ពុទ្ធសាសនបណ្ឌិត្យឲ្យណាហ្គាវើលជួសជុលការខូចខាតដោយសារសំណង់ផ្លូវក្រោមដី

ជាតិ

ពុទ្ធសាសនបណ្ឌិត្យឲ្យណាហ្គាវើលជួសជុលការខូចខាតដោយសារសំណង់ផ្លូវក្រោមដី

05, Feb 2016 , 2:38 pm

រូបភាព

ដោយ:

វិទ្យាស្ថានពុទ្ធសាសនបណ្ឌិត្យកម្ពុជា នាថ្ងៃទី៥ ខែកុម្ភៈនេះ តាមរយៈហ្វេសប៊ុករបស់ខ្លួន បានស្នើសុំសម្ដេច ហ៊ុន សែន ធ្វើអន្តរាគមន៍ឲ្យក្រុមហ៊ុនណាហ្គាវើល ឆាប់កសាងខ្លោងទ្វារ និងជួសជុលផលប៉ះពាល់នានា ដែលបណ្ដាលមកពីសំណង់ផ្លូវក្រោមដីរបស់ក្រុមហ៊ុនណាហ្គាវើល។ នាយកវិទ្យាស្ថានពុទ្ធសាសនបណ្ឌិត្យ បានអះអាងបន្ថែមថា ភាគីណាហ្គាវើល ហាក់ដូចជាមិនទាន់មានគម្រោងការណាមួយ ដើម្បីប៉ះប៉ូវការខូចខាតនោះឡើយ។

ប្រធានពុទ្ធសាសនបណ្ឌិត្យ លោក ស សុខនី បានបញ្ជាក់ប្រាប់សារព័ត៌មានថ្មីៗ ថា មកដល់ពេលនេះគម្រោងសាងសង់ផ្លូវក្រោមដីរបស់ក្រុមណាហ្គាវើល ជិតបញ្ចប់ទៅហើយ ប៉ុន្តែខាងក្រុមហ៊ុនដូចជាមិនទាន់មានវិធានការណាមួយ ដើម្បីកសាងក្លោងទ្វារ សួន និងជួសជុលផលប៉ះពាល់នានា របស់ពុទ្ធសាសនបណ្ឌិត្យនៅឡើយទេ។

លោក សុខនី បានបន្តថា កន្លងមករដ្ឋមន្ត្រីក្រសួងធម្មការ និងសាសនា រួមជាមួយថ្នាក់ដឹកនាំវិទ្យាស្ថានពុទ្ធសាសនបណ្ឌិត្យ ក៏បានដាក់លិខិតឲ្យក្រុមហ៊ុនឆាប់ធ្វើការកែលម្អ និងកសាងអ្វីដែលជារបស់ដើម ជូនពុទ្ធសាសនបណ្ឌិត្យឡើងវិញ ជាច្រើនដងរួចមកហើយ។ ប៉ុន្តែរហូតមកដល់ពេលនេះ រយៈពេលជិត២ឆ្នាំ គឺចាប់ពីខែមេសា ឆ្នាំ២០១៤ តែមិនទាន់មានការឆ្លើយតបណាមួយ ពីក្រុមហ៊ុនសាងសង់របស់ណាហ្គាវើលនៅឡើយនោះទេ។

ការសម្រេចស្នើសុំឲ្យសម្ដេចហ៊ុន សែន ជួយអន្តរាគមន៍នៅពេលនេះ ដោយសារពុទ្ធសាសនបណ្ឌិត្យមើលឃើញថា មានតែពឹងលើថ្នាក់ដឹកនាំទេ ទើបអាចឆាប់មានដំណោះស្រាយជូនពុទ្ធសាសនបណ្ឌិត្យបាន។ ការដែលចង់ឲ្យមានការអន្តរាគមន៍នេះ ព្រោះពុទ្ធសាសនបណ្ឌិត្យចង់បានអ្វីដែលជារបស់ខ្លួនមកវិញ និងដើម្បីឲ្យអ្នកគ្រប់គ្រង បុគ្គលិកដែលធ្វើការក្នុងពុទ្ធសាសនបណ្ឌិត្យ ព្រមទាំងសាធារណជន ដែលតែងតែតាមដានលើបញ្ហានេះអស់ចិត្ត ចំពោះការខ្លាចបាត់បង់របស់សាធារណៈ។

នៅក្នុងសំណើឲ្យសម្ដេច ហ៊ុន សែន ជួយអន្តរាគមន៍នេះ ពុទ្ធសាសនបណ្ឌិត្យបានស្នើឲ្យក្រុមហ៊ុន អនុវត្តន៍តាមអនុសាសន៍របស់សម្ដេច កាលពីថ្ងៃ០៥ ខែវិច្ឆិកា ឆ្នាំ២០១៥ និងឲ្យក្រុមហ៊ុន ណាហ្គាវើល ឲ្យឆាប់កសាងខ្លោងទ្វារ និងជួសជុលផលប៉ះពាល់នានា ដែលបណ្ដាលមកពីសំណង់ផ្លូវក្រោមដីនេះ ជូនពុទ្ធសាសនបណ្ឌិត្យវិញ តាមលិខិតស្នើសុំរបស់ក្រុមហ៊ុនណាហ្គាវើលចុះថ្ងៃទី២៥ ខែមេសា ឆ្នាំ២០១៤ ៕