ជាតិ
ឯកឧត្តម កឹម សុខា បង្ហោះផ្សាយសៀវភៅនិយាយពីការចាប់ខ្លួនលោកកាលពី១០ឆ្នាំមុន រូបភាពពី ទំព័រហ្វេសប៊ុក ឯកឧត្តម កឹម សុខា
× ភ្នំពេញ៖ ឯកឧត្តម កឹម សុខា អនុប្រធានគណបក្សសង្គ្រោះជាតិ បានបង្ហោះផ្សាយសៀវភៅនិយាយពីការចាប់ខ្លួនលោកកាលពី១០ឆ្នាំមុន។ ការរៀបចំបង្ហោះផ្សាយសៀវភៅនេះ គឺ ដើម្បីជាការរម្លឹកខួប១០ឆ្នាំ(៣១ធ្នូ២០០៥-៣១ធ្នូ២០១៥) នៃការចាប់ខ្លួនឯកឧត្តម កឹម សុខា។ សៀវភៅនេះមានចំណងជើងថា៖«កឹម សុខា និងប្រជាបូជនីយកិច្ចដើម្បីសេរីភាព»។
សៀវភៅ «កឹម សុខា និងប្រជាបូជនីយកិច្ចដើម្បីសេរីភាព» ត្រូវបានរៀបចំចងក្រងឡើងដោយសហការីជិតស្និទ្ធរបស់ឯកឧត្តម កឹម សុខា ដើម្បីកត់ត្រាសកម្មភាពការងារបូជនីយកិច្ចរបស់ឯកឧត្តម កឹម សុខា ក្នុងដំណើរការស្វែងរកលទ្ធិប្រជាធិបតេយ្យសេរី ជូនប្រជាពលរដ្ឋខ្មែរ ជូនជាតិមាតុភូមិកម្ពុជា។ សៀវភៅនេះបានរៀបចំបោះពុម្ពផ្សាយនៅខែមីនា ឆ្នាំ២០០៦កន្លងមក។ការរៀបផ្សព្វផ្សាយសៀវភៅនេះនៅលើគណនីហ្វេសប៊ុក នៅពេលនេះ គឺជាការរម្លឹកខួប១០ឆ្នាំ(៣១ធ្នូ២០០៥-៣១ធ្នូ២០១៥) នៃការចាប់ខ្លួនឯកឧត្តម កឹម សុខា។
គណនីហ្វេសប៊ុកឯកឧត្តម កឹម សុខា បានបញ្ជាក់ថា ឯកឧត្តម គឺជាអ្នកពុះពារតស៊ូដើម្បី សេរីភាព យុត្ដិធម៌ និងការរីកចម្រើនរបស់សង្គមដោយសន្ដិវិធី ដោយគ្មានការតក់ស្លុត។
សូមរម្លឹកថា ថ្ងៃទី៣១ ខែធ្នូ ឆ្នាំ២០០៥ វេលាម៉ោង១៣ និង៣០នាទី ឯកឧត្តម កឹម សុខា ត្រូវបានអាជ្ញាធររាជរដ្ឋាភិបាលចាប់យកទៅឃុំខ្លួននៅពន្ធនាគារព្រៃស ដោយចោទពីបទបរិហារកេរ្ដិ៍ និងជេរប្រមាថប្រមុខរាជរដ្ឋាភិបាល។ ឯកឧត្តម កឹម សុខា ត្រូវបានដោះលែងពីពន្ធនាគារព្រៃស នៅថ្ងៃទី១៧ ខែមករា ឆ្នាំ២០០៦ ។
© រក្សាសិទ្ធិដោយ thmeythmey.com