អ្នកវិភាគ ស្នើឲ្យលោក ម៉ម ប៊ុនហេង បើកការស្រាវជ្រាវលើវិស័យសុខាភិបាល

ជាតិ

អ្នកវិភាគ ស្នើឲ្យលោក ម៉ម ប៊ុនហេង បើកការស្រាវជ្រាវលើវិស័យសុខាភិបាល

18, Jan 2016 , 5:42 pm

រូបភាព

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល

ដោយ: ថ្មីៗ

ដើម្បីកុំឲ្យប្រជាពលរដ្ឋបាត់បង់ទំនុកចិត្តលើវិស័យសុខាភិបាល និងក្នុងទិសដៅពង្រឹងក្រមសីលធម៌វិជ្ជាជីវៈគ្រូពេទ្យនោះ ក្រុមអ្នកវិភាគ បានស្នើឲ្យរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បើកការស្រាវជ្រាវលើវិស័យមួយនេះ។ ក្រុមអ្នកវិភាគទាំងនោះយល់ថា បើលោក ម៉ម ប៊ុនហេង មិនអាចដោះស្រាយបញ្ហាវិជ្ជាជីវៈគ្រូពេទ្យនេះបានទេនោះ លោកគួរពិចារណាលាលែងពីតំណែង ឬរដ្ឋាភិបាលគួរតែដូររដ្ឋមន្ត្រីសុខាភិបាលចេញ ដើម្បីកុំឲ្យប្រជាពលរដ្ឋរាប់លាននាក់មានការខ្លាចរអារ លើសេវាសុខាភិបាលទៀត។

មិនមែនជារឿងថ្មីឡើយ ដែលបញ្ហាសេវាសុខាភិបាលរងការរិះគន់ពីសំណាក់ប្រជាពលរដ្ឋទាំងអ្នកមាន និងអ្នកក្រថា «ខ្វះសីលធម៌» គិតតែពីប្រាក់ មិនខ្វល់ពីស្ថានភាពអ្នកជំងឺនោះ។ អ្នកវិភាគ មើលឃើញថា បញ្ហានេះគឺមកពីការខ្វះសមត្ថភាពរបស់ថ្នាក់ដឹកនាំក្រសួងសុខាភិបាល។ លោក សូ ចន្ថា យល់ថា លោក ម៉ម ប៊ុនហេង គួរតែបើកការស្រាវជ្រាវលើវិស័យសុខាភិបាល ដែលកំពុងរងការរិះគន់លើគ្រូពេទ្យខ្វះវិជ្ជាជីវៈនេះឲ្យបានច្បាស់លាស់ ដើម្បីឲ្យប្រជាពលរដ្ឋគ្រប់រូបអាចទទួលបានការព្យាបាល ដោយការយកចិត្តទុកដាក់ខ្ពស់ពីគ្រូពេទ្យចៀងវាងការបាត់បង់ជីវិត ដោយសារគ្មានប្រាក់បង់ថ្លៃព្យាបាលជំងឺ។

លោក សូ ចន្ថា ដែលមើលឃើញបញ្ហាសុខាភិបាលមានការធ្លាក់ចុះគុណភាពជាច្រើនឆ្នាំមកហើយនោះ បានស្នើឲ្យលោក ម៉ម ប៊ុនហេង លាលែងចេញពីតំណែងរដ្ឋមន្ត្រីក្រសួងសុខាភិបាល បើសិនជាមិនអាចដោះស្រាយបញ្ហានេះបានទេ ។

ថ្លែងប្រាប់សារព័ត៌មានថ្មីៗ អ្នកវិភាគរូបនេះ បានបញ្ជាក់ដូច្នេះថា៖«បញ្ហាសុខាភិបាលជាបញ្ហចម្បងក្នុងផ្ដល់សេវាព្យាបាលជូនទៅពលរដ្ឋជាសាធារណៈដោយយកចិត្តទុកដាក់ មិនមែនទាល់តែមានប្រាក់ទើបយកចិត្តទុកដាក់ទេ។ ដូចនេះបញ្ហាដែលប្រជាពលរដ្ឋលើកឡើងពីរិះគន់គុណភាពសុខាភិបាលថាខ្សោយវិជ្ជាជីវៈនោះលោក ម៉ម ប៊ុនហេង គួរតែធ្វើការស្រាវជ្រាវឲ្យបានច្បាស់លាស់ លើបញ្ហានេះ។ បើមិនអាចកែទម្រង់បានទេ លោក ម៉ម ប៊ុនហេង គួរតែលាលែងចេញពីតំណែង ហើយទុកឲ្យអ្នកថ្មីមានសមត្ថភាពធ្វើកិច្ចការនេះ»។

លោក មាស នី ក៏មើលឃើញបញ្ហាធ្លាក់ចុះគុណភាពសុខាភិបាលដូចលោក សូ ចន្ថា ដែរ។ អ្នកវិភាគរូបនេះ យល់ថា ការធ្លាក់ចុះគុណភាពវិស័យសុខាភិបាល ដែលធ្វើឲ្យប្រជាពលរដ្ឋបាត់បង់ទំនុកចិត្ត និងខ្លាចរអានេះ ក៏ជាដើមចមដែលធ្វើឲ្យគណបក្សប្រជាជនធ្លាក់ប្រជាប្រិយភាពដែរ។ លោក ថា វិស័យសុខាភិបាលគ្មានរីកចម្រើនអ្វីសោះ ក្រោមការគ្រប់គ្រងរបស់លោក ម៉ម ប៊ុនហេង កន្លងមកនេះ មានតែបញ្ហាជាបន្តបន្ទាប់ ដែលធ្វើឲ្យធ្លាក់ចុះគុណភាពសេវាសុខាភិបាលទៅវិញ ។

លោក មាស នី ដែលធ្លាប់ជួបបញ្ហាសេវាសុខាភិបាល ផ្ទាល់ដែរនោះស្នើឲ្យរដ្ឋាភិបាលដកលោក ម៉ម ប៊ុនហេង ចេញពីតំណែង ហើយដាក់អ្នកមានសមត្ថភាពធ្វើការកែទម្រង់វិស័យសុខាភិបាលនេះ ឲ្យមានភាពប្រសើរឡើងវិញ ដើម្បីដោះស្រាយបញ្ហាប្រជាពលរដ្ឋរាប់លាននាក់ ដែលកំពុងភ័យខ្លាចលើសេវាសុខាភិបាលបច្ចុប្បន្ននេះ។

លោក មាស នី បញ្ជាក់ថា៖«លោក ម៉ម ប៊ុនហេង គួរតែលាលែងពីតំណែងទៅ ព្រោះគាត់អសមត្ថភាពដោះស្រាយបញ្ហាជូនពលរដ្ឋ ដូចជាការឆ្លងជំងឺអេដស៍នៅភូមិរកា អ្នកស្លាប់ដោយខ្វះការយកចិត្តទុកដាក់ពីគ្រូពេទ្យ ព្រោះគ្មានប្រាក់ព្យាបាល និងអាកប្បកិរិយាគំរោះគំរើយរបស់គ្រូពេទ្ យដែលពលរដ្ឋរិះគន់កន្លងមក ក៏មិនអើពើរដោះស្រាយមិនទទួលខុសត្រូវ ហើយបែរចេញមកប្រកែកជានិច្ច។ រដ្ឋាភិបាលគួរដូរអ្នកថ្មីជំនួសគាត់ទៅ ហើយជ្រើសអ្នកដែលមានសមត្ថភាព ហ៊ានទទួលខុសត្រូវព្រោះសេវាសុខាភិបាល គឺជារឿងសំខាន់ណាស់សម្រាប់ពលរដ្ឋ»។

គួរបញ្ជាក់ថា កាលពីពេលថ្មីៗនេះ លោកវេជ្ជបណ្ឌិត គួច ម៉េងលី បានរិះគន់សេវាសុខាភិបាលនិងគ្រូពេទ្យមួយចំនួនថា «ខ្វះសីលធម៌» ដែលត្រូវបានគណៈវិជ្ជាជីវៈសុខាភិបាលកម្ពុជាបានទាមទារឲ្យលោកវេជ្ជបណ្ឌិត គួច ម៉េងលី សុំទោសជាសាធារណៈចំពោះការអត្ថាធិប្បាយរិះគន់របស់លោកនេះ។ ប៉ុន្ដែលោក គួច ម៉េងលី បដិសេធមិនសុំទោសគណៈវិជ្ជាជីវៈសុខាភិបាលឡើយ៕