ជាតិ
នយោបាយជាតិ
លោក ញឹក ប៊ុនឆៃ ស្នើឲ្យទ្រង់ រណឫទ្ធិ ធ្វើសិក្ខាសាលាពិភាក្សាដើម្បីបញ្ចប់ការចោទប្រកាន់គ្នា
× ភាពល្អក់កករគ្នារវាងប្រធាន និងអនុប្រធានគណបក្ស ហ្វ៊ុនស៊ិនប៉ិច កំពុងតែបង្ហាញពីភាពរង្គោះរង្គើផ្ទៃក្នុងរបស់បក្សរាជានិយមដែលធ្លាក់ប្រជាប្រិយភាព និងធ្លាប់បែកបាក់គ្នាជាច្រើនលើកមកហើយនោះ។
ក្រោយពីឆ្លើយតបនឹងការចោទប្រកាន់របស់របស់សម្តេចក្រុមព្រះថា ខ្លួនមិនមានចេតនាបះបោរ ឬប្រឆាំងទ្រង់ រណឫទ្ធិ រួចមក លោក ញឹក ប៊ុនឆៃ អនុប្រធានគណបក្សហ្វ៊ុនស៊ិនប៉ិច បានអះអាងថា លោកបានស្នើឲ្យប្រធានគណបក្ស ព្រះអង្គម្ចាស់ នរោត្តម រណឫទ្ធិ ធ្វើសិក្ខាសាលាមួយ ដោយបើកឲ្យមានការពិភាក្សាដោយសេរី ដើម្បីប្រមូលទិន្នន័យទាំងអស់ បញ្ចប់មន្ទិលសសង្ស័យ និងការចោទប្រកាន់គ្នាទៅវិញទៅមក។ លោកថា សិក្ខាសាលានេះ ក៏បញ្ជាក់ពីការគិតគូរចំពោះអនាគតគណបក្សហ្វ៊ុនស៊ិនប៉ិច ដែលជាស្នាមព្រះហស្ថ និងជាប្រវត្តិសាស្ត្រនៃព្រះបរមរតនកោដ្ឋដែរ។ នេះបើតាមលិខិតបំភ្លឺរបស់លោក ញឹក ប៊ុនឆៃ កាលពីថ្ងៃទី ២៦ ខែមករា។
ក្នុងលិខិតដដែលនោះ លោក ញឹក ប៊ុនឆៃ បញ្ជាក់ថា បំណងរបស់ខ្លួនបែបនេះ ស្របតាមឆន្ទៈដ៏លើសលុបរបស់អ្នករាជានិយម ដែលទាមទារធ្វើសិក្ខាសាលានេះ តែលោកថា មកដល់ពេលនេះ លោកនៅតែមិនទាន់ទទួលចម្លើយពីសម្តេចក្រុមព្រះនោះទេ។ ជាមួយគ្នាលោក ញឹក ប៊ុនឆៃ ក៏បញ្ជាក់ពីគោលជំហរបែបនេះថា៖«គ្មានហេតុផលណាមួយ ដែលត្រូវធ្វើឲ្យបែកបាក់គណបក្សហ្វ៊ុនស៊ិនប៉ិច ដែលលោកក៏ជាអ្នកផ្តួចផ្តើមកវែកកឆ្នាំងពីដំបូងទី ហើយដែលខ្ញុំកំពុងស្ថិតនៅរួមជាមួយនោះផងដែរ។ ហ្វ៊ុនស៊ិនប៉ិចជាផ្ទះរបស់ខ្ញុំ»។
កាលពីពេលកន្លងទៅលោក ញឹក ប៊ុនឆៃ ធ្លាប់អះអាងប្រាប់សារព័ត៌មានថ្មីៗថា គណបក្សហ៊្វុនស៊ិនប៉ិចក្រោមការដឹកនាំរបស់សម្តេចក្រុមព្រះ ជាង ១ ឆ្នាំ មកនេះ គណបក្សនេះ មិនកើនប្រជាប្រិយភាពឡើយ ផ្ទុយទៅវិញមានតែធ្លាក់ចុះប្រជាប្រិយភាពថែម។ លោកថា បន្ទាប់ពីលោកយាងសម្តេចក្រុមព្រះមកធ្វើជាប្រធានបក្សឡើងវិញ មន្រ្តីចាស់បក្សនេះមួយចំនួន បានបាត់បង់តួនាទី ដែលធ្វើឲ្យសមាជិកបក្សខ្លះដើរចេញ៕
Tag:
ញឹក ប៊ុនឆៃ
សម្តេចក្រុមព្រះ
ហ្វ៊ុនស៊ិនប៉ិច
© រក្សាសិទ្ធិដោយ thmeythmey.com