ពីនេះ ពីនោះ
ជាមេដឹកនាំត្រូវធ្វើឲ្យគេស្រឡាញ់ផង និងញញើតផង!
× ភ្នំពេញ៖ លោក ម៉ាគីយ៉ាវ៉ែល(Machiavelli) គឺជាទស្សនវិទូនយោបាយ ប្រវត្តិវិទូ និងជាអ្នកទ្រឹស្ដីសង្គ្រាមដ៏ល្បីល្បាញរបស់ប្រទេស អ៊ីតាលី មួយរូបនៅកំឡុងឆ្នាំ១៤៦៩ដល់១៥២៧។ ទស្សនវិទូរូបនេះបានលើកឡើងពីលក្ខណៈរបស់អ្នកដឹកនាំ គឺត្រូវ ធ្វើយ៉ាងណាឲ្យគេស្រឡាញ់ ចូលចិត្ត គោរព ហើយក៏ត្រូវធ្វើឲ្យមនុស្សនៅក្រោមបង្គាប់ ទាំងអស់ញញើត កោតខ្លាចផងដែរ។
នៅក្នុងនយោបាយ នៅក្នុងជីវិតជាអ្នកគ្រប់គ្រង ដឹកនាំ សេចក្ដីស្រឡាញ់របស់ប្រជារាស្ត្រ មនុស្សនៅក្រោមបង្គាប់ចំពោះអ្នកដឹកនាំ គឺជាអាវុធដ៏សំខាន់ ទ័ពដ៏ខ្លាំងក្លា បន្ទាយដ៏រឹងមាំបំផុតដើម្បីរក្សាអំណាច និងដំណែងរបស់មេដឹកនាំ។ ព្រោះភាពរឹងមាំរបស់អ្នកគ្រប់គ្រង និងមេដឹកនាំ មិនមែនអាចរក្សាបានយូរ ឬរឹងមាំបានយូដោយពឹងផ្អែកតែទៅលើខ្លួនឯងនោះទេ ហើយគ្មានការចូលរួមពីប្រជាពលរដ្ឋ និងមនុស្សក្រោមបង្គាប់ឡើយ។
ក្នុងនាមជាមេដឹកនាំត្រូវតែប្រកាន់ភ្ជាប់ភាពប្រាកដនិយម ចំពោះអ្វីដែលខ្លួនកំពុងធ្វើដើម្បីបង្ហាញពីភាពរឹងមាំនិងជំនឿជាក់។ មេដឹកនាំត្រូវចេះលើកកម្ពស់ខ្លួនឯង គឺលើកកម្ពស់ខ្លួនឯងតាមរយៈការធ្វើសកម្មភាព និងបញ្ចេញស្នាដៃឲ្យបានច្រើន ចេះប៉ាន់ប្រមាណ។ មេដឹកនាំត្រូវចេះរក្សាមិត្តភាពជាមួយប្រជាពលរដ្ឋត្រូវចេះប្រើមធ្យោបាយសរុប ត្រូវមានភាពប៉ិនប្រសប់។
ចំណែកនៅក្នុងកាលៈទេសៈមួយចំនួនមេដឹកនាំក៏ត្រូវចេះប្រើល្បិចដើម្បីសម្រេចគោលដៅ។ មេដឹកនាំត្រូវបង្ហាញអានុភាពរបស់ខ្លួន ដែលក្នុងកាលៈទេសៈខ្លះមេដឹកនាំត្រូវមើលខ្លួនឯងឲ្យឃើញខ្ពស់ជាងគេ ឬឋិតនៅពីលើគេ។ មិនតែប៉ុណ្ណោះមេដឹកនាំត្រូវចេះធ្វើឲ្យគេខ្លាច និងគោរពជាជាងឲ្យគេស្រឡាញ់ផងដែរ ព្រោះនៅក្នុងរូបភាពនៃការបង្គាប់បញ្ជា ប្រសិនបើអំណាចមេដឹកនាំមិនអាចគ្របដណ្ដប់ទៅលើស្មារតីរបស់មនុស្សក្រោមបង្គាប់បានទេ នោះប្រសិទ្ធភាព និងឥទ្ធិពលសម្ដីរបស់មេដឹកនាំក៏មិនអាចទទួលបានលទ្ធិផលល្អបានដែរ។
ហេតុនេះក្នុងនាមជាមេដឹកនាំរដ្ឋចាំបាច់ណាស់ត្រូវ ចេះធ្វើឲ្យប្រជារាស្ត្រស្រឡាញ់។ ទន្ទឹមនឹងនោះ អ្នកដឹកនាំរដ្ឋក៏ត្រូវ តែជាបុគ្គលមួយរូបដ៏ខ្លាំងពូកែអាចធានាបានឯកភាពអំណាច និងឯកភាពរដ្ឋ។ ព្រោះនៅក្នុងសង្គម នៅសភាពជាមនុស្ស គឺមានមនុស្សស្លូត មនុស្សកាច មនុស្សល្អ មនុស្សអាក្រក់ ហេតុនេះភាពបត់បែនរបស់មេដឹកនាំគឺជាទិសដៅដែលម៉ាគីយ៉ាវ៉ែលចង់បាន៕
© រក្សាសិទ្ធិដោយ thmeythmey.com