បទយកការណ៍ / បទសម្ភាសន៍
លោក យឹម សុវណ្ណ៖«ខ្ញុំនឹងដើរលើវិថីនយោបាយតាមឯកឧត្តម សម រង្ស៊ី រហូតអវសានជីវិត»
ក្នុងវ័យ ៥១ ឆ្នាំលោក យឹម សុវណ្ណ បានកាន់តំណែងជាតំណាងរាស្ត្ររយៈពេល ៤ អាណត្តិមកហើយ។ លោក យឹម សុវណ្ណ បានផ្តើមជីវិតនយោបាយរបស់ខ្លួនដំបូងជាមួយគណបក្សជាតិខ្មែរដែលមានឯកឧត្តម សម រង្ស៊ី ជាប្រធាន ហើយពេលនោះលោកមានតួនាទីជាសមាជិកគណៈកម្មាការអចិន្ត្រៃយ៍បក្ស។ លោក យឹម សុវណ្ណ មានមោទកភាពខ្លួនឯងខ្លាំងណាស់ ដែលបានដើរលើវិថីនយោបាយជាមួយមេដឹកនាំគំរូរបស់ខ្លួន គឺឯកឧត្តម សម រង្ស៊ី បើទោះបីពេលខ្លះលោកត្រូវប្រឈមនឹងគ្រោះថ្នាក់ដល់ជីវិតក្តី។ លោកអះអាងថា រូបលោកនឹងដើរតាមលោក សម រង្ស៊ី រហូតដល់អវសានជីវិតរបស់ខ្លួន។
គិតត្រឹមឆ្នាំ ២០១៥ លោក យឹម សុវណ្ណ បានរស់នៅក្នុងជីវិតនយោបាយជាមួយលោក សម រង្ស៊ី អស់រយៈពេលជាង ២០ ឆ្នាំមកហើយ ។ ម្ភៃឆ្នាំមកនេះ លោកនិងឯកឧត្តម សម រង្ស៊ី ដែលជាប្រធានរបស់ខ្លួនមានអនុស្សាវរីយ៍ស្ទើររាប់មិនអស់ជាមួយគ្នា។ តាមពិតទៅ មុនដើរលើវិថីនយោបាយជាមួយឯកឧត្តម សម រង្ស៊ី លោក យឹម សុវណ្ណ ដែលធ្លាប់បម្រើការងារជាមន្ត្រីរាជការនៅក្នុងក្រសួងអប់រំមុនឆ្នាំ ១៩៩៣ ក៏ធ្លាប់ធ្វើជាជំនួយការឯកឧត្តម សម រង្ស៊ី នៅឆ្នាំ ១៩៩៣ កាលពីពេលដែលឯកឧត្តម សម រង្ស៊ី ធ្វើជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បន្ទាប់ពីខ្លួនបញ្ចប់បរិញ្ញាបត្រផ្នែកសេដ្ឋកិច្ចនៅឆ្នាំ ១៩៩០ ។ លោកបានធ្វើជាជំនួយការឯកឧត្តម សម រង្ស៊ី បានមួយរយៈ ក៏ឃ្លាតឆ្ងាយពីឯកឧត្តម សម រង្ស៊ី ទៅបន្តការសិក្សាថ្នាក់អនុបណ្ឌិតផ្នែកសេដ្ឋកិច្ចនៅប្រទេសជប៉ុន ពីឆ្នាំ ១៩៩៣ ដល់ឆ្នាំ១៩៩៥ ។
ឆ្នាំ ១៩៩៥ ពេលដែលខ្លួនត្រឡប់មកពីសិក្សាក្រៅប្រទេសវិញ លោកអនុបណ្ឌិតរូបនេះ បានស្ម័គ្រចិត្តដើរចូលគន្លងនយោបាយតាមឯកឧត្តម សម រង្ស៊ី ដែលបង្កើតគណបក្សជាតិខ្មែរនៅឆ្នាំ ១៩៩៥ ។ នៅក្នុងគណបក្សជាតិខ្មែរលោក យឹម សុវណ្ណ មានតួនាទីជាសមាជិកគណៈកម្មាធិការអចិន្ត្រៃយ៍បក្ស។ ក្រោយពីគណបក្សជាតិខ្មែរប្តូរឈ្មោះជាគណបក្ស សម រង្ស៊ី ហើយចូលរួមប្រកួតប្រជែងក្នុងការបោះឆ្នោតអាណត្តិទី ២ ក្នុងឆ្នាំ ១៩៩៨ និងទទួលបានអាសនៈ នៅក្នុងរដ្ឋសភា លោក យឹម សុវណ្ណ ដែលមានទីកន្លែងកំណើតនៅភ្នំពេញ ហើយបច្ចុប្បន្នមានកូនពីរនាក់ក្រោយរៀបការជាមួយអ្នកស្រី កែ សុវណ្ណរតន៍ ក៏បានជាប់ឆ្នោតធ្វើជាតំណាងរាស្ត្រមណ្ឌលភ្នំពេញតាំងពីពេលនោះមក។
«វិះបាត់បង់ជីវិត ពេលជិះអូប័រ ហើយមានខ្យល់ព្យុះពាក់កណ្តាលទន្លេ!»
ដើរលើវិថីនយោបាយជាមួយឯកឧត្តម សម រង្ស៊ី ជាង ២០ ឆ្នាំមកនេះ លោក យឹម សុវណ្ណ រម្លឹកថា ខ្លួនមានអនុស្សាវរីយ៍ច្រើនស្ទើររាប់មិនអស់ជាមួយមេដឹកនាំរបស់ខ្លួន។ អនុស្សាវរីយ៍ទាំងនោះ មានដូចជា អនុស្សាវរីយ៍រូបលោក និងឯកឧត្តម សម រង្ស៊ី ពេលភៀសខ្លួនទៅប្រទេសថៃ។ លោក យឹម សុវណ្ណ បញ្ជាក់យ៉ាងនេះថា៖ «អនុស្សាវរីយ៍យើង ក្រោយពីព្រឹត្តិការណ៍ គប់គ្រាប់បែក កាលពីថ្ងៃទី ៣០ ខែមីនា ឆ្នាំ ១៩៩៧ និងការធ្វើរដ្ឋប្រហារថ្ងៃ ៥ និង៦ ខែកក្កដា ឆ្នាំ ១៩៩៧ ដែលយើងភៀសខ្លួនទៅប្រទេសថៃជាមួយគ្នា»។ លោក យឹម សុវណ្ណ ក៏នឹកឃើញដល់អនុស្សាវរីយ៍ កាលពីថ្ងៃទី ២០ ខែ សីហា ឆ្នាំ ១៩៩៨ មានព្រឹត្តិការណ៍ផ្ជង់ និងគប់គ្រាប់បែកនៅមុខក្រសួងមហាផ្ទៃ។ «ពេលនោះ មានការចាប់តំណាងរាស្ត្រគណបក្សសម រង្ស៊ី រហូតជាប់ពន្ធនាគារមួយយប់។ ហើយគេឃុំខ្លួនយើង(លោក និងឯកឧត្តម សម រង្ស៊ី ព្រមទាំងតំណាងរាស្ត្របក្សសម រង្ស៊ី មួយចំនួន) នៅក្នុងបន្ទប់លោក ហូ សុខ ដែលគេត្រូវបានគេបាញ់សម្លាប់។ ពេលនោះយើងមានអារម្មណ៍សង្វេគមែនទែន តែសំណាងពេលនោះមានអង្គការសហប្រជាជាតិជួយ»។ លោក យឹម សុវណ្ណ និយាយដូច្នេះ ក៏បន្តរៀបរាប់ពីអនុស្សាវរីយ៍ដែលលោកចងចាំមិនអាចបំភ្លេចបានក្នុងជីវិត នៅពេលបំពេញការងារដែលឯកឧត្តម សម រង្ស៊ី បញ្ជាក់ឲ្យធ្វើ ហើយរូបលោកស្ទើរបាត់បង់ជីវិត។
អ្នកនយោបាយសម្បុរស្រអែម ច្រមុះស្រួច ភ្នែកធំៗ រូបនេះ បានដំណាលពីព្រឹត្តិការណ៍នៅពេលនោះបែបនេះថា៖«មានថ្ងៃមួយនោះ ក្នុងពេលឃោសនាបោះឆ្នោតក្នុងឆ្នាំ ១៩៩៨ គាត់(លោក សម រង្ស៊ី) បានឲ្យខ្ញុំនាំអ្នកកាសែតទៅខេត្តក្រចេះទាំងកណ្តាលអធ្រាត្រ។ ពេលនោះមិនមែនជិះឡានទេ ខ្ញុំជិះអូប័រដ៏តូចមួយកាត់ទន្លេមេគង្គ ដែលនៅក្នុងនោះមានតែខ្ញុំ អ្នកកាសែតជនជាតិបារាំងម្នាក់ និងជំនួយការម្នាក់ប៉ុណ្ណោះ ដើម្បីទៅឲ្យទាន់ស្ថានការឃោសនាបោះឆ្នោតពេលព្រឹកនៅខេត្តក្រចេះ។ ពេលនោះមានខ្យល់ព្យុះត្រង់ពាក់កណ្តាលទន្លេយើងមិនដឹងនៅទិសតំបន់ណាឡើយ។ ឃើញខ្យល់ព្យុះភ្លាម ខ្ញុំគិតថា បើសិនជាស្លាប់ដោយសារខ្យល់ព្យុះតាមផ្លូវ ក៏ខ្ញុំនៅតែមានមោទកភាពដែរ ដែលយើងបានបម្រើជាតិ និងបម្រើថ្នាក់ដឹកនាំដែលមានការគោរពស្រឡាញ់ពីប្រជាពលរដ្ឋ»។ លោក យឹម សុវណ្ណ បន្តបរិយាយទៀតថា៖«តែភ័ព្វសំណាងពេលនោះ ខ្យល់ព្យុះបានថយចុះ ហើយយើងក៏រួចផុតពីគ្រោះថ្នាក់ និងមានជីវិតដល់សព្វថ្ងៃ។ នេះជាអនុស្សាវរីយ៍ដែលដក់ក្នុងជីវិតខ្ញុំជាងគេ»។
«ខ្ញុំនឹងដើរលើវិថីនយោបាយតាមឯកឧត្តម សម រង្ស៊ី រហូតអវសានជីវិត»
រយៈពេល ២០ ឆ្នាំមកនេះ ដែលលោក យឹម សុវណ្ណ ដើរតាមវិថីនយោបាយជាមួយឯកឧត្តម សម រង្ស៊ី ។ លោកថា ខ្លួនធ្លាប់ទទួលរងការគំរាមកំហែង ការឈឺចាប់ ការគាបសង្កត់ ដែលបង្កដោយគូរបដិបក្ស ជាប់ជានិច្ចចាប់ពីឆ្នាំ ១៩៩៥ មក។ លោក យឹម សុវណ្ណ ចាត់ទុកឧបសគ្គដែលខ្លួនជួបប្រទះពេលនោះបែបនេះថា៖«តែការឈឺចាប់ទាំងអស់នេះ កាន់តែធ្វើឲ្យយើងមានឧត្តមគតិស្នេហាជាតិ ហើយអប់រំយើងឲ្យក្លាយជាអ្នកនយោបាយដែលមានគោលការណ៍ មានភាពស្អាតស្អំ មានសម្បជញ្ញៈស្រឡាញ់ជាតិ»។ ជាមួយគ្នានេះអ្នកនាំពាក្យគណបក្សសង្គ្រោះជាតិដែលនិយាយដោយមានមោទកភាពខ្លាំងណាស់ ដែលខ្លួនបានបម្រើឯកឧត្តម សម រង្ស៊ី យ៉ាងនេះថា៖ «នៅក្នុងបេះដូងរបស់ខ្ញុំលោកសម រង្ស៊ី ជាវីរជន ដែលខ្ញុំគោរព។ គាត់ជាមនុស្សដែលមានគោលការណ៍ ជាមេដឹកនាំដែលមានការប្តេជ្ញាខ្ពស់ ស្មោះត្រង់ចំពោះប្រទេសជាតិ។ គាត់ជាក្តីសង្ឃឹមរបស់ប្រទេសជាតិ ដែលអាចដឹកនាំប្រទេសទៅរកលទ្ធិប្រជាធិបតេយ្យ រីកចម្រើន យុត្តិធម៌ពិតប្រាកដ ជាពិសេសការពារបូរណភាពទឹកដី»។ លោកបរិយាយបន្ថែមថា៖«ដូច្នេះបានជាខ្ញុំជ្រើសរើសផ្លូវដែលត្រូវដើរ។ ក្នុងមួយជីវិត ខ្ញុំនឹងគោរព និងដើរជាមួយគាត់ តាមគាត់នៅលើវិថីនយោបាយ ដល់ទីអវសាននៃជីវិតរបស់ខ្ញុំ។ ខ្ញុំមានមោទកភាពណាស់ដែលបានធ្វើការជាមួយអ្នកនយោបាយជាន់ខ្ពស់មួយរួបដែលមានការគោរពស្រឡាញ់ពីប្រជាពលរដ្ឋ។ ខ្ញុំបានលះបង់ពេលវេលា ភាពជាយុវ័យជូនប្រទេសជាតិ និងខ្ញុំមានមោទកភាពដែលបានធ្វើការជាមួយវីរជន»។
«ឯកឧត្តម សម រង្ស៊ី មិនមែនជាអ្នកនយោបាយកំសាក តែជាអ្នកនយោបាយស្គាល់កាលៈទេសៈ»
ដោយសារតែក្នុងបេះដូងរបស់ខ្លួនចាត់ទុកឯកឧត្តម សម រង្ស៊ី គឺជាវីរជន ទើបលោក យឹម សុវណ្ណ ហ៊ានអះអាងថា លោក សម រង្ស៊ី មិនមែនជាអ្នកនយោបាយកំសាកឡើយ តែជាអ្នកនយោបាយស្គាល់កាលៈទេសៈ។ ការថ្លែងការពារលោក សម រង្ស៊ី របស់លោក យឹម សុវណ្ណ បែបនេះ បន្ទាប់ពីប្រជាពលរដ្ឋមួយចំនួនបានរិះគន់លោក សម រង្ស៊ី មេដឹកនាំគណបក្សប្រឆាំងថា ជាអ្នកនយោបាយដែលកំសាក ខ្លាចជាប់ពន្ធនាគារ មិនហ៊ានប្រឈមមុខចំពោះសកម្មភាពរបស់ខ្លួនទេ។ ពួកគេរិះគន់ទៀតថា ឲ្យតែជួបបញ្ហាម្តងៗពាក់ព័ន្ធនឹងការគំរាមខ្លួន ឬសកម្មជនខ្លួន ដាក់ពន្ធនាគារ លោក សម រង្ស៊ី តែងតែរត់ទៅក្រៅប្រទេសជានិច្ច។ អ្នកនាំពាក្យគណបក្សសង្គ្រោះជាតិចខាងលើ បញ្ជាក់យ៉ាងនេះថា៖«យើងជាអ្នកនយោបាយ យើងត្រូវមានសមត្ថភាព គំនិត ហើយសមត្ថភាពគំនិតមិនគ្រប់គ្រាន់ទេ ត្រូវមានសេចក្តីក្លាហាន តែទាំងនេះមិនគ្រប់គ្រាន់ទៀត នៅពេលដែលយើងមិនយល់កាលៈទេសៈ។ ឯកឧត្តម សម រង្សី គាត់មានទាំងអស់នេះហើយ គាត់យល់កាលៈទេសៈទៀត។ គាត់ធ្វើត្រឹមត្រូវ។ ឯកឧត្តម សម រង្ស៊ី មិនមែនជាមនុស្សកំសាកទេ»។ លោក យឹម សុវណ្ណ បញ្ជាក់ពីជីវិតនយោបាយខ្លួនថា អ្នកនយោបាយដូចប្រមុខបក្សឯកឧត្តម សម រង្ស៊ី លោកមិននឿយណាយនឹងបម្រើលុះចុងបញ្ចប់នៃជីវិតនយោបាយរបស់ខ្លួន៕
Tag:
យឹម សុវណ្ណ
សម រង្ស៊ី
CNRP
© រក្សាសិទ្ធិដោយ thmeythmey.com