សេដ្ឋកិច្ចអន្តរជាតិ
អន្តរជាតិ
ថៃរកបាន ៣,៧ពាន់លានដុល្លារពីការនាំបន្លែ-ផ្លែឈើចេញកាលពីឆ្នាំមុន
× កាលពីឆ្នាំ២០១៥ ថៃទទួលបានចំណូលប្រមាណ៣,៧ពាន់លានដុល្លារ ពីការនាំចេញផ្លែឈើស្រស់ ស្ងួត ក្រៀម និងបន្លែទៅកាន់ទីផ្សាធំៗលើពិភពលោក ដែលមានចិន វៀតណាម ហុងកុង ជប៉ុន និងសហរដ្ឋអាមេរិក។
អ្នកស្រី Malee Choklamlert អគ្គនាយិកានៃនាយកដ្ឋានលើកកម្ពស់ពាណិជ្ជកម្ម បានអះអាងថា ថៃបាននាំចេញបន្លែ និងផ្លែឈើ ប្រមាណ១,៦លានតោន ដោយមានទឹកប្រាក់សរុប ៣,៧ពាន់លានដុល្លារអាមេរិក ពោលគឺកើន ៤,៤ភាគរយ បើប្រៀបធៀបទៅនឹងឆ្នាំ២០១៤ ។
តាមសម្តីដែលដកស្រង់ដោយកាសែតចិន Shanghaidaily ក្រៅពីទីផ្សារធំនៅលើពិភពលោក បន្លែ-ផ្លែឈើថៃមានអតិថិជននៅតាមបណ្តាប្រទេសជាច្រើនទៀតដូចជា កម្ពុជា មីយ៉ាន់ម៉ា ឡាវ អ៊ីរ៉ង់ អារ៉ាប៊ីសាអូឌីត ចក្រភពអង់គ្លេស ហូឡង់ និងអូស្ត្រាលី។
បើតាមអ្នកស្រី Choklamlert ការនាំចេញផ្លែធូរេន ទទួលបានចំណូលជិត៤លានដុល្លារអាមេរិក ជាពិសេសពីទីផ្សារចិន។ ផលិតផលកសិម្មរបស់ថៃដែលលក់នៅទីផ្សារបរទេសរួមមានដូចជា មៀន មង្ឈុត ពោតផ្អែម ម្នាស់ សណ្តែក ទឹកផ្លែឈើ និងបន្លែជាច្រើនមុខ។
អគ្គនាយិកានៃនាយកដ្ឋានលើកកម្ពស់ពាណិជ្ជកម្ម បានបន្ថែមថា ការនាំចេញបន្លែ-ផ្លែឈើ ទៅក្រៅប្រទេសមានការកើនឡើង ១៦៦ភាគរយនៅឡាវ ៦៦ភាគរយនៅមីយ៉ាន់ម៉ា ៦៣ភាគរយនៅអ៊ីរ៉ង់ និង៣៤ភាគរយនៅកម្ពុជា៕
© រក្សាសិទ្ធិដោយ thmeythmey.com