អន្តរជាតិ
នយោបាយអន្តរជាតិ
ប្រធានាធិបតីជិតផុតអាណត្តិតៃវ៉ាន់ត្រៀមទៅកោះជម្លោះនៅសមុទ្រចិនខាងត្បូង
× ប្រធានាធិបតីជិតផុតអាណត្តិតៃវ៉ាន់ Ma Ying- jeou នឹងទៅទស្សនកិច្ចនៅកោះ Itu Aba ដែលស្ថិតនៅតំបន់ជម្លោះសមុទ្រចិនខាងត្បូងនៅថ្ងៃព្រហស្បតិ៍ ទី ២៨ មករា ស្អែកនេះ។ តៃវ៉ាន់បានទាមទារយកកោះនេះព្រោះខ្លួនបានកាន់កាប់កោះនេះតាំងពីឆ្នាំ ១៩៥៦មកម្ល៉េះ។ នេះបើយោងតាមទីភ្នាក់ងារព័ត៌មាន Reuters ។
លោក មុំ ពិទូរ្យ លម្អិតព័ត៌មាននេះ
នៅថ្ងៃព្រហស្បតិ៍ ស្អែកនេះប្រធានាធិបតីតៃវ៉ាន់ជិតផុតអាណត្តិលោក Ma Ying- jeou នឹងទៅទស្សនកិច្ចកោះ Itu Aba (ភាសាតៃវ៉ាន់កោះTaiping) ដែលជាផ្នែកមួយនៃប្រជុំកោះស្ព្រាត់លីស្ថិតក្នុងជម្លោះសមុទ្រចិនខាងត្បូង។ ការិយាល័យប្រធានាធិបតីបានបញ្ជាក់ថា លោក Ma នឹងទៅកោះខាងលើនៅថ្ងៃស្អែក ក្នុងករណីដែលអាកាធាតុអំណោយផលល្អ។ ប៉ុន្តែប្រធានាធិបតីដែលទើបជាប់ឆ្នោតលោកស្រី Tsai Ing-wen បានប្រកាសហើយថា លោកស្រីនឹងមិនបញ្ជូនអ្នកតំណាងរបស់ខ្លួនទៅចូលរួមក្នុងដំណើរទស្សនកិច្ចនេះទេ។
ប្រធានាធិបតីជិតផុតអាណត្តិលោក Ma ធ្លាប់ប្រកាសកាលពីឆ្នាំមុនថាលោក អាចទៅទស្សនកិច្ចនៅកោះ Itu Aba ចុងឆ្នាំ២០១៥ ប៉ុន្តែក្រោយមកស្រាប់តែផ្លាស់ប្តូរពេលវេលាដោយសារលោកត្រូវជួបជាមួយប្រធានាធិបតីចិន លោក ស៊ី ជិនពីង។ ទាក់ទិនការទាមទារកោះនេះ ប្រធានាធិបតីតៃវ៉ាន់បានចេញគំនិតផ្តួចផ្តើមសន្តិភាពមួយដោយស្នើឲ្យបណ្តាភាគីជម្លោះសមុទ្រចិនខាងត្បូងចូលរួមអភិវឌ្ឍធនធានដែលមានក្នុងតំបន់ជម្លោះជាមួយគ្នា និងទុកការទាមទារផ្សេងៗគ្នានេះនៅដោយឡែក។
តៃវ៉ាន់នៅបន្តចាត់ទុកកោះ Itu Aba ជាផ្នែកមួយរបស់ខ្លួន ហើយកងទ័ពតៃវ៉ាន់បានកាន់កាប់កោះនេះតាំងពីឆ្នាំ ១៩៥៦មកម្ល៉េះ នៅពេលកងទ័ពចិនចាប់ផ្តើមសកម្មភាពយោធានៅលើប្រជុំកោះស្ព្រាត់លី។ ប៉ុន្តែនៅក្នុងឆ្នាំ ១៩៩៩ តៃវ៉ាន់ចាប់ផ្តើមប្តូរកងទ័ពដែលបញ្ឈរជើងនៅលើកោះដោយប្រើប្រាស់ឆ្មាំការពារសមុទ្រឲ្យល្បាតនៅកោះជំនួសវិញ។ នៅក្នុងឆ្នាំ ២០១២ រដ្ឋាភិបាលតៃវ៉ាន់បានដាក់ចេញគម្រោងអភិវឌ្ឍន៍មួយនៅលើកោះដែលមានទំហំទឹកប្រាក់ប្រហែល ១១០លានដុល្លារអាមេរិក។
ប៉ុន្តែកោះដែលតៃវ៉ាន់ទាមទារថាជារបស់ខ្លួននេះ ក៏ត្រូវចិន ហ្វីលីពីន និងវៀតណាមទាមទារដូចគ្នាដែរ។ ដូច្នេះការទស្សនកិច្ចរបស់ប្រធានាធិបតីតៃវ៉ាន់នឹងធ្វើឲ្យបណ្តាប្រទេសទាំងបីខាងលើអាចខឹងសម្បារនិងប្រតិកម្មតបខ្លាំងផងដែរក៏មិនដឹង។
ប៉ុន្តែលោក Ma នឹងចុះចេញពីតំណែងនៅក្នុងខែឧសភាខាងមុខ ដោយទុកកៅអីឲ្យប្រធានាធិបតីថ្មីមកពីបក្សប្រជាធិបតេយ្យជឿនលឿនគ្រប់គ្រងវិញម្តង។ បើតាមគោលជំហររបស់ប្រធានាធិបតីថ្មី ដោយមិនបញ្ជូនតំណាងរបស់ខ្លួនចូលរួមក្នុងដំណើរទស្សនកិច្ចកោះជម្លោះនេះ បានបង្ហាញច្បាស់ថា រដ្ឋាភិបាលនេះ មិនចង់ឃើញសកម្មភាពបង្កឲ្យមានភាពតានតឹងកើតឡើងឡើយ។
Tag:
សមុទ្រចិនខាងត្បូង
តៃវ៉ាន់
© រក្សាសិទ្ធិដោយ thmeythmey.com