លោក ប្រាយុទ្ធ បញ្ជាក់ជាថ្មី ថា ការបោះឆ្នោតត្រូវតែប្រព្រឹត្តនៅឆ្នាំ២០១៧ជាកំហិត

អន្តរជាតិ

លោក ប្រាយុទ្ធ បញ្ជាក់ជាថ្មី ថា ការបោះឆ្នោតត្រូវតែប្រព្រឹត្តនៅឆ្នាំ២០១៧ជាកំហិត

02, Feb 2016 , 8:59 pm

រូបភាព

ដោយ:

បើទោះបីជាសេចក្តីព្រាងរដ្ឋធម្មនុញ្ញថ្មី កំពុងតែស្ថិតក្នុងនីតិនៃការស្ទង់មតិពីរដ្ឋាភិបាល និងប្រជាជន ក៏ដោយ ការព្រួយបារម្ភពីបរាជ័យនៃការធ្វើរដ្ឋធម្មនុញ្ញនេះនឹងបើកផ្លូវឲ្យរបបសឹកបន្តកាន់អំណាច នៅតែ បន្តលើកឡើង។ តែយ៉ាងណាក៏ដោយ លោកនាយករដ្ឋមន្ត្រីប្រាយុទ្ធ ច័ន្ទអូចា បានថ្លែងញ្ជាក់ជាថ្មីម្តងទៀតថា ការបោះឆ្នោត នឹងត្រូវប្រព្រឹត្តឡើងនៅឆ្នាំ២០១៧ជាកំហិត។

ឆ្លើយតបនឹងសំណួររបស់អ្នកសារព័ត៌មានពីកាលបរិច្ឆេទនៃការបោះឆ្នោត ម្សិលមិញ លោកនាយករដ្ឋមន្ត្រីរដ្ឋប្រហារយោធាប្រាយុទ្ធ ចាន់អូចា (Prayuth Chan-o-Cha) បានបញ្ជាក់ជាថ្មីម្តងទៀតថា « គឺឆ្នាំ២០១៧ ២០១៧ ដែលការបោះឆ្នោតនឹងត្រូវរៀបចំឡើង»។ ការអះអាងបែបនេះ ធ្វើឡើងដើម្បីបញ្ជាក់ ពីគោលជំហររបស់រដ្ឋាភិបាលយោធាបន្ទាប់ពីមានការរិះគន់ជាច្រើនលើសេចក្តីព្រាងរដ្ឋធម្មនុញ្ញថ្មីដែលទើបតែចុះផ្សាយកាលពីសបា្តហ៍មុន។

សូមបញ្ជាក់ផងដែរថា ក្រោយឡើងតំណែងជារដ្ឋាភិបាលថៃតាមរយៈរដ្ឋប្រហារថ្ងៃទី២២ ខែឧសភា ឆ្នាំ២០១៤ លោកឧត្តមសេនីយ៍ប្រាយុទ្ធ ចាន់អូចា បានសន្យាការកែទម្រង់ និងនាំមកវិញនូវលទ្ធិប្រជាធិបតេយ្យ។ ក្នុងនោះ ការធ្វើរដ្ឋធម្មនុញ្ញថ្មី គឺជាផែនការមួយនៃការកែទម្រង់របស់លោកប្រាយុទ្ធ ដើម្បីជា ការដោះស្រាយ និងការពារការជាប់គាំងនៃវិបត្តិនយោបាយថៃឡើងវិញ និងជាការបើកផ្លូវមួយសម្រាប់ ការបោះឆ្នោតជ្រើសរើសមេដឹកនាំថ្មីនៅឆ្នាំ២០១៧ផងដែរ។

កាលពីថ្ងៃទី២៩ ខែមករា កន្លងទៅ គណៈកម្មាធិការព្រាងរដ្ឋធម្មនុញ្ញថៃ បានបោះពុម្ភផ្សាយសេចក្តី ព្រាងរដ្ឋធម្មនុញ្ញថៃជាសាធារណៈ និងរង់ចាំអនុសាសន៍ពីរដ្ឋាភិបាលយោធាដែលនឹងត្រូវលើកទៅ ពិភាក្សានៅថ្ងៃនេះដើម្បីកែតម្រូវដើម្បីឈាន ទៅរកការធ្វើស្ទង់មតិជារួមពីប្រជាជនតាមរយៈការធ្វើ ប្រជាមតិនៅខែកក្កដាខាងមុខ។

បើទោះបីជាសេចក្តីព្រាងរដ្ឋធម្មនុញ្ញនេះគឺជាសេចក្តីព្រាងលើកទី២ ដែលត្រូវបានឡើងក្នុងរបបសឹក ក៏ដោយ គេនៅមិនទាន់អាចធានាថារាល់ភាគីពាក់ព័ន្ធនឹងទទួលយកសេចក្តីព្រាងរដ្ឋធម្មនុញ្ញនេះបាន ដែរ។ កន្លងមកលោក Meechai Ruchupan ប្រធានគណៈកម្មាធិការព្រាងរដ្ឋធម្មនុញ្ញថៃ បានអះអាង ថាបទបញ្ញត្តិជាច្រើន ដែលជាគោលការណ៍នៃការរួបរួមជាតិត្រូវបានដាក់បញ្ចូលក្នុងសេចក្តីព្រាងនោះតែលោកថា លោកមិនធានាថាសេចក្តីព្រាងច្បាប់នេះ អាចទទួលបានការគាំទ្រពីសំណាក់ប្រជាជន និងអ្នកនយោបាយថៃទាំងអស់ និងអាចដោះស្រាយទៅបញ្ហានយោបាយថៃបច្ចុប្បន្នបាននោះទេ។

ការធ្វើរដ្ឋធម្មនុញ្ញថៃថ្មី ពិតជាសំខាន់ណាស់សម្រាប់ការឈានទៅរកការបោះឆ្នោតឆ្នាំ ២០១៧ ពោលគឺ ទាល់តែការធ្វើរដ្ឋធម្មនុញ្ញប្រព្រឹត្តទៅដោយជោគជ័យទើបការបោះឆ្នោតអាចប្រព្រឹត្ត ទៅបាន។ តែកាលពីថ្ងៃទី២៦ ខែមករាកន្លងទៅថ្មីៗនេះ លោកនាយករដ្ឋមន្ត្រីថៃប្រាយុទ្ធ ច័ន្ទអូចា បានប្រកាសជាថ្មីថា ការបោះឆ្នោតសកល នឹងត្រូវធ្វើឡើងនៅឆ្នាំ២០១៧ជាដាច់ខាត បើទោះបីជារដ្ឋធម្មនុញ្ញ មិនអាចឆ្លងផុតពីដំណាក់ការនៃការធ្វើប្រជាមតិក៏ដោយ ។ ការអះអាងបែបនេះ ធ្វើឡើងបន្ទាប់ពីមានសម្តែងការព្រួយបារម្ភ ក្នុងករណីដែលដំណើរការនៃការធ្វើរដ្ឋធម្មនុញ្ញថ្មី បរាជ័យ ហើយរបបយោធា នឹងបន្តគ្រប់គ្រងថៃបន្តទៀត៕