អន្តរជាតិ
នយោបាយអន្តរជាតិ
មីយ៉ាន់ម៉ា រកឃើញឧស្ម័នធម្មជាតិច្រើនសន្ធឹកនៅភាគនិរតីក្នុងឆ្នាំថ្មី
×![]()
របាយការណ៍ថ្មីរបស់រដ្ឋាភិបាលក្រុងណៃពិដោដែលចេញនៅថ្ងៃចន្ទទី៤មករានេះ បានបង្ហាញថា ក្រុមហ៊ុនក្នុងស្រុកបានប្រទះឃើញឧស្ម័នធម្មជាតិច្រើនសន្ធឹកនៅតំបន់សមុទ្រមួយកន្លែងទៀតដែលស្ថិតនៅភាគនិរតីនៃប្រទេស។ មីយ៉ាន់ម៉ារំពឹងថានឹងទទួលបានប្រយោជន៍ច្រើនសន្ធឹកសន្ធាប់ដោយការនាំចេញធនធានមហាសាលនេះសម្រាប់អភិវឌ្ឍប្រទេសនិងលើកកម្ពស់ជីវភាពរស់នៅរបស់ប្រជាជនពេលខាងមុខ។
ក្នុងឆ្នាំថ្មីនេះក្រុមហ៊ុនថាមពលក្នុងស្រុកមីយ៉ាន់ម៉ា MPRL E&P Pte Ltd បានរុករកឃើញទីតាំងថ្មីមួយកន្លែងទៀតដែលមានឧស្ម័នធម្មជាតិច្រើនសន្ធឹកសន្ធាប់អាចមីយ៉ាន់អាចបូមសម្រាប់ធ្វើអាជីវកម្មបាន។ បើតាមរបាយការណ៍ថ្មីដែលចេញផ្សាយថ្ងៃចន្ទទី៤មករានេះ តំបន់ដែលមានឧស្ម័នធម្មជាតិនេះស្ថិតនៅចម្ងាយ៤៨គីឡូម៉ែត្រពីឆ្នេរ Ngwesaung ដែលស្ថិតក្នុងតំបន់ Ayeyawaddy នាភាគនីរតីប្រទេសមីយ៉ាន់ម៉ា ។
ក្រុមហ៊ុនក្នុងស្រុកដែលរកឃើញឧស្ម័នធម្មជាតិនេះ ជាក្រុមហ៊ុនរដ្ឋតែមួយគត់ដែលបានប្រឡូកក្នុងសកម្មភាពរុករកប្រេងនិងឧស្ម័ន។ យោងតាមរបាយការណ៍ដដែល ឧស្ម័ននៅស្ថិតនៅក្រោមផ្ទៃទឹកប្រហែលជា២គីឡូម៉ែត្រប៉ុណ្ណោះ ប៉ុន្តែរបាយការណ៍មិនបានបញ្ជាក់ច្បាស់ពីទំហំឧស្ម័នទាំងនោះទេ។ ហើយក្រុមហ៊ុនបានប្រទះឃើញឧស្ម័ននេះ ក្រោយចាប់ផ្តើមដំណើរការគម្រោងរបស់ខ្លួនកាលពីខែវិច្ឆិកាឆ្នាំ ២០១៥ ។
ការរុករកឃើញឧស្ម័នច្រើនសន្ធឹកសន្ធាប់ បញ្ជាក់ថា មីយ៉ាន់ម៉ាអាចនឹងទទួលបានផលប្រយោជន៍ ច្រើនថែមទៀតពីសក្កានុពលនៃធនធានធម្មជាតិរបស់ខ្លួន ជាពិសេសវិស័យថាមពលតែម្តង។គ្រាន់តែចន្លោះឆ្នាំ២០១៤ ដល់ឆ្នាំ ២០១៥ មីយ៉ាន់ម៉ាអាចរកចំណូលបានច្រើនជាង៤.៦ពាន់លានដុល្លារ ពីការនាំចេញឧស្ម័ននិងប្រេងឆៅ។ នៅមីយ៉ាន់ម៉ា តំបន់ដែលអាចបូបប្រេងបានមាននៅ Yadana, Shwe, Yetagun និង Zawtika ហើយប្រេងដែលផលិតបាននោះភាគច្រើននាំចេញទៅកាន់ប្រទេសជិតខាងមានថៃនិងចិនជាដើម។
បច្ចុប្បន្នក្រុមហ៊ុនបរទេសជាច្រើនកំពុងរុករកប្រេងនិងឧស្ម័នធម្មជាតិនៅក្នុងដែនសមុទ្រមីយ៉ាន់ម៉ា ក្រោយទទួលបានសិទ្ធិរុករកពីរដ្ឋាភិបាល។ រដ្ឋាភិបាលបានផ្តល់ភ្លើងបៃតងដល់ក្រុមហ៊ុនបរទេសមានទាំងក្រុមហ៊ុន Chevron អាមេរិក Ophir Energyរបស់ អង់គ្លេស Woodside Petroleum Ltd របស់អូស្ត្រាលី និង Shell របស់បារាំង ក្នុងការរុករកឧស្ម័ននិងប្រេងនៅក្នុងតំបន់សំខាន់ចំនួន១៦ នៅលើកគោក និង២០ប្លុកផ្សេងទៀតនៅក្នុងសមុទ្រ។ ហើយគម្រោងរុករកប្រេងនេះចាប់ផ្តើមនៅចុងឆ្នាំ២០១៥ និងដើមឆ្នាំ ២០១៦នេះតែម្តង។ ក្រុមហ៊ុនមួយចំនួនចាប់ផ្តើមដំណើរការបូមយកធនធានទាំងនោះហើយ ឯក្រុមហ៊ុនមួយចំនួនទៀតកំពុងតែត្រៀមលក្ខណៈដើម្បីចាប់ផ្តើមការបូមយកធនធានមិនឲ្យយឺតយូរជាងឆ្នាំ ២០១៦ទេ។
សូមបញ្ជាក់ថា មីយ៉ាន់ម៉ាជារដ្ឋដែលសម្បូរហូរហៀរដោយធនធានធម្មជាតិជាពិសេសឧស្ម័នធម្មជាតិនិងប្រេងហើយធនធានទាំងនោះភាគច្រើនស្ថិតនៅក្នុងដែនសមុទ្រ។ ចាប់តាំងពីចុងទសវត្សរ៍ ១៩៨០ ដែលមីយ៉ាន់ម៉ាបើកទ្វារទទួលការវិនិយោគ រហូតដល់ចុងខែកញ្ញាឆ្នាំ ២០១៥ ទុនវិនិយោគបរទេសលើវិស័យប្រេងនិងឧស្ម័នកើនដល់១៩.៦៤១ពាន់លានដុល្លារអាមេរិកឯណោះ៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
