វៀតណាម៖ក្រៅពីតំណែងអគ្គលេខាធិការបក្ស តំណែងសំខាន់បីទៀតនឹងត្រូវផ្លាស់ប្ដូរ

អន្តរជាតិ

វៀតណាម៖ក្រៅពីតំណែងអគ្គលេខាធិការបក្ស តំណែងសំខាន់បីទៀតនឹងត្រូវផ្លាស់ប្ដូរ

26, Jan 2016 , 2:51 pm

រូបភាព

ដោយ: តន ចាន់រិទ្ធារ៉ា

គណៈកម្មាធិការមជ្ឈិមបក្សកុម្មុនីស្តវៀតណាមបានសម្រេចឲ្យលោក ង្វៀន ភូជុង ឈរជាបេក្ខជនសម្រាប់បន្តតំណែងជាអគ្គលេខាធិការបក្សរបស់លោកបន្តទៀត ជាមួយនឹងការសម្រេចផ្លាស់ប្ដូរតួនាទីសំខាន់ៗមួយចំនួនសម្រាប់ការដឹកនាំវៀតណាមក្នុងរយៈពេល៥ឆ្នាំទៅមុខ។ នេះបើយោងតាមសារព័ត៌មានក្នុងស្រុកវៀតណាម។

នៅសល់មិនប៉ុន្មានថ្ងៃទៀតទេ សមាជលើកទី១២បក្សកុម្មុយនីស្តវៀតណាមនឹងត្រូវបិទបញ្ចប់ ហើយបេក្ខភាពសម្រាប់តំណែងសំខាន់ៗក្នុងថ្នាក់ដឹកនាំបក្សក៏ត្រូវបានបង្ហាញផងដែរ។ ក្នុងនោះតំណែងអគ្គលេខាធិការបក្សអាចនឹងរក្សាដដែល ពីព្រោះលោក ង្វៀន ភូជុង ត្រូវបានគណៈកម្មាធិការមជ្ឈិមបក្សកុម្មុយនីស្តឯកភាពឲ្យឈរជាបេក្ខជនសម្រាប់តំណែងកំពូលនេះដដែល និងរង់ចាំការអនុម័តពីសមាជតែប៉ុណ្ណោះ។

ក្រៅពីតំណែងលេខាបក្សលោក ង្វៀន ភូជុង ដែលអាចនឹងបន្ត តំណែងសំខាន់ៗចំនួនបីទៀតរបស់រចនាសម្ព័ន្ធគ្រប់គ្រងរបស់វៀតណាមនឹងត្រូវដាក់ជំនួសដោយបេក្ខជនថ្មី ។ ក្នុងកិច្ចប្រជុំរបស់ខ្លួន គណៈកម្មាធិការមជ្ឈិមបក្សវៀតណាមបានដាក់ឧបនាយករដ្ឋមន្ត្រីបច្ចុប្បន្នលោក Nguyen Xuan Phuc ជាបេក្ខជននាយករដ្ឋមន្ត្រីជំនួសលោក ង្វៀន តាន់ហ្ស៊ុង។ ចំណែកឯបេក្ខជនសម្រាប់ប្រធានាធិបតីថ្មីគឺរដ្ឋមន្ត្រីក្រសួងសន្តិសុខសារធាណៈលោក Tran Dai Quang ខណៈអនុប្រធានសភាលោកស្រី Nguyen Thi Kim Ngan គឺជាបេក្ខជនសម្រាប់តំណែងប្រធានសភា។

សមាសភាពខាងលើនេះត្រូវបានបញ្ជាក់ដោយលោក Vu Trong Kim សមាជិកគណៈកម្មាធិការមជ្ឈិមបក្សក្នុងកិច្ចសម្ភាសជាមួយសារព័ត៌មានក្នុងស្រុកវៀតណាម។ មួយវិញទៀត បេក្ខជនសម្រាប់តំណែងសំខាន់ៗខាងលើ នឹងត្រូវដាក់ឲ្យសមាជបក្សបោះឆ្នោតសម្រេចជាចុងក្រោយ មុននឹងចាប់ផ្ដើមអាណត្តិការងារប្រាំឆ្នាំរបស់ខ្លួន។ សមាជិកបក្សកុម្មុយនីស្តចំនួន១៥១០នាក់ ដែលចូលរួមប្រជុំសមាជលើកទី១២ នឹងសម្រេចលើការងារនេះមុននឹងបិទសម័យប្រជុំនៅថ្ងៃទី២៨ ខែមករា។

ចំណែកឯនាយករដ្ឋមន្ត្រីបច្ចុប្បន្នលោក ង្វៀន តាន់ហ្ស៊ុង ត្រូវគេមើលឃើញថា ដូចជាអស់ឱកាសប្រជែងតំណែងអគ្គលេខាធិការបក្សជាមួយលោក ង្វៀន ភូជុងទៅហើយ។ នេះមានន័យថា លោក ង្វៀន តាន់ហ្ស៊ុង អាចនឹងមិនមានតំណែងអ្វីទាំងអស់ នៅពេលសមាជបញ្ចប់។ តែបើតាមលោក Vu Ngoc Hoang ជាអនុប្រធានគណៈឃោសនាមជ្ឈិមបក្សវៀតណាម លោក ង្វៀន តាន់ហ្ស៊ុង ត្រូវបានជ្រើសរើសជាសមាជិកគណៈកម្មាធិការមជ្ឈិមបក្សអាណត្តិទី១២។

សូមបញ្ជាក់ថា សមាជបក្សកុម្មុយនីស្តលើកទី១២នឹងអនុម័តលើសមាសភាពបេក្ខជនថ្នាក់ដឹកនាំទាំងអស់នៅថ្ងៃទី២៨ ខែមករា។ ហើយតំណែងអគ្គលេខាធិការដែលជ្រើសរើសក៏នឹងត្រូវប្រកាសនៅថ្ងៃដដែលនោះផងដែរ។ លើសពីនេះ រាល់ការបោះឆ្នោត ក៏ដូចជាការសម្រេចចិត្តនានានឹងធ្វើឡើងជាសម្ងាត់និងបិទទ្វារ៕