កីឡាជាតិ
ជាតិ
រង្វាន់អត្តពលិកឆ្នើម អត្តពលិកពិការឆ្នើម គ្រូបង្វឹកឆ្នើម អត្តបទកីឡាឆ្នើម និងរូបថតកីឡាល្អ ប្រចាំឆ្នាំ២០១៥
× លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) ថ្លែងនៅក្នុងសន្និសីទសារព័ត៌មាន កាលពីព្រឹកថ្ងៃទី២ ខែកុម្ភៈ នៅទីស្នាក់ការ NOCC ថា ដោយទទួលបានការសហការជាមួយក្រុមហ៊ុនណាហ្គាវើល NOCC នឹងរៀបចំកម្មវិធីប្រគល់រង្វាន់លើកទឹកចិត្តដល់អត្តពលិកកម្ពុជាឆ្នើមប្រចាំឆ្នាំ២០១៥ នាថ្ងៃទី១៨ ខែកុម្ភៈ ឆ្នាំ២០១៦នៅមជ្ឈមណ្ឌលកម្សាន្តណាហ្គាវើល។ ព្រមទាំងមានការបោះឆ្នោតជ្រើសរើសអត្តពលិកដែលមានប្រជាប្រិយភាព និងការប្រគល់រង្វាន់ដល់អ្នកសារព័ត៌មានកីឡាចំពោះអត្ថបទឆ្នើម និងរូបភាពដែលល្អដាច់គេទៀតផង។
គណៈកម្មាធិការជាតិអូឡាំពិកកម្ពុជាទទួលបានការឧបត្ថម្ភពីមជ្ឈមណ្ឌលកម្សាន្តណាហ្គាវើលនឹងរៀបចំកម្មវិធីប្រគល់រង្វាន់ដល់អត្តពលិកឆ្នើមកម្ពុជាប្រចាំឆ្នាំ២០១៥ នាថ្ងៃទី១៨ ខែកុម្ភៈ នៅអគារពាណិជ្ជកម្មលំដាប់លេខ១នៅឥណ្ឌូចិនណាហ្គាវើល។ បន្ទាប់ពីប្រគល់រង្វាន់ដល់អត្តពលិកឆ្នើមប្រចាំឆ្នាំក៏មានការប្រគលរង្វាន់ដល់គ្រូបង្វឹកឆ្នើម កីឡាករមានប្រជាប្រិយភាពដែលទទួលបានការបោះឆ្នោតគាំទ្រច្រើនជាងគេ និងអ្នកសារព័ត៌មានកីឡាដែលមានស្នាដៃឆ្នើម និងអ្នកថតរូបដែលមានរូបភាពល្អដាច់គេថែមទៀតផង។ សម្រាប់ការបោះឆ្នោតដើម្បីជ្រើសរើសកីឡាករកីឡារិនីឆ្នើមប្រចាំឆ្នាំ សាធារណជនទាំងគ្រាប់តែចុច Like អត្តពលិកដែលខ្លួនពេញចិត្តនៅលើគេហទំព័រហ្វេសប៊ុករបស់ណាហ្គាវើល។ ការបោះឆ្នោតនេះនឹងចាប់ផ្តើមពីថ្ងៃទី២ ដល់ថ្ងៃទី១៧ ខែកុម្ភៈ។ ហើយសម្រាប់អត្ថបទកាសែត និងរូបភាពត្រូវយកទៅដាក់នៅទីស្នាក់ការ NOCC។
លោក វ៉ាត់ ចំរើន អគ្គលេខាធិការ NOCC បានថ្លែងថា ការៀបចំកម្មវិធីប្រគល់រង្វាន់ដល់កីឡាករដីឡាការិនីឆ្នើមប្រចាំឆ្នាំ២០១៥លើកទី១នេះឡើង ក្នុងគោលបំណងដើម្បីលើកទឹកចិត្តអត្តពលិកកម្ពុជា ក៏ដូចជាជំរុញវិស័យកីឡាកម្ពុជាឲ្យមានការអភិវឌ្ឍកាន់តែខ្លាំង និងដើម្បីស្វែងរកការលើកទឹកចិត្តពីក្រុមហ៊ុនសប្បុរសជននានាចំពោះអត្តពលិកកម្ពុជា។ ហើយការរៀកម្មវិធីនេះដោយទទួលបានការណែនាំរបស់ លោក ថោង ខុន រដ្ឋមន្ត្រីសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ហើយវាស្របទៅនឹងប្រសាសន៍របស់សម្តេចនាយករដ្ឋមន្ត្រី ហ៊ុន សែន ក្នុងការលើកទឹកចិត្តដល់អត្តពលិកជាតិរបស់យើង ពីកិច្ចខិតខំប្រឹងប្រែងរបស់ពួកគេ និងបានស្តារកិត្តិយសជាតិនាពេលកន្លងមក។
លោកអគ្គលេខាធិការ NOCC រូបនេះបានប្រកាសថា ចាប់ពីឆ្នាំ២០១៦ នេះតទៅគណៈកម្មាធិការជាតិអូឡាំពិកកម្ពុជាបានចាប់ដៃគូជាមួយក្រុមហ៊ុនណាហ្គាវើល ក្នុងការស្វែងរកអត្តពលិកឆ្នើមទាំងមានកាយសម្បទានពេញលេញ និងអត្តពលិកពិកា ព្រមទាំងស្វែងរកអត្តពលិកដែលមានប្រជាប្រិយភាព និងគ្រូដែលមានសមត្ថភាពល្អក្នុងការបំពេញភារកិច្ច ដ៏ដូចជាអ្នកសារព័ត៌មានដែលសរសេរអត្ថបទល្អ និងមានរូបភាពដែលអាចទាក់ទាញចំណាប់អារម្មណ៍របស់មហាជននៅក្នុងឆ្នាំ២០១៥ ដើម្បីផ្តល់រង្វាន់ជាទឹកប្រាក់ផង និងពានកិត្តិយសជារៀងរាល់ឆ្នាំ។ NOCC បានចាត់ទុកផែននេះថា វាជាផែនការមួយរបស់ផែនការមេ ក្នុងដំណើរឆ្ពោះទៅរកស៊ីហ្គេមលើកទី៣២ ហើយបន្ទាប់ពីចប់ស៊ីហ្គេមឆ្នាំ២០២៣ គណៈកម្មាធិការជាតិអូឡាំពិកកម្ពុជានឹងរៀបចំការលើកទឹកចិត្តដ៏ធំមួយប្រចាំឆ្នាំ។
ទន្ទឹមនឹងនេះ លោក NUNO BASTOS នាយកផ្នែករៀបចំកម្មវិធីកម្សាន្តនៅណាហ្គាវើលបានមានប្រសាសន៍ថា៖«ការរៀបចំកម្មវិធីនេះមិនត្រឹមតែទទួលបានជាប្រាក់រង្វាន់ប៉ុណ្ណោះទេ គឺទទួលបានការទទួលស្គាល់អត្តពលិកកម្ពុជា និងសារព័ត៌មានកីឡាចំពោះស្នាដៃរបស់ពួកគេពេញមួយឆ្នាំកន្លងមក មិនត្រឹមតែប៉ុណ្ណោះជួយលើកទឹកចិត្តឲ្យពួកគេខិតខំប្រឹងប្រែងដើម្បីទទួលបានលទ្ធផលប្រសើរបន្តទៀត»។
លោកបានបន្តទៀតថា កន្លងមកណហ្គាវើលតែងតែធ្វើជាដៃគូសំខាន់ដែលបានជួយឧបត្ថម្ភដល់កីឡាកម្ពុជាជាច្រើន ហើយណាហ្គាវើលគឺជាក្រុមហ៊ុនពាណិជ្ជកម្មទី១ដែលបានចុះហត្ថលេខាជាដៃគូជាមួយ NOCC ក្នុងឆ្នាំ២០១១ក្នុងការជួយឧបត្ថម្ភដល់កម្ពុជាសម្រាប់ការប្រកួតស៊ីហ្គេមឆ្នាំ២០១១ នៅប្រទេសឥណ្ឌូនេស៊ី, ការប្រកួតកីឡាអូឡាំពិករដូវក្តៅឆ្នាំ២០១២ ក្នុងទីក្រុងឡុងដ៍, កីឡាអាស៊ានហ្គេមឆ្នាំ២០១៤ ក្នុងទីក្រុង អ៊ីន ឈាន់ ព្រមទាំងកីឡាស៊ីហ្គេម ឆ្នាំ២០១៥ នៅប្រទេសសិង្ហបុរី។
លោក BASTOS បានបញ្ជាក់ថា សម្រាប់រង្វាន់អត្តពលិកឆ្នើមទាំងពីរភេទទទួលបាន ៣ពាន់ដុល្លារ ខណៈអត្តពលិកពិការទាំងពីរភេទទទួលបាន ១.៥០០ដុល្លារ ចំណែកគ្រូបង្វឹកឆ្នើម ២ពាន់ដុល្លារ ឫឯអត្តពលិកដែលមានប្រជាប្រិយភាពដែលទទួលបានការ Like ច្រើនជាងគេទទួលបាន ២ពាន់ដុល្លារ អ្នកសារព័ត៌មានដែលមានស្នាដៃល្អ និងអ្នកថតរូបដែលល្អដាច់គេទទួលបានម្នាក់ ១ពាន់ដុល្លារផងដែរ៕
© រក្សាសិទ្ធិដោយ thmeythmey.com