កីឡាអន្តរជាតិ
អន្តរជាតិ
×![]()
ដោយ: តន ចាន់រិទ្ធារ៉ា
កីឡាករ Javier Mascherano ត្រូវបានតុលាការអេស្ប៉ាញដាក់ទោសជាប់គុករយៈពេល១២ខែ ដោយសារតែគេចវេសមិនបង់ពន្ធឲ្យបានត្រឹមត្រូវ។ យ៉ាងណាក្ដីកីឡាកររូបនេះអាចនឹងបង់ប្រាក់ជំនួសឲ្យការជាប់ទោសនេះ។ នេះបើយោងតាមសារព័ត៌មាន The Guardian។
Javier Mascherano ខ្សែបម្រើក្លិបអ្នកមានបុណ្យ Barcelona ត្រូវបានតុលាការកាត់ទោសជាប់គុក១២ខែ ពីព្រោះរូបគេគេចវេសមិនបង់ពន្ធក្នុងប្រទេសអេស្ប៉ាញ។ ជាមួយគ្នានោះ កីឡាករ Mascherano ក៏ត្រូវបានពិន័យទឹកប្រាក់៨សែនអឺរ៉ូនិងហាមមិនឲ្យទទួលប្រាក់ចំណេញពីការបង់ពន្ធរយៈពេលមួយឆ្នាំផងដែរ។
យ៉ាងណាមិញ កីឡាករសញ្ជាតិអាហ្សង់ទីនរូបនេះប្រហែលជាមិនអនុវត្តទោសជាប់គុកនោះទេ។ បើតាមច្បាប់របស់អេស្ប៉ាញ ជនណាដែលទទួលទោសជាប់គុក១២ខែ អាចមិនអនុវត្តទោសបាន ប្រសិននោះមិនមែនជាទោសឧក្រិដ្ឋទេ។ តែកីឡាករ Mascherano អាចនឹងជាប់ទោសដដែល បើហ៊ានមានកំហុសបែបនេះម្ដងទៀត។
ការិយាល័យពន្ធដាររបស់អេស្ប៉ាញបានចោទប្រកាន់កីឡាកររូបនេះថា លាក់បាំងប្រាក់ចំណេញដែលរកបានពីការលក់សិទ្ធិលើរូបភាព។ ហើយការកាត់ទោសនេះទៀតសោត គឺមានរយៈពេលជិតបីខែ ក្រោយខ្សែបម្រើរូបនេះបានបង់ប្រាក់ប្រហែល១.៥លានអឺរ៉ូ ដែលជំពាក់មិនបង់ពន្ធក្នុងចន្លោះឆ្នាំ២០១១ដល់ឆ្នាំ២០១២។
ក្រោយការកាត់ក្ដីនៅថ្ងៃព្រហស្បតិ៍ម្សិលមិញ កីឡាករវ័យ៣១ឆ្នាំរូបនេះបានសរសេរនៅទំព័រ Twitter របស់ខ្លួនថា លោកគ្រាន់តែជាកីឡាករបាល់ទាត់អាជីពប៉ុណ្ណោះ ហើយមិនសូវយល់ពីរឿងច្បាប់អ្វីនោះដែរ។ រូបគេត្រូវពឹងផ្អែកលើមនុស្សដទៃចំពោះរឿងនេះ៕
Tag:
Mascherano
© រក្សាសិទ្ធិដោយ thmeythmey.com
