាញ់ច្បាប់ដ៏ក្រាស់នេះបាន។ តើមានមូលហេតុអ្វីបានជា ប្រធានគណបក្សប្រឆាំងជិតពីរទស្សវត្សរ៍រូបនេះ មិនចង់ជាប់ពន្ធនាគារ?

ជាការពិត អ្នកនយោបាយល្បីៗដែលស្ថិតនៅក្នុងគណបក្សប្រឆាំង មិនសូវជាគេចផុតពីគុកច្រវ៉ាក់ឡើយ។ ក្នុងនោះរួមមាន៖ ឯកឧត្តម កឹម សុខា អនុប្រធាន គណបក្សសង្គ្រោះជាតិ តំណាងរាស្ត្រគណបក្សសង្គ្រោះជាតិ ទាំង៧រូប រួមមាន៖ លោកជំទាវ មូរ សុខហួរ លោក រៀល ខេមរិន្ទ្រ លោក នុត រំដួល លោក ឡុង រី លោក កែវ ភារម្យ លោក ហូរ វ៉ាន់ លោក ម៉ែន សុថាវរិន្ទ្រ ជាដើម គឺសុទ្ធសឹងបានភ្លក់រសជាតិ ពន្ធនាគារនៅកម្ពុជា ដោយសារ សំណុំរឿងធ្វើបាតុកម្មរំដោះទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។ ដោយឡែក ឯកឧត្តម សម រង្ស៊ី ដែលមានរឿងក្តីក្តាំជាច្រើន ជាមួយរដ្ឋាភិបាលកម្ពុជា ដូចជា៖ កាលពីថ្ងៃទី២៥ តុលា ឆ្នាំ២០០៩ តុលាការខេត្តស្វាយរៀង ចោទប្រកាន់ ឯកឧត្តម សម រង្ស៊ី ជុំវិញការដកតម្រុយបង្គោលព្រំដែនកម្ពុជា វៀតណាម នៅខេត្តស្វាយរៀង ដែលក្នុងនោះតុលាការខេត្តស្វាយរៀង សម្រេចកាត់ទោស ឯកឧត្តម សម រង្ស៊ី ដាក់ពន្ធនាគារចំនួន២ឆ្នាំ ពីបទបំផ្លាញបង្គោលព្រំដែននៅខេត្តស្វាយរៀង និងថ្មីៗនេះ ប្រធានគណបក្សប្រឆាំងរូបនេះ ត្រូវបានតុលាការដំបូងរាជធានីភ្នំពេញ ចេញដីការចោទប្រកាន់ពីបទបរិហាកេរ្តិ៍ រដ្ឋមន្ត្រីក្រសួងការបរទេសកម្ពុជា លោក ហោ ណាំហុង កាលពីឆ្នាំ២០០៨ ហើយតុលាការផ្តន្ទាទោស ឯកឧត្តម សម រង្ស៊ី ដាក់ពន្ធនាគារចំនួន២ឆ្នាំ និងករណីជាច្រើនទៀត ប៉ុន្តែគ្រប់ករណី ឯកឧត្តម សម រង្ស៊ី មិនដែលជាប់ពន្ធនគារកម្ពុជាឡើយ។

អ្នកនយោបាយជើងចាស់រូបនេះ បានប្រឡូកក្នុងឆាកនយោបាយចាប់តាំងពីឆ្នាំ១៩៩៣មក។ កាលនោះ ឯកឧត្តម សម រង្ស៊ី បានចូលរួមនៅក្នុងគណបក្សហ្វ៊ុនស៊ិនប៉ិច។ ក្រោយការបោះឆ្នោត១៩៩៣ លោកបានក្លាយជារដ្ឋមន្ត្រីក្រសួងសេដ្ឋកិច្ច។ បន្ទាប់មក ដោយសារការបែកបាក់ផ្ទៃក្នុង គណបក្សហ្វ៊ុនស៊ិនប៉ិច ឯកឧត្តម សម រង្ស៊ី បានបង្កើតគណបក្សថ្មីមួយដែលមានឈ្មោះថា គណបក្សជាតិខ្មែរ។ បន្ទាប់មកទៀត ឯកឧត្តមបានបង្កើតគណបក្សដែលដាក់ឈ្មោះខ្លួនឯង គឺ គណបក្ស សម រង្ស៊ី និងចុងក្រោយនេះ ឯកឧត្តម សម រង្ស៊ី គឺជាប្រធានគណបក្សសង្គ្រោះជាតិ។ គិតឆ្នាំ២០១៦ ដែលនៅសល់ប៉ុន្មានថ្ងៃទៀតនេះ ឯកឧត្តម សម រង្ស៊ី មានអាយុ៦៧ឆ្នាំហើយ។

ការគេចវេះពីពន្ធនាគារកម្ពុជារបស់ ឯកឧត្តម សម រង្ស៊ី ត្រួវបានអ្នកវិភាគ សង្គមស៊ីវិល និងមន្ត្រីរដ្ឋាភិបាលមួយចំនួន បានរិះគន់ថា ឯកឧត្តម សម រង្ស៊ី ជាអ្នកនយោបាយកំសាក ឬអ្នកនយោបាយមិនហ៊ានប្រឈមមុខចំពោះច្បាប់កម្ពុជា។ ប៉ុន្តែ សម្រាប់ក្រសែភ្នែកសមាជិក សមាជិកា របស់គណបក្សប្រឆាំងវិញ។ ការគេចវេះរបស់ឯកឧត្តម សម រង្ស៊ី គឺដើម្បីធ្វើនយោបាយការបរទេស ពីព្រោះ ការរត់ទៅក្រៅប្រទេសជារឿងល្អជាងជាប់ពន្ធនាគារ ដែលមិនបានធ្វើអ្វីសោះ។ ជាក់ស្តែងថ្មីៗនេះ ដោយសារករណីការចេញដីការចាប់ខ្លួន ឯកឧត្តម សម រង្ស៊ី និងការវាយដំតំណាងរាស្ត្រគណបក្សសង្គ្រោះជាតិពីររូប គឺលោក គង់ សភា និង លោក ញ៉យ ចំរើន សភាអឺរ៉ុបបានគំរាមផ្តាច់ជំនួយកម្ពុជា ប្រសិនបើមិនដោះស្រាយបញ្ហានេះ។

សូមបញ្ជាក់ថា គិតត្រឹមចុងឆ្នាំ២០១៥នេះ ជីវិតនយោបាយ របស់ ឯកឧត្តម សម រង្ស៊ី គឺមានរយៈពេលជាង២២ឆ្នាំមកហើយ។ ដ្បិតឯកឧត្តម ត្រូវបានតុលាការកម្ពុជា ចោទប្រកាន់ជាច្រើនករណី និងជាច្រើនដងក៏ដោយ តែឯកឧត្តម សម រង្ស៊ី បានបង្កើតប្រវត្តិសាស្ត្រមួយ គឺមិនដែលជាប់ពន្ធនាគារទាល់តែសោះ។ ប្រការដែលឯកឧត្តមមិនដែលជាប់ពន្ធនាគារនេះ បានអនុញ្ញាតឲ្យឯកឧត្តមធ្វើកិច្ចការនៅក្រៅប្រទេសបានច្រើន ហើយពេលខ្លះ វាធ្វើឲ្យឯកឧត្តមរឹតតែមានប្រជាប្រិយភាពបន្ថែមទៀត៕

លិខិតមិត្តអ្នកអាន

រីភា កក្កដា (ពលរដ្ឋភ្នំពេញ)