ជាតិ
អ្នកជេរតាមហ្វេសប៊ុក៖ «សម្តេចជួយផង!»
× ជនជាប់ចោទដែលបានគំរាមសម្លាប់សម្ដេចនាយករដ្ឋមន្ត្រី ហ៊ុន សែន តាមបណ្ដាញហ្វេសប៊ុក បានស្នើសុំរកជំនួយពីនាយករដ្ឋមន្ត្រីវិញ នៅពេលដែលជនចាប់ចោទរូបនេះ ត្រូវបានអាជ្ញាធរ បញ្ជូនទៅសាកសួរនៅតុលាការសាលាដំបូងរាជធានីភ្នំពេញ។ មុនពេលចូលបន្ទប់សវនាការជនជាប់ចោទពីបទ«គំរាមសម្លាប់ និងប្រមាថ»រូបនេះ បានត្រឹមតែឆ្លើយតបយ៉ាងនេះថា៖«សម្តេចជួយផង» នៅចំពោះមុខអ្នកកាសែតដែលបានទៅតាមដានដំណើរការសាកសួរនេះ។
ឆ្លើយតបចំពោះសំណួរដែលសួរថា«លោកធ្លាប់ដឹងទេថា តើនាយករដ្ឋមន្ត្រីធ្លាប់ព្រមានចាត់វិធានការ ចំពោះអ្នកជេរប្រមាថខ្លួន តាមហ្វេសប៊ុក?» និងសំណួរមួយទៀតដែលចោទសួរថា «មានការសោកស្តាយដែរទេ ចំពោះទង្វើដែលខ្លួនបានធ្វើនៅពេលនេះ?» យុវជន ម៉ាន់ សំអ៊ាន់ ក៏មិនបានឆ្លើយតបអ្វី ក្រៅតែពីការគ្រវីក្បាលដោយទឹកមុខស្រងូតស្រងាត់ប៉ុណ្ណោះ។
សូមបញ្ជាក់ថា ជនជាប់ចោទវ័យ២៥ឆ្នាំរូបនេះ ត្រូវបញ្ជូនទៅដល់បន្ទប់សាកសួររបស់តុលាការសាលាដំបូង នៅម៉ោងប្រមាណ៤រសៀល ថ្ងៃទី៨ខែមករានេះ។
កាលពីថ្ងៃទី៦ មករា សមត្ថកិច្ចបានចាប់ខ្លួនជនសង្ស័យម្នាក់នៅខេត្តកំពង់ធំ ដែលបានគំរាមសម្លាប់សម្ដេចនាយករដ្ឋមន្ត្រី ហ៊ុន សែន តាមបណ្ដាញហ្វេសប៊ុក។ លោក ជូ សំអាន ស្នងការរងខេត្តកំពង់ធំ បានបញ្ជាក់ថាសមត្ថកិច្ចបានចាប់ខ្លួនជនសង្ស័យម្នាក់នោះ ដែលបានប្រើគណនីហ្វេសប៊ុកដោយដាក់ឈ្មោះក្លែងក្លាយ ខុសពីឈ្មោះពិតរបស់ខ្លួនដើម្បីជេរប្រមាថ និងគំរាមសម្លាប់នាយករដ្ឋមន្ត្រី ហ៊ុន សែន។ លោកបន្ថែមថា ក្រោយពីសមត្ថកិច្ចបាននាំខ្លួនមកសាកសួរចម្លើយរួចមក ជនសង្ស័យម្នាក់នោះ ពិតជាបានសារភាពថា ខ្លួនបានជេរប្រមាថដល់អាយុជីវិតសម្ដេច ហ៊ុន សែន មែន៕
Tag:
គំរាមសម្លាប់
ហ៊ុន សែន
© រក្សាសិទ្ធិដោយ thmeythmey.com