ប៉ូឡូញពង្រឹងកម្លាំងទ័ព និងស្នើណាតូឲ្យដាក់មូលដ្ឋានយោធាទប់ទល់រុស្ស៊ី

អន្តរជាតិ

ប៉ូឡូញពង្រឹងកម្លាំងទ័ព និងស្នើណាតូឲ្យដាក់មូលដ្ឋានយោធាទប់ទល់រុស្ស៊ី

05, Jan 2016 , 8:59 pm

រូបភាព

ដោយ: សៅ ផលនិស្ស័យ (Sao Phal Niseiy)

រដ្ឋាភិបាលប៉ូឡូញបានប្រកាសថា ខ្លួននឹងបង្កើតអង្គភាពយោធាថ្មីចំនួនបីដែលនឹងទទួលបន្ទុក ការពារព្រំដែននៅភាគខាងកើតដែលនៅមិនឆ្ងាយពីរុស្ស៊ីដើម្បីការពារខ្លួន។ ការឈានទៅពង្រឹងកម្លាំងយោធាតាមព្រំដែនជាប់រុស្ស៊ី កើតឡើងក្រោយពេលប៉ូឡូញស្នើឲ្យបក្សសម្ព័ន្ធយោធាណាតូសាងមូលដ្ឋានទ័ពអចិន្ត្រៃយ៍នៅអឺរ៉ុបកណ្តាលនិងអឺរ៉ុបខាងកើតនៅកិច្ចប្រជុំខាងមុខ។

ក្នុងឆ្នាំថ្មីនេះ រដ្ឋាភិបាលប៉ូឡូញបានសម្រេចពង្រឹងកម្លាំងយោធារបស់ខ្លួនដោយបង្កើតអង្គភាពទ័ពថ្មីដែលនឹងទទួលបន្ទុកការពារព្រំដែននៅភាគខាងកើត ។ ប៉ូឡូញ បារម្ភពីបញ្ហាសន្តិសុខរបស់ខ្លួន ក្រោយរុស្ស៊ីឈ្លានពានអ៊ុយក្រែននិងក្រសោបយកទឹកដី Crimea ពីអ៊ុយក្រែនក្នុងឆ្នាំ ២០១៤ និងការបន្តអូសបន្លាយជម្លោះនៅព្រំដែនអ៊ុយក្រែន-រុស្ស៊ីរហូតដល់បច្ចុប្បន្ននេះ។

យោងតាមសារព័ត៌មានរុស្ស៊ី Sputnik រដ្ឋាភិបាលប៉ូឡូញក៏ត្រៀមបង្កើនចំនួនកងទ័ពរបស់ខ្លួនពី ៨ម៉ឺននាក់ ឲ្យដល់១៥ម៉ឺននាក់ក្នុងឆ្នាំនេះផង។ ការបង្កើនចំនួនទ័ពនេះស្ថិតក្រោមគោល នយោបាយថ្មីរបស់រដ្ឋាភិបាលប៉ូឡូញ ដើម្បីត្រៀមលក្ខណទប់ទល់ការគំរាមកំហែងផ្នែកសន្តិសុខ ជាពិសេសពីរុស្ស៊ីតែម្តង។ជុំវិញការសាងកម្លាំងទ័ពភាគខាងកើតនេះដែរ រដ្ឋមន្ត្រីការពារជាតិប៉ូឡូញលោក Antoni Macierewicz បានលើកឡើងថា វាដល់ពេលដែលកងទ័ពប៉ូឡូញត្រូវងាកមកផ្តោតការយកចិត្តទុកដាក់លើព្រំដែនភាគខាងកើតវិញម្តង មិនមែននៅភាគលិចដូចឆ្នាំ ១៩៨៩ឡើយ។

ក្រៅពីកសាងកម្លាំងទ័ពផ្ទាល់ខ្លួន រដ្ឋាភិបាលប៉ូឡូញក៏បានស្នើសុំឲ្យបណ្តាសមាជិកបក្សសម្ព័ន្ធយោធាណាតូ យកចិត្តទុកដាក់លើប្រទេសសមាជិកដែលមានព្រំដែនជាប់រុស្ស៊ីផង។ ក្នុងឆ្នាំ ២០១៥ ណាតូបានសម្រេចពង្រាយសព្វាវុធនិងកងទ័ពទ្រង់ទ្រាយតូចប៉ុណ្ណោះទៅឈរជើងនៅអឺរ៉ុបខាងកើត ហើយសកម្មភាពសមយុទ្ធយោធាក៏ទើបលេចចេញឡើងញឹកញាប់ក្រោយរុស្ស៊ីឈ្លានពានអ៊ុយក្រែននេះដែរ។

រដ្ឋមន្ត្រីប៉ូឡូញបានស្នើឲ្យណាតូប្រើប្រាស់វេទិកាកិច្ចប្រជុំខាងមុខនៅទីក្រុងវ៉ាសូវី ដើម្បីជជែកគ្នាពីបញ្ហាសន្តិសុខរបស់សមាជិកណាតូនៅអឺរ៉ុបខាងកើត។ កន្លងមកប៉ូឡូញបានក្លាយជាសមាជិកណាតូឆ្នាំ ១៩៩៧ ប៉ុន្តែថ្មីនេះប៉ូឡូញដូចជាអន់ចិត្តដែរចំពោះបក្សសម្ព័ន្ធណាតូ។ នេះក៏ព្រោះថា តាំងពីយូរមកហើយណាតូប្រឹងតែបង្កើនវត្តមានទ័ពនិងពង្រឹងការការពារសន្តិសុខនៅអឺរ៉ុបខាងលិចតែប៉ុណ្ណោះ។ គ្មានមូលដ្ឋានទ័ពណាតូអចិន្ត្រៃយ៍នៅតំបន់អឺរ៉ុបខាងកើតឡើង ហើយបើគ្មានការឈ្លានពានរបស់រុស្ស៊ី ក៏ណាតូមិនខ្នះខ្នែងបញ្ជូនទ័ពនិងសព្វាវុធទៅអឺរ៉ុបខាងកើតដែរ។

យ៉ាងណាមិញការពង្រឹងអំណាចយោធានិងកសាងកម្លាំងទ័ពរបស់ណាតូក្បែរព្រំដែនរុស្ស៊ីនឹងក្លាយជាបញ្ហាប្រឈមមួយផ្សេងទៀត ព្រោះរុស្ស៊ីមិនអាចនៅស្ងៀមឡើយ។កន្លងមករុស្ស៊ីគំរាមតបត គម្រោងពង្រាយអាវុធធុនធ្ងន់របស់សមាជិកបក្សសម្ព័ន្ធយោធាណាតូទៅអឺរ៉ុបខាងកើត។ ហើយបើមានគម្រោងបែបនេះមែនការប្រឈមមុខគ្នាស្រួចស្រាវផ្នែកយោធាអាចនឹងកើតឡើងផងដែរ៕