អេរីត្រេ ចេញច្បាប់ឲ្យបុរសត្រូវរៀបការភរិយាយ៉ាងតិចពីរនាក់ បើមិនចង់ជាប់គុកមួយជីវិត

អន្តរជាតិ

អេរីត្រេ ចេញច្បាប់ឲ្យបុរសត្រូវរៀបការភរិយាយ៉ាងតិចពីរនាក់ បើមិនចង់ជាប់គុកមួយជីវិត

27, Jan 2016 , 5:24 pm

រូបភាព

ដោយ:

អេរីត្រេ (ERITREA) ដែលជាប្រទេសមួយក្នុងតំបន់អាហ្វ្រិក បានអនុម័តច្បាប់ថ្មីមួយដែលតម្រូវឲ្យបុរសម្នាក់ត្រូវតែរៀបការជាមួយនឹងស្ត្រីយ៉ាងហោចណាស់ពីរនាក់ឡើងទៅ។ នេះ គឺជាគោលនយោបាយថ្មីមួយរបស់រដ្ឋាភិបាលផ្តាច់ការអេរីត្រេដើម្បីលើកកម្ពស់ចំនួននៃអ្នកមានគ្រួសាររវាងបុរស និងស្ត្រី។

សូមស្តាប់សំឡេង

យោងតាមក្រឹត្យថ្មីនៃរដ្ឋាភិបាលអេរីត្រេដែលទើបតែចុះផ្សាយជាសាធារណៈកាលពីថ្ងៃទី២៦ ខែមករា ម្សិលមិញ បុរសអេរីត្រេ កំពុងតែរងនូវគំរាមកំហែងតាមរយៈគោលនយោបាយថ្មី ដោយត្រូវតម្រូវឲ្យរៀបការជាមួយនឹងស្ត្រីយ៉ាងហោចណាស់ពីរនាក់។ បើបុរសណាមួយ មិនអនុវត្តដូចទៅនឹងបទបញ្ញត្តិនៃច្បាប់នោះ នឹងត្រូវប្រឈមនឹងទោសពន្ធនាគាររយៈមួយជីវិត។

បើតាមក្រឹត្យដដែលរបស់រដ្ឋាភិបាលអេរីត្រេ ការចេញគោលនយោបាយថ្មីនោះ ក៏ព្រោះតែអេរីត្រេ កំពុងប្រឈមនឹងការខ្វះបុរសនៅក្នុងសង្គមដ្បិតបុរសជាច្រើននាក់បានបាត់បង់ជីវិតក្នុងអំឡុងសង្គ្រាម ហើយអាត្រានៃស្ត្រីដែលមិនបានរៀបការក៏មានច្រើនផងដែរ។ ដូច្នេះរដ្ឋាភិបាល ត្រូវតែចេញច្បាប់ដើម្បីដាក់កំហិតទៅលើបុរសឲ្យយកប្រពន្ធយ៉ាងតិចក៏ពីរនាក់ដែរ។

អ្វីគួរកត់សម្គាល់នោះ ចំពោះស្ត្រីណាមួយដែលការពារ ឬហាមប្តីរបស់ខ្លួនមិនឲ្យរៀបការជាមួយនឹងស្ត្រីផ្សេងទៀតនោះ ក៏ត្រូវប្រឈមនឹងទោសពន្ធនាគារមួយជីវិតផងដែរ។

សូមបញ្ជាក់ផងដែរថាអេរីត្រេ បានឆ្លងកាត់សង្គ្រាមចន្លោះឆ្នាំ១៩៩៨-២០០០ ដោយប្រយុទ្ធប្រឆាំងជាមួយនឹងអេត្យូពី។ យ៉ាងហោចណាស់មានទាហានទាំងសងខាងប្រមាណជាងដប់ប្រាំម៉ឺននាក់ បានស្លាប់។ ការបាត់បង់នេះ ពិតប៉ះពាល់យ៉ាងខ្លាំងដល់ចំនួនប្រជាជនរបស់អេរីត្រេ ដែលមានប្រជាជនសរុបត្រឹម៤លាននាក់តែប៉ុណ្ណោះ៕