តួកគីនឹងដកទ័ពចេញពីអ៊ីរ៉ាក់តាមសំណើអាមេរិក

អន្តរជាតិ

នយោបាយអន្តរជាតិ

តួកគីនឹងដកទ័ពចេញពីអ៊ីរ៉ាក់តាមសំណើអាមេរិក

20, Dec 2015 , 3:35 pm

រូបភាព

ដោយ:

យប់ថ្ងៃសៅរ៍ម្សិលមិញ អាជ្ញាធរតួកគីបានប្រកាសថា នឹងបន្តដកកងទ័ពខ្លួនចេញពីទឹកដីអ៊ីរ៉ាក់។ ការប្រកាសនេះធ្វើឡើងក្រោយលោកអូបាម៉ាបានទូរសព្ទទៅប្រធានាធិបតីអ៊ែរដូហ្កាន សុំអោយចាត់វិធានការកាត់បន្ថយភាពតានតឹងជាមួយអ៊ីរ៉ាក់ជាប្រទេសជិតខាង។

ការប្រកាសនេះ ធ្វើឡើងម៉ឺងម៉ាត់និងភ្លាមៗតែម្តង ព្រោះម្សិលមិញនេះ លោកអូបាម៉ាបានទូរសព្ទទៅលោកអ៊ែរដូហ្កាន គូសបញ្ជាក់ពីការគោរពបូរណភាពទឹកដីអ៊ីរ៉ាក់។ គួររំលឹកថា កាលពីដើមខែធ្នូ តួកគីបានពង្រាយទាហានពី១៥០នាក់ទៅ៣០០នាក់ និងរថពាសដែកជាង២០គ្រឿង នៅបន្ទាយBachiqaភាគខាងជើងអ៊ីរ៉ាក់។ តួកគីប្រាប់ថា ធ្វើនេះក្នុងទិសដៅការពារក្រុមប្រឹក្សាយោធាខ្លួនដែលបណ្តុះបណ្តាលសកម្មជនប្រយុទ្ធអ៊ីរ៉ាក់ ក្នុងការកំចាត់ក្រុមដែស្ហ។

ប៉ុន្តែ រដ្ឋាភិបាលអ៊ីរ៉ាក់ចាត់ទុកទង្វើតួកគីថា ជាការឈ្លានពានខុសច្បាប់។ អ៊ីរ៉ាក់បានផ្ញើលិខិតតវ៉ាមួយច្បាប់ទៅក្រុមប្រឹក្សាសន្តិសុខអង្គការសហប្រជាជាតិ។ បន្ទាប់ពីនោះមក សកម្មជននិកាយស៊ីអ៊ីតបានបាតុកម្មអោយតួកគីបញ្ចប់សកម្មភាពយោធាខ្លួន ដោយគំរាមប្រើអាវុធប្រឆាំងកងទ័ពតួកគី។ ដំបូងឡើយ ប្រធានាធិបតីអ៊ែរដូហ្កានប្រកាសមិនដកទ័ពទេ។ តែក្រោយមកទៀត ក៏សម្រេចដករថក្រោះមួយចំនួនពីអ៊ីរ៉ាក់ទៅ។

អ្វីដែលគួរចាប់អារម្មណ៍ គឺថា ពេលនេះ តួកគីហាក់ស្តាប់យោបល់អាមេរិកខ្លាំងតែម្តង ប្រហែលដោយសារតែពេលនេះ តួកគីកំពុងមានជម្លោះការទូតធ្ងន់ធ្ងរជាមួយរុស្ស៊ី។ ដូច្នេះ ចង់មិនចង់ តួកគីត្រូវតែរក្សាចំណងមិត្តជាមួយប្រទេសមហាអំណាចអាមេរិក ដើម្បីអាចការពារខ្លួនពីរុស្ស៊ី៕