មេក្រុមរដ្ឋឥស្លាមលេចមុខជាថ្មី អំពាវនាវអោយបះបោរប្រឆាំងអារ៉ាប៊ីសាអូឌីត

អន្តរជាតិ

មេក្រុមរដ្ឋឥស្លាមលេចមុខជាថ្មី អំពាវនាវអោយបះបោរប្រឆាំងអារ៉ាប៊ីសាអូឌីត

27, Dec 2015 , 4:39 pm

រូបភាព

ដោយ:

ក្រោយស្ងាត់ដំណឹង៧ខែមក មេក្រុមជីហាតរដ្ឋឥស្លាម Abou Bakr Al-Baghdadi អាប៊ូ បាកា អាល់បាក់ដាតឌី បានលេចមុខជាថ្មី ដោយបានផ្តល់ដំណឹងតាមរយៈខ្សែអាត់សម្លេងចុះផ្សាយ នៅថ្ងៃសៅរ៍ម្សិលមិញនេះ។ នេះបើយោងតាមវេបសាយអាមេរិកSITE ទទួល បន្ទុកត្រួតពិនិត្យបណ្តាញក្រុមជីហាត។

ក្នុងខ្សែអាត់សម្លេង២៤នាទី អាល់ បាក់ដាតឌី បានអំពាវនាវអោយប្រជាជនអារ៉ាប៊ី សាអូឌីត ងើបបះបោរប្រឆាំងនឹងរដ្ឋាភិបាលក្រុងរីយ៉ាត។ កាលពីថ្ងៃ១៥ធ្នូ រដ្ឋាភិបាលអារ៉ាប៊ីសាអូឌីតបានប្រកាសយុទ្ធនាការប្រឆាំងភេរវកម្ម របស់ប្រទេសសម្ព័ន្ធមិត្ត។ អាល់បាក់ដាតឌីបានរិះគន់សម្ព័ន្ធមិត្តទាំង៣៤ប្រទេសដែលកំពុងប្រយុទ្ធនឹងក្រុមដែស្ហនៅស៊ីរី ថាជាក្រុមសម្ព័ន្ធមិត្តឥស្លាមក្លែងក្លាយ។

អាល់បាក់ដាតឌីលើកឡើងថា បើសិនជាក្រុមសម្ព័ន្ធមិត្តទាំងនេះពិតជាឥស្លាមមែន ពួកគេប្រហែលជាផ្តល់ជោគជ័យ និងជំនួយដល់ប្រជាជននៅស៊ីរីហើយ។ ទន្ទឹមនេះដែរ មេក្រុមជីហាតក៏បានគំរាមវាយប្រហារអ៊ីស្រាអែលផងដែរ។ អាល់បាក់ដាតឌីប្រាប់ថា ក្រុមរដ្ឋឥស្លាមមិនបានភ្លេចប៉ាឡេស្ទីនមួយពេលណាទេ។ ការប្រកាសនេះធ្វើឡើងខណៈសកម្មជនប្រយុទ្ធរបស់ក្រុមជីហាតរដ្ឋឥស្លាមកំពុងរងការវាយប្រហារធ្ងន់នៅស៊ីរីនិងអ៊ីរ៉ាក់៕