អន្តរជាតិ
អាបេសន្យាមិនប្រើយុទ្ធសាស្ត្ររំលាយសភាហើយបោះឆ្នោតមុនអាណត្តិ
× នៅថ្ងៃចន្ទទី៤ ខែធ្នូនេះ នាយករដ្ឋមន្ត្រីជប៉ុន ស៊ីនហ្សូ អាបេ បានថ្លែងក្នុងសន្និសីទព័ត៌មានថា លោករំពឹងថាការបោះឆ្នោតសភាជាន់ខ្ពស់នៅពេលខាងមុខ បក្សរបស់លោក និងសម្ព័ន្ធមិត្តគណបក្ស Komeito នឹងទទួលបានអាសនៈភាគច្រើន។ លោកសន្យាថា លោកមិនប្រើយុទ្ធសាស្ត្រចាស់រំលាយសភាហើយប្រកាសបោះឆ្នោតមុនអាណត្តិឡើយ។ នេះបើយោងតាមទីភ្នាក់ងារព័ត៌មានចិន Xinhua។
សូមស្ដាប់ព័ត៌មានលម្អិត៖
ក្នុងសន្និសីទសារព័ត៌មានប្រចាំឆ្នាំ នៅថ្ងៃចន្ទនេះ លោក ស៊ីនហ្សូ អាបេ បានបង្ហាញក្តីសង្ឃឹមខ្ពស់ថាគណបក្សរបស់លោកប្រជាធិបតេយ្យសេរីនឹងទទួលបានអាសនៈច្រើន ក្នុងការបោះឆ្នោតព្រឹទ្ធសភានៅរដូវក្តៅពេលខាងមុខនេះ។ ប៉ុន្តែអ្វីដែលសំខាន់ លោកបានសង្កត់ធ្ងន់ថា លោកមិនមានយុទ្ធសាស្ត្ររំលាយសភាចោលហើយប្រកាសរៀបចំការបោះឆ្នោតមុនអាណត្តិដូចមុនឡើយ។
សម្រាប់ការបោះឆ្នោតព្រឹទ្ធសភាខាងមុខ លោក អាបេ បន្តអំពាវនាវឲ្យសមាជិកបក្សលោក និងសមាជិកបក្ស Komeito ដែលជាដៃគូរបស់ខ្លួនឲ្យប្រឹងប្រែងដណ្តើមឲ្យបានអាសនៈភាគច្រើនដើម្បីបង្កភាពងាយស្រួលដល់រដ្ឋាភិបាលដែលដឹកនាំដោយរដ្ឋាភិបាលចម្រុះបច្ចុប្បន្ន។ លោក អាបេ សន្យាថា លោកនឹងប្រឹងប្រែងឲ្យអស់ពីសមត្ថភាពដើម្បីយកជ័យជម្នះក្នុងការបោះឆ្នោតសភាខាងមុខនេះផង។
បើសិនបក្សរបស់លោកមិនអាចដណ្តើមបានអាសនៈភាគច្រើនទេ រដ្ឋាភិបាលលោក អាចប្រឈមមុខឧបសគ្គក្នុងការអនុវត្តគោលនយោបាយអាទិភាពរបស់រដ្ឋាភិបាលបច្ចុប្បន្ន។ បញ្ហាសន្តិសុខតំបន់ សេដ្ឋកិច្ច សង្គមនិងនយោបាយ នៅតែជារឿងសំខាន់ដែលរដ្ឋាភិបាលក្រុងតូក្យូព្យាយាមដោះស្រាយក្នុងរយៈពេលកន្លងមក។
ប្រជាប្រិយភាពរបស់លោក អាបេ ក្នុងឆ្នាំ ២០១៥ បានធ្លាក់ចុះខ្លាំងបន្តិចដែរ ក្រោយពេលដែលលោកជំរុញឲ្យមានការអនុម័តច្បាប់សន្តិសុខថ្មីដែលអនុញ្ញាតឲ្យទ័ពជប៉ុនចេញទៅច្បាំងនិងការពារសម្ព័ន្ធមិត្តនៅក្រៅប្រទេស។ ហើយការកែទម្រង់រដ្ឋធម្មនុញ្ញដើម្បីពង្រឹងអំណាចយោធារបស់ជប៉ុនឲ្យកាន់ខ្លាំងក្លានេះនៅតែស្ថិតក្នុងគោលនយោបាយរបស់លោក អាបេ ដដែល។
តែក្រោមការដឹកនាំរបស់លោក អាបេ ជប៉ុនសម្រេចបានលទ្ធផល ជាច្រើនរួមទាំងការស្តារទំនាក់ទំនងជាមួយប្រទេសជិតខាងដូចជាកូរ៉េត្បូងនិងចិន ហើយនិងអាចកាត់បន្ថយកម្តៅនិងភាពតានតឹងដែលបង្កឡើងដោយជម្លោះព្រំដែនជាមួយរុស្ស៊ីជាដើម។ ក្នុងសន្និសីទខាងលើ លោក អាបេ បានឆ្លៀតលើកឡើងពី ការវិវត្តប្រកបដោយភាពវិជ្ជមាននៃទំនាក់ទំនងរវាងជប៉ុននិងប្រទេសជិតខាងផងដែរ។ ដូចដែលឃើញស្រាប់ការរៀបចំកិច្ចប្រជុំត្រីភាគីមានចិន ជប៉ុន និងកូរ៉េលើកទី៦នៅក្នុងប្រទេសកូរ៉េក្នុងខែវិច្ឆិកាកន្លងមក ដើម្បីកាត់បន្ថយភាពតានតឹងក្នុងតំបន់តាមរយៈការពង្រឹងនិងពង្រីកកិច្ចសហប្រតិបត្តិការរវាងប្រទេសទាំងបី។ លោក អាបេ រំពឹងថា កិច្ចប្រជុំកម្រិតរដ្ឋមន្ត្រីការបរទេសប្រទេសទាំងបីអាចនឹងត្រូវរៀបចំឡើងនៅពេលខាងមុខនេះ មុនពេលកិច្ចប្រជុំកំពូលត្រីភាគីត្រូវរៀបចំឡើងក្នុងប្រទេសជប៉ុន។
ចំណែកបញ្ហាព្រំដែនរុស្ស៊ីឯណោះវិញ លោក អាបេ ក៏លើកឡើងពីគោលនយោបាយរបស់លោក ក្នុងការជំរុញឲ្យមានការបង្កើតព្រមព្រៀងសន្តិភាពរួមគ្នានៅពេលណាមួយខាងមុខ។ ជប៉ុននិងរុស្ស៊ីបរាជ័យក្នុងការបង្កើតកិច្ចព្រមព្រៀងសន្តិភាពចាប់តាំងពីចប់សង្គ្រាមលោកលើកទី២មកម្ល៉េះ ហើយជម្លោះព្រំដែនរវាងរដ្ឋទាំងពីរនៅតែជាចំណុចស្នូលក្នុងការកសាងសន្តិភាពក្នុងតំបន់ផងដែរ។ យ៉ាងណាមិញ ក្នុងសុន្ទរកថា លោកអាបេ បានឆ្លៀតកោតសរសើរនយោបាយប្រឆាំងភេរវកម្មរបស់ប្រធានាធិបតីរុស្ស៊ី វ្ល៉ាឌីមៀ ពូទីន ផងដែរ។
ជុំវិញបញ្ហាសេដ្ឋកិច្ចជប៉ុន លោក អាបេ សន្យាថា រដ្ឋបាលលោកនឹងបន្តអនុវត្ត«គោលនយោបាយសេដ្ឋកិច្ចអាបេ» ដែលមានស្រាប់ដោយផ្តោតលើការកែទម្រង់នយោបាយសារពើពន្ធ និងជំរុញអត្រាកំណើតប្រជាជនឲ្យដល់ ១.៨ភាគរយ ដើម្បីដោះស្រាយវិបត្តិថយចុះកម្លាំងពលកម្ម។ ហើយលោករំពឹងថា ជប៉ុនអាចសម្រេចបានផលិតផលក្នុងស្រុកសរុបក្នុងទំហំ ៦០០ លានលានយ៉េន ដែលស្មើ ៥លានលានដុល្លារអាមេរិកត្រឹមឆ្នាំ ២០២០ ខាងមុខនេះ៕
© រក្សាសិទ្ធិដោយ thmeythmey.com