សម្តេច ស ខេង ណែនាំក្រសួងនានាឲ្យផ្ទេរមុខងារ និងធនធានទៅរដ្ឋបាលថ្នាក់ក្រោមជាតិ

ជាតិ

សម្តេច ស ខេង ណែនាំក្រសួងនានាឲ្យផ្ទេរមុខងារ និងធនធានទៅរដ្ឋបាលថ្នាក់ក្រោមជាតិ

13, Jan 2016 , 8:39 pm

រូបភាព

ដោយ:

ភ្នំពេញ៖ រដ្ឋមន្ត្រីក្រសួងមហាផ្ទៃ សម្តេច ស ខេង បានជំរុញថ្នាក់ដឹកនាំក្រសួងនានា ឲ្យផ្ទេរមុខងារ និងធនធានមួយចំនួន ទៅរដ្ឋបាលថ្នាក់ក្រោមជាតិបន្ថែមទៀត ដើម្បីរដ្ឋបាលថ្នាក់ក្រោមជាតិអាចបង្កើនសមត្ថភាពអភិវឌ្ឍនៅមូលដ្ឋានជូនប្រជាពលរដ្ឋ។

រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) សម្តេច ស ខេង បានថ្លែងក្នុងកិច្ចប្រជុំលើកទី១១ របស់ គ.ជ.អ.ប នៅថ្ងៃទី១២ មករានេះថា ការផ្ទេរមុខងារ ធនធានហិរញ្ញវត្ថុ និងធនធាន មនុស្សឲ្យទៅដល់រដ្ឋបាលថ្នាក់ក្រោមជាតិ មានគោលបំណងធានាការលើកម្ពស់ប្រសិទ្ធភាព ការងារអភិវឌ្ឍ និងគណនេយ្យភាពសេវាសាធារណៈរបស់រដ្ឋបាលមូលដ្ឋាន។

ម្យ៉ាងទៀត សម្តេចបន្តថា ការកែទម្រង់ប្រព័ន្ធគ្រប់គ្រងតាមបែមវិមជ្ឈការ និងវិសហមជ្ឈការជាបញ្ហាស្នូលសម្រាប់ការអភិវឌ្ឍន៍នៅថ្នាក់មូលដ្ឋាន ដែលតម្រូវឲ្យថ្នាក់ដឹកនាំក្រសួងចូលរួមសហការអនុវត្តទាំងអស់។ សម្តេចបញ្ជាក់ថា បញ្ហាប្រឈមនាំឲ្យការអភិវឌ្ឍន៍នៅថ្នាក់មូលដ្ឋានយឺត ដោយសារក្រសួងពាក់ព័ន្ធមួយចំនួន មិនបានធ្វើការពន្លឿនការងារផ្ទេរមុខងារ ធនធានតាមគោលការណ៍ដែលបានដាក់ចេញទៅថ្នាក់មូលដ្ឋាន។

ជាមួយគ្នាដែរ អគ្គនាយករង និងជាអនុប្រធានលេខាធិកាដ្ឋាន គ.ជ.អ.ប លោក ចាន់ សុធា លើកឡើងថា ការផ្ទេរមុខ និងធនធាននៅតាមបណ្តាស្ថាប័នក្រសួងនោះនៅមិនទាន់មានគ្រប់ជ្រុងជ្រោយ និងការអនុវត្តន៍មិនទាន់បានគ្របដណ្តប់នៅពាសពេញផ្ទៃប្រទេសនៅឡើយ។ ហើយថា ក្រសួងដែលកំពុងរៀបចំបញ្ជីមុខងារមានចំនួន ៧ រួមមាន ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ ក្រសួងពាណិជ្ជកម្ម ក្រសួងឧស្សាហកម្ម និងសិប្បកម្ម ក្រសួងរ៉ែ និងថាមពល ក្រសួងសាធារណៈការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ និងក្រសួងធនធានទឹក និងឧតុនិយម។ ដោយឡែក លោកបន្តថា ក្រសួងដែលបានបញ្ចប់បញ្ជីមុខងារ រួមមាន ក្រសួងអភិវឌ្ឍជនបទ ក្រសួងកសិកម្ម ក្រសួងសុខាភិបាល ក្រសួងអប់រំ យុវជន និងកីឡា ក្រសួងសង្គមកិច្ច អតីតយុទ្ធជន និងយុវជនីតិសម្បទា និងក្រសួងបរិស្ថាន។ លោកបន្តថា ក្រសួងដែលបានផ្ទេរមុខងាររួច រួមមាន ក្រសួងអភិវឌ្ឍជនបទ ក្រសួងសុខាភិបាល ក្រសួងបរិស្ថាន និងក្រសួងសង្គមកិច្ច។

តាមគម្រោង អាជ្ញាធររដ្ឋបាលថ្នាក់ជាតិគ្រោងនឹងផ្ទេរថវិកាជាង ១ពាន់លានដុល្លារ សម្រាប់ឆ្នាំ ២០១៥ ដល់ឆ្នាំ២០១៧ ទៅអាជ្ញាធរថ្នាក់ក្រោមជាតិ ដើម្បីធ្វើការអភិវឌ្ឍនៅថ្នាក់មូលដ្ឋាន ក្រោយពីរដ្ឋាភិបាលអនុម័តខាងមុខ។ សម្រាប់ឆ្នាំ ២០១៦នេះ គ.ជ.អ.ប គ្រោងនឹងចំណាយថវិកាចំនួន ៣៧៩លានដុល្លារអាមេរិក សម្រាប់ក្រសួងពាក់ព័ន្ធនានា។

គួរបញ្ជាក់ផងដែរ គ.អ.ជ.ប បានផ្តើមផ្ទេរមុខងារ និងធនធានហិរញ្ញវត្ថុមួយចំនួន ទៅឲ្យរដ្ឋបាលថ្នាក់ក្រោមជាតិ ដំបូងនៅឆ្នាំ២០១២ រហូតមក ក្នុងគោលបំណងផ្តល់សិទ្ធិអំណាច ដល់រដ្ឋបាលថ្នាក់ក្រោមជាតិក្នុងការគ្រប់គ្រង និងអភិវឌ្ឍធនធានមនុស្សនៅរដ្ឋបាលថ្នាក់ ក្រោមជាតិឲ្យកាន់តែមានសមត្ថភាពគ្រប់គ្រាន់ក្នុងការអភិវឌ្ឍនានា នៅក្នុងមូលដ្ឋានពួកគេ៕