អន្តរជាតិ
ក្រុងព្យុងយ៉ាងចំណាយជិត៣០ភាគរយនៃថវិកាជាតិលើវិស័យយោធា
× កូរ៉េខាងជើងប្រហែលជារដ្ឋតែមួយប៉ុណ្ណោះដែលចំណាយថវិកាជាតិច្រើនរហូតដល់ ១ភាគ៤ ដើម្បីពង្រឹងអំណាចយោធារបស់ខ្លួននិងមានកងទ័ពសម្រាប់ប្រយុទ្ធជាង១លាននាក់។ ប្រជាជនកូរ៉េខាងជើងត្រូវរស់នៅដោយរងបន្ទុកធ្ងន់ធ្ងរនេះអស់រយៈពេលជាច្រើនឆ្នាំតាំងពីសង្គ្រាមកូរ៉េចប់ផ្លូវការចាប់តាំងឆ្នាំ ១៩៥៣ ។
សូមស្ដាប់ព័ត៌លម្អិតដោយលោក មុំ ពិទូរ្យ៖
របាយការណ៍វាយតម្លៃលើការចំណាយលើយោធាពិភពលោកឆ្នាំ២០១៥ ដែលចងក្រងឡើងដោយក្រសួងការបរទេសអាមេរិក បានបង្ហាញថា កូរ៉េខាងជើងក្លាយជារដ្ឋតែមួយលើលោកដែលចំណាយលើវិស័យយោធា ច្រើន រហូតដល់ ១ ភាគ ៤ នៃផលិតផលក្នុងស្រុកសរុបរបស់ខ្លួនឯណោះ។
តាំងពីសង្គ្រាមកូរ៉េផុតរលត់ទៅ កូរ៉េខាងជើងបន្តបង្កើនការចំណាយលុយច្រើនសន្ធឹកដើម្បីផលិតអាវុធ និងពង្រឹងសមត្ថភាពយោធារៀងរាល់ឆ្នាំ។ កូរ៉េខាងជើង និងកូរ៉េខាងត្បូងនៅតែស្ថិតក្នុងស្ថានភាពមានសង្គ្រាមនៅឡើយ ព្រោះជារឿយៗប្រទេសទាំងពីរប៉ះទង្គិចគ្នាតាមព្រំដែននិងប្រឈមមុខគ្នាដោយយោធានៅឡើយ។ ប៉ុន្តែការបន្តបង្កើនសមត្ថភាពយោធារបស់ក្រុងព្យុងយ៉ាងក្រោមរបបដឹកនាំត្រកូលគីម ដើម្បីទប់ទល់កូរ៉េខាងត្បូង បានក្លាយជាបន្ទុកធ្ងន់ធ្ងរបំផុតសម្រាប់ប្រជាជនកូរ៉េខាងជើងគ្រប់គ្នា។
វាជាបន្ទុកធ្ងន់សម្រាប់ប្រជាជនកូរ៉េខាងជើង ក៏ដោយសារតែផលិតផលក្នុងស្រុកសរុបរបស់រដ្ឋដ៏ឯកោនេះមានទំហំត្រឹម ១៧ពាន់លានដុល្លារប៉ុណ្ណោះបើគិតត្រឹមឆ្នាំ ២០១២ ។ ហើយតាំងពីយូរមកហើយ សេដ្ឋកិច្ចកូរ៉េខាងជើងមិនសូវលូតលាស់សោះ ព្រោះតែសេដ្ឋកិច្ចបិទជិតនិងរងទណ្ឌកម្មរបស់សហគមន៍អន្តរជាតិ។ ប៉ុន្តែរដ្ឋមួយនេះមិនបានបោះបង់មហិច្ឆតាកសាងអំណាចយោធារបស់ខ្លួនឡើយ ទោះជាប្រឈមបញ្ហាសេដ្ឋកិច្ចបែបនេះក្តី។ ថវិកាយោធាត្រូវគេបង្កើនរាល់ឆ្នាំដើម្បីផលិតអាវុធ ខណៈដែលប្រជាជនជួបការលំបាក រកមុខ ខ្វះក្រោយ និងប្រឈមគ្រោះទុរភិក្សអត់ឃ្លានជាដើមផង។
ទាក់ទិនការចំណាយលើកងទ័ពនិងសព្វាវុធ បើតាមរបាយការណ៍ក្រសួងការបរទេសអាមេរិកខាងលើ កូរ៉េខាងជើងចំណាយថវិកា ២៣.៨ ភាគរយនៃផលិតផលក្នុងស្រុកសរុបរបស់ខ្លួនលើកងទ័ពជើងគោក ជើងទឹក និងជើងអាកាស បើប្រៀបធៀបជាមួយបណ្តាប្រទេសដែលមានអំណាចយោធាខ្លាំងក្លាផ្សេងទៀត មានតែកូរ៉េខាងជើងប៉ុណ្ណោះដែលចំណាយថវិកាច្រើនលើសគេ។ ដូចដែរឃើញស្រាប់ កូរ៉េខាងត្បូងចំណាយត្រឹម ២.៥ ភាគរយនៃផលិតផលក្នុងស្រុកសរុបរបស់ខ្លួនប៉ុណ្ណោះ។ ចំណែកសហរដ្ឋអាមេរិកដែលជាមហាអំណាចយោធាតែមួយគត់លើលោកនោះចំណាយថវិកា ៤.៣ ភាគរយ ហើយមហាយក្សចិនបង្កើនចំណាយដល់ត្រឹមប្រហែល២.១ភាគរយនៃផលិតផលក្នុងស្រុកសរុប និងរុស្ស៊ីចំណាយថវិកាត្រឹម ៣.៧ភាគរយ។
បើផ្តោតលើចំនួនកងទ័ពវិញ កូរ៉េខាងជើងមានកងទ័ពសម្រាប់ប្រយុទ្ធរហូតដល់ជាង ១លាន ១សែននាក់ឯណោះ ខណៈដែលអាមេរិកមានកងទ័ព១៤សែននាក់ ហើយរុស្ស៊ីមានកងទ័ពប្រហែល១លាននាក់តែប៉ុណ្ណោះ៕
© រក្សាសិទ្ធិដោយ thmeythmey.com