កីឡាអន្តរជាតិ
អន្តរជាតិ
លោក Platini ដកខ្លួនចេញពីការប្រជែងកៅអីប្រធាន FIFA
× លោក Michel Platini បានសម្រេចដកខ្លួនចេញពីការបោះឆ្នោតរើសប្រធាន FIFA ជំនួសលោក Sepp Blatter ដែលបានលាលែង ។ ការសម្រេចចិត្តនេះ ធ្វើឡើងតែប៉ុន្មានសប្ដាហ៍ ក្រោយគណៈកម្មាធិការវិន័យរបស់ FIFA បានពិន័យរូបលោកមិនឲ្យពាក់ព័ន្ធសកម្មភាពកីឡា៨ ឆ្នាំ ។
ប្រធានសហព័ន្ធកីឡាបាល់ទាត់ទ្វីបអឺរ៉ុប (UEFA) លោក Michel Platini បានដកបេក្ខភាព របស់លោកចេញពីបោះឆ្នោតរើសប្រធានសហព័ន្ធកីឡាបាល់ទាត់ពិភពលោក (FIFA) ដែលនឹងធ្វើនៅខែកុម្ភៈខាងមុខ ។ សារព័ត៌មាន AFP ស្រង់សម្ដីលោក Platini ថា លោកនឹងមិនបង្ហាញខ្លួនជាបេក្ខភាពនោះទេ ។ លោកបានដកខ្លូនចេញហើយ ពីព្រោះលោកគ្មានពេលទៅជួបអ្នកបោះឆ្នោតឡើយ ។
កាលពីខែធ្នូ ឆ្នាំ២០១៥ ប្រធាន UEFA រូបនេះ ក៏ដូចជាលោក Blatter ត្រួវបានគណៈកម្មាធិ ការវិន័យរបស់ FIFA ពិន័យមិនឲ្យពាក់ព័ន្ធកីឡា ៨ឆ្នាំ ។ ពោលគឺក្រោយពេលមានការស៊ើប អង្កេតលើករណីពុករលួយប្រាក់ចំនួន ២.០២លានដុល្លារដែលលោក Blatter ផ្ដល់ឲ្យលោក Platini ក្នុងឆ្នាំ២០១១ ។ យ៉ាងណា បុរសទាំងពីរនាក់បានបដិសេធរឿងនេះ ។
តាំងពីដើមមក លោក Platini តែងតែទទូចឲ្យ លោក Blatter លាលែងពីតំណែង ព្រោះលោក Blatter កាន់តំណែងនេះយូរមកហើយ ។ មួយវិញទៀត លោក Platini ត្រូវបានគេមើលឃើញថា ជាបេក្ខជននាំមុខគេសម្រាប់តំណែងប្រធាន FIFA នេះ ។ ប៉ុន្តែរឿងអាស្រូវពុករលួយបានប៉ះពាល់ខ្លាំងដល់បេក្ខភាពរបស់លោក ។
សូមរម្លឹកថា ប្រធាន FIFA ថ្មីនឹងត្រូវជ្រើសរើសក្នុងសមាជវិសាមញ្ញ FIFA ដែលនឹងធ្វើនៅស្នាក់ការកណ្ដាលរបស់ខ្លួនក្នុងទីក្រុង Zurich នៅថ្ងៃទី២៦ ខែកុម្ភៈខាងមុខនេះ ។ ហើយនៅពេលនេះ មានបេក្ខភាពមួយចំនួនហើយដែលបានឈ្មោះប្រជែងកៅអីប្រធានស្ថាប័នកីឡាបាល់ទាត់ពិភពលោកដែលនៅទំនេរនេះ ៕
© រក្សាសិទ្ធិដោយ thmeythmey.com