ពីនេះ ពីនោះ
ហេតុផលជំរុញនាំទៅដល់សេចក្ដីប្រកាសឆ្ពោះទៅរកសីលធម៌សកល
× ភ្នំពេញ៖ ពិភពលោកកំពុងរងការឈឺចាប់យ៉ាងធ្ងន់ធ្ងរ។ ការឈឺចាប់នោះ កំពុងរាលដាលយ៉ាងខ្លាំងនិងឆាប់រហ័ស ដែលបង្ខំឲ្យយើងធ្លាក់ទៅក្នុងសភាពឈឺចាប់យ៉ាងធ្ងន់ដោយចៀសមិនរួច។ សន្តិភាពជួយឲ្យយើងគេចផុតពីសង្គ្រាម បញ្ជៀសចក្រវាលពីការបំផ្លាញ ធ្វើឲ្យអ្នកជិតខាងឲ្យគេចផុតពីការរស់នៅដោយការភ័យខ្លាច និង ធ្វើឲ្យមនុស្សគេចផុតពីការសម្លាប់អំពើហិង្សា ភេរវកម្ម និង គេចផុតពីការស្លាប់ដោយឥទ្ធិពលសង្គ្រាម។ ឥទ្ធិពលសង្គ្រាម គឺជាអ្វីមួយដែលគួរស្អប់ខ្ពើមជាទីបំផុត។ យើងផ្ដន្ទាទោសចំពោះការរំលោភលើប្រព័ន្ធអេកូនៃភពផែនដី។ យើងថ្កោលទោសចំពោះភាពក្រីក្រដែលបញ្ឈប់សក្ដានុពលនៃជីវិត ភាពអត់ឃ្លានដែលធ្វើឲ្យរាងកាយចុះខ្សោយ គម្លាតសេដ្ឋកិច្ចដែលគំរាមកំហែងគ្រួសារជាច្រើនដោយស្ថានភាពនៃការខូចខាតឬបាត់បង់ទ្រព្យ។ យើងបន្ទោសភាពច្របូកច្របល់ខាងសង្គមនៃប្រជាតិនានា ដូចជា ការមិនយកចិត្តទុកដាក់ចំពោះយុត្តិធម៌ ដែលជំរុញឲ្យប្រជាពលរដ្ឋខិតទៅរកព្រំដែននៃសេរីភាពកាន់តែតូច ភាពអនាធិបតេយ្យ ដែលញាំញីសហគមន៍របស់យើង និង មរណភាពមិនសមហេតុផលរបស់កុមារ ដែលផ្ដើមចេញពីអំពើហិង្សា។ ជាពិសេស យើងផ្ដន្ទាទោសការឈ្លាពាននិងការស្អប់ខ្ពើមក្នុងនាមសាសនា។
សីលធម៌ផ្ដល់លទ្ធភាពឲ្យមានសណ្ដាប់ធ្នាប់ដោយឡែក និង សណ្ដាប់ធ្នាប់សាកលល្អប្រសើរ និង ដឹកនាំបុគ្គលម្នាក់ៗឲ្យគេចចេញពីអារម្មណ៍មិនសប្បាយរីករាយនិងអស់សង្ឃឹម និង ដឹកសង្គមនានាឲ្យគេចផុតពីភាពវឹកវរ។ យើងទាំងអស់គ្នាជាបុរសនិងស្ត្រីដែលបានប្រកាន់យកសិក្ខាបទ(ច្បាប់ឬវិន័យ)និងអនុវត្តសាសនាពិភពលោក បានអះអាងថា៖ ក-យើងអះអាងថា ផ្នែកទូទៅនៃតម្លៃសំខាន់បំផុត គេរកឃើញក្នុងការង្រៀនសាសានាដែលបង្កើតបានជាមូលដ្ឋាននៃសីលធម៌សាកល។
ក-យើងអះអាងថា សច្ចភាពនេះ មនុស្សបានស្គាល់រួចមកហើយ ប៉ុន្តែ វាមិនទាន់ត្រូវបានគេធ្វើឲ្យមានជីវិតនៅក្នុងចិត្តនិងការប្រព្រឹត្តិនៅឡើយ។
ខ-យើងអះអាងថា មាននិយាមមួយដែលមិនអាចបដិសេធបាននិងគ្មានលក្ខខណ្ឌ ចំពោះគ្រប់ផ្នែកទាំងអស់នៃជីវិតគ្រួសារ សហគមន៍ ពូជអម្បូរ ប្រជាជាតិ និង សាសនា។ យើងបន្តទៀតថា មានរួចមកហើយនូវគោលការណ៍ណែនាំបុរាណចំពោះឥរិយាបថរបស់មនុស្ស ដែលគេបានរកឃើញនៅក្នុងការបង្រៀនសាសនាពិភពលោក ហើយវាជាលក្ខខណ្ឌសម្រាប់ធ្វើឲ្យមាននិរន្តរភាពនៃសណ្ដាប់ធ្នាប់សាកលលោក។
- យើងប្រកាសថា៖
ក-យើងពឹងពាក់គ្នាទៅវិញទៅមក។ ម្នាក់ៗក្នុងចំណោមពួកយើងពឹកពាក់លើសុខុមាលភាពនៃមនុស្សទាំងមូល ដូច្នេះហើយ យើងត្រូវតែគោរពសហគមន៍ ដូចជា គោរពភាវ:មានជីវិត រួមមាន មនុស្ស សត្វ និង រុក្ខជាតិ និង គោរពការអភិរក្សភពផែនដី ដែលសំដៅទៅលើខ្យល់ ទឹក និង ដី។
ខ-យើងទទួលខុសត្រូវរៀងៗខ្លួនចំពោះរាល់អ្វីដែលយើងធ្វើ។ យើងត្រូវទទួលខុសត្រូវចំពោះវិបាកនៃការសម្រេចចិត្ត អំពើ និង បរាជ័យរបស់យើង។
គ-យើងត្រូវតែប្រព្រឹត្តចំពោះអ្នកដទៃ ដូចដែលយើងប្រាថ្នាឲ្យអ្នកដទៃប្រព្រឹត្តចំពោះយើង។
ឃ-យើងប្ដេជ្ញាចិត្តគោរពជីវិតនិងសេចក្ដីថ្លៃថ្នូរ, បុគ្កលភាពនិងភាពដោយឡែក ដូច្នេះ មនុស្សម្នាក់ៗ ត្រូវតែបានគេប្រព្រឹត្តក្នុងនាមជាមនុស្សដោយគ្មានការលើកលែង។ យើងត្រូវតែមានសេចក្ដីអត់ធ្មត់និងការទទួលស្គាល់។ យើងត្រូវតែផ្ដល់ការអភ័យទោសចំពោះរឿងរ៉ាវក្នុងអតីតកាល ប៉ុន្តែ យើងមិនត្រូវអនុញ្ញាតឲ្យគេដាក់ទាសភាពមកលើខ្លួនរបស់យើង តាមរយ:អនុសាវរីយ៍នៃការស្អប់ខ្ពើមនោះទេ។ ការបើកចិត្តរបស់យើងឲ្យទូលាយចំពោះអ្នកដទៃ គឺយើងត្រូវតែពន្លិចឬកប់ចោលនូវភាពខុសគ្នាដ៏តូចចង្អៀតរបស់យើងចំពោះបុព្វហេតុនៃសហគមន៍ពិភពលោក ដោយអនុវត្តនូវវប្បធម៌សាមគ្គីភាព និងទំនាក់ទំនងគ្នា។
ង-យើងគិតពីមនុស្សជាតិដែលជាគ្រួសាររបស់យើង។ យើងត្រូវខិតខំយ៉ាងខ្លាំងដើម្បីធ្វើជាមនុស្សល្អនិងសប្បុរសជន។ យើងមិនត្រូវរស់នៅសម្រាប់តែខ្លួនឯងនោះទេ ប៉ុន្តែ យើងក៏ត្រូវបម្រើអ្នកដទៃ (រស់នៅសម្រាប់អ្នកដទៃ)ផងដែរ ដូចជា ការជួយដល់កុមារ ចាស់ជរា អ្នកក្រីក្រ អ្នករងគ្រោះ ជនពិកា ជនភៀសខ្លួន និង ជនឯកោ។ គ្មានមនុស្សណាម្នាក់គួរត្រូវបានគេគិតឬប្រព្រឹត្តមកលើក្នុងនាមជាពលរដ្ឋបន្ទាប់បន្សំ(គ្មានតម្លៃ)ឬកេងប្រវញ្ច ទោះតាមវិធីណាក៏ដោយ។ ត្រូវតែមានភាពជាដៃគូស្មើភាពគ្នារវាងបុរសនិងស្ត្រី។ យើងមិនត្រូវប្រព្រឹត្តការរួមភេទណាមួយដោយអសីលធម៌នោះទេ។ យើងដាក់ទៅក្រោយខ្នងរបស់យើងនូវរាល់ទម្រង់នៃការគ្របសង្កត់ ការជិះជាន់ ឬ ការបំភាន់។
ច-យើងប្រព្រឹត្តមកលើខ្លួនយើងនូវវប្បធម៌អហិង្សា ការគោរព យុត្តិធម៌ និង សន្តិភាព។ យើងមិនត្រូវជិះជាន់ បង្ករបួសស្នាម ធ្វើទារុណកម្មឬធ្វើឃាតមនុស្សដទៃឡើយ។ ការបោះបង់ចោលអំពើហិង្សា គឺជាមធ្យោបាយមួយនៃការដោះស្រាយភាពខុសគ្នា។ យើងត្រូវតែខិតខំស្វែងរកសណ្ដាប់ធ្នាប់សេដ្ឋកិច្ចនិងសង្គមមួយត្រឹមត្រូវ ដែលក្នុងនោះ ម្នាក់ៗ មានឱកាសស្មើគ្នាដើម្បីឈានទៅរកសក្ដានុពលពេញលេញជាមនុស្សជាតិ។ យើងត្រូវតែនិយាយនិងធ្វើអំពើដោយស្មោះត្រង់ និង យកសេចក្ដីមេត្តាទៅដោះស្រាយបញ្ហាដោយត្រឹមត្រូវជាមួយមនុស្សទាំងអស់ ព្រមទាំងចៀសវាងបុរេនិច្ឆ័យនិងសេចក្ដីស្អប់ខ្ពើម។ យើងមិនត្រូវលួចទ្រព្យអ្នកដទៃទេ។ យើងត្រូវតែចេញឲ្យផុតពីកម្លាំងដ៏ខ្លាំងនៃការលោភលន់អំណាច កិត្យានុភាព លុយ និង ការប្រើប្រាស់របស់ទាំងនេះ ដើម្បីឈានទៅកសាងពិភពលោកមួយពោរពេញដោយសន្តិភាព និង យុត្តិធម៌។
ភពផែនដីនេះ មិនអាចផ្លាស់ប្ដូរទៅរកភាពល្អប្រសើរបានឡើយ លុះត្រាតែមនសិការរបស់បុគ្គលម្នាក់ៗបានផ្លាស់ប្ដូរជាមុន។ យើងសន្យាបង្កើនការយល់ដឹងរបស់យើងតាមរយ:ការគ្រប់គ្រងសតិរបស់យើង ការធ្វើសមាធិ(ការជញ្ជឹងគិត) ការបួងសួង ឬ ការគិតបែបវិជ្ជមាន។ ប្រសិនបើគ្មានការប្រថុយ និង ឆន្ទ:ធ្វើពលិកម្មទេ ក៏មិនអាចមានការផ្លាស់ប្ដូរជាមូលដ្ឋាននៅក្នុងស្ថានភាពរបស់យើងដែរ។ ដូច្នេះ យើងប្ដេជ្ញាចិត្តបូជាខ្លួនយើងចំពោះសីលធម៌សាកលនេះ ចំពោះការយោគយល់គ្នាទៅវិញទៅមក ចំពោះការលើកកម្ពស់សន្តិភាពដ៏មានប្រយោជន៍សម្រាប់មនុស្សជាតិ និង ចំពោះរបៀបរស់នៅជាមិត្តភាពបែបធម្មជាតិ។ យើងអញ្ជើញប្រជាជនទាំងអស់នៅលើពិភពលោក ទាំងសាសនិកនិងមិនមែនសាសនិកឲ្យធ្វើដូច្នេះដែរ៕
© រក្សាសិទ្ធិដោយ thmeythmey.com