រឿងទាំង ៧ ដែលអ្នកគួរធ្វើ ពេលដល់អាយុ ៣០ ឆ្នាំ

ពីនេះ ពីនោះ

រឿងទាំង ៧ ដែលអ្នកគួរធ្វើ ពេលដល់អាយុ ៣០ ឆ្នាំ

23, Dec 2015 , 11:56 am

រូបភាព

ដោយ: ថ្មីៗ

កាន់តែចាស់ អ្នកនឹងកាន់តែលំបាក ក្នុងការផ្លាស់ប្តូរទម្លាប់ រស់នៅប្រចាំថ្ងៃរបស់អ្នក។ ប៉ុន្តែ ពេលឈានជើងចូលអាយុ ៣០ ឆ្នាំ អ្នកនៅតែមានឱកាសច្រើន ក្នុងការទទួលបាននូវសុខភាពល្អ តាមរយៈការផ្លាស់ប្តូរ និងទទួលយកនូវរបៀបរស់នៅល្អៗមួយចំនួន ដែលគេបានណែនាំ។

ចូរអាននូវគំនិតល្អៗ ទាំង ៧ ខាងក្រោមនេះ ហើយព្យាយាមហាត់ពត់ និងចាប់ផ្តើមធ្វើវា ចាប់ពីពេលនេះតទៅ ៖

១. ញញឹម និងសើចដាក់ខ្លួនឯង

ចូរសើចដាក់ខ្លួនឯង! ចូរញញឹមរីករាយ នឹងឆាកជីវិតរបស់ខ្លួនឯង! សើចដាក់ចំណុចល្អ និងចំណុចអាក្រក់របស់ខ្លួនឯង! ហើយខំកែប្រែឲ្យបានកាន់តែប្រសើរ។

២. ពេញចិត្តចំពោះក្រុមគ្រួសារ និងមិត្តភក្តិ

ពេលអ្នកស្ថិតក្នុងចន្លោះអាយុ ២០ ឆ្នាំទៅ អ្នកប្រហែលជាកំពុងរវល់ ជាមួយនឹងការរៀនសូត្រ ឬកិច្ចការងារហើយ ដូច្នេះ គ្រួសារ និងមិត្តភក្តិ ប្រហែលជានៅឆ្ងាយពីអ្នកបន្តិច។ ប៉ុន្តែ ពេលឈានជើងចូលអាយុ ៣០ ឆ្នាំ វាដល់ពេលដែលអ្នក គួរបង្កើនភាពស្និទ្ធស្នាលជាមួយគ្រួសារ មិត្តភក្តិ ឬបង្កើតជាគ្រួសារផ្ទាល់ខ្លួនមួយហើយ (រៀបការ)។

៣. សរសេរកំណត់ហេតុជីវិត

"កំណត់ហេតុជីវិត ជាការរៀបរាប់អំពី ដំណើរការ ឬរឿងរ៉ាវនានា ដែលបានកើតឡើងពេញមួយថ្ងៃ ដាក់នៅក្នុងសៀវភៅ ឬកុំព្យូទ័រជារៀងរាល់ថ្ងៃ ដើម្បីកំសាន្តអារម្មណ៍ បន្ថយស្ត្រេស និងទុកជាអនុស្សាវរីយ៍ នៅពេលអ្នកចាស់ទៅ។

៤. ចាប់ផ្តើមគ្រប់គ្រងទម្ងន់

ពិតណាស់ អាយុប៉ុននេះ អ្នកត្រូវតែមានការប្រុងប្រយ័ត្ន ថែរក្សាទម្ងន់រាងកាយ ឲ្យមានសុខភាពល្អ ពីព្រោះបើអ្នកធ្វេសប្រហែស អ្នកច្បាស់ជាធាត់ ឬស្គមពេកហើយ។ ម្យ៉ាងវិញទៀត វាពិបាកនឹងបន្ថយ ឬបន្ថែមគីឡូណាស់ នៅពេលអ្នកចាស់បន្តិចទៀត។

៥. ចាប់ផ្តើមសន្សំលុយ

ដាច់ខាត អ្នកត្រូវតែ “ចំណាយ ឲ្យតិចជាង ចំណូល” ទើបអ្នកអាចសន្សំលុយបានខ្លះ សម្រាប់ថ្ងៃអនាគត។ កុំជុះតាមដំរី កុំសម្ភារៈនិយម កុំសប្បាយ ឬដើរលេងខ្លាំងពេក ប៉ុន្តែ ត្រូវរក្សាលុយទុកខ្លះ សម្រាប់មើលថែជំងឺខ្លួនឯង ឬមានការបន្ទាន់ណាមួយ។

៦. បង្កើតគោលដៅធំមួយ

ត្រូវមានគម្រោង និងធ្វើវាឲ្យបាន នៅអាយុប៉ុននេះ ដូចជា រៀបការសាងគ្រួសារថ្មីមួយ ទិញឡាន ទិញផ្ទះ ...។

៧. រៀនពីកំហុសខ្លួនឯង

អ្នកប្រហែលជាធ្លាប់ សាងនូវកំហុសជាច្រើន ចាប់តាំងពីតូចមក ជាពិសេស នៅអាយុខ្ទង់ ២០ ដូច្នេះ វាល្មមដល់ពេលដែលអ្នក ត្រូវសិក្សាស្វែងយល់ និងកែប្រែកំហុសទាំងអស់នោះ ហើយព្យាយាមធ្វើខ្លួនឲ្យបានល្អហើយ៕

ត្រួតពិនិត្យដោយ www.health.com.kh