អន្តរជាតិ
មីយ៉ាន់ម៉ាត្រៀមសង់អាកាសយាន្តដ្ឋានអន្តរជាតិធំបំផុតក្នុងប្រទេស
× នាយកដ្ឋានអាកាសចរណ៍ស៊ីវិលមីយ៉ាន់ម៉ានបានចុះហត្ថលេខាកិច្ចព្រមព្រៀងជាមួយក្រុមហ៊ុនសឹង្ហបុរីនិងជប៉ុនដើម្បីសាងសង់ព្រលានយន្តហោះអន្តរជាតិ Hanthawaddy ធំជាងគេបង្អស់នៅមីយ៉ាន់ម៉ា។ គម្រោងនឹងត្រូវចំណាយអស់ ១.៥ពាន់លានដុល្លារអាមេរិក ហើយការសាងសង់នឹងត្រូវបញ្ចប់នៅត្រឹមឆ្នាំ២០២២ ។ នេះបើតាមសារព័ត៌មាន Channel News Asia។
នាយកដ្ឋានអាកាសចរណ៍ស៊ីវិលមីយ៉ាន់ម៉ា បានសម្រេចចុះហត្ថលេខាលើកិច្ចព្រមព្រៀងក្របខណ្ឌមួយជាមួយតំណាងក្រុមហ៊ុនអន្តរជាតិ ដើម្បីឈានទៅត្រួសត្រាយផ្លូវឲ្យមានការសង់អាកាសយន្តដ្ឋានអន្តរជាតិ Hanthawaddy ។ ក្រុមហ៊ុនបរទេសដែលសុំសិទ្ធិសង់អាកាសយាន្តដ្ឋាននេះ មានជប៉ុន (JGC Corporation) ដែលមានភាគហ៊ុនច្រើនជាងគេរហូត៥៥ភាគរយ និងបន្ទាប់មកមានក្រុមហ៊ុនសង្ហបុរីមាន (Changi Airports International) និងក្រុមហ៊ុន YHL។
យោងតាមគម្រោងបឋម អាកាសយាន្តដ្ឋានអន្តរជាតិ Hanthawaddy នឹងត្រូវសង់ឡើងលើផ្ទៃដី៣៦៤២ហិកតា ស្ថិតនៅចម្ងាយប្រហែល ៨០គីឡូម៉ែត្រភាគខាងជើងអតីតរដ្ឋធានីយ៉ង់ហ្គូន។ ព្រលានយន្តហោះនេះនឹងអាចទទួលអ្នកដំណើរបាន ១២លាននាក់ ហើយវាក៏នឹងក្លាយជាច្រកអន្តរជាតិសំខាន់បំផុតសម្រាប់មីយ៉ាន់ម៉ា។
ក្រោយការចុះកិច្ចព្រមព្រៀងក្របខណ្ឌ ការចរចានិងពិភាក្សាគ្នានឹងត្រូវធ្វើបន្តទៀត។ ហើយបន្ទាប់មក កិច្ចព្រមព្រៀងសម្បទានមួយទៀតនឹងត្រូវបង្កើតឡើងរវាងក្រុមហ៊ុនឯកជនខាងលើ និងរដ្ឋាភិបាលមីយ៉ាន់ម៉ានៅត្រីមាសទីបីឆ្នាំ ២០១៦ខាងមុខ។ កិច្ចព្រមព្រៀងនេះនឹងផ្តល់សិទ្ធិឲ្យក្រុមហ៊ុនអន្តរជាតិទាំងនេះចាប់ផ្តើមគម្រោងសាងសង់របស់ខ្លួនជាផ្លូវការ។
បើតាមសេចក្តីប្រកាសព័ត៌មាន គម្រោងសាងសង់អាកាសយាន្តដ្ឋានដែលមានការសហការពីក្រុមហ៊ុនឯកជននិងរដ្ឋនេះ នឹងត្រូវចំណាយលុយអស់ប្រហែល ១.៥ពាន់លានដុល្លារអាមេរិក ហើយគម្រោងនឹងចប់សព្វគ្រប់នៅឆ្នាំ ២០២២ ខាងមុខ។ គម្រោងនេះនឹងត្រូវអនុវត្តស្ថិតក្រោមការគាំទ្រនៃជំនួយអភិវឌ្ឍន៍ផ្តល់ដល់រដ្ឋាភិបាលជប៉ុន៕
© រក្សាសិទ្ធិដោយ thmeythmey.com