ជាតិ
លោក សុខ ទូច ឡើងងារជាបណ្ឌិតសភាចារ្យ
× ព្រះមហាក្សត្រ បានចេញព្រះរាជក្រឹត្យតែងតាំង លោក សុខ ទូច ឲ្យទទួលគោរមងារជាបណ្ឌិតសភាចារ្យ កាលពីថ្ងៃទី ២៧ ខែមករា ឆ្នាំ ២០១៦ កន្លងទៅថ្មីៗនេះ។
ពិធីទទួលអាវ និងគោរមងារជាបណ្ឌិតសភាចារ្យរបស់លោក សុខ ទូច រៀបចំឡើងកាលពីចុងខែមករា ដោយគណៈកម្មការវាយតម្លៃបណ្ឌិតសភាចារ្យនៃរាជបណ្ឌិត្យសភាកម្ពុជា។ លោក សុខ ទូច ប្រធានក្រុមស្រាវជាវព្រំដែនកម្ពុជា-វៀតណាម បានថ្លែងថា គណៈកម្មការវាយតម្លៃនៃរាជ្យបណ្ឌិតសភាកម្ពុជា បានទទួលស្គាល់នូវសមត្ថភាពរបស់លោកថា មានលក្ខណៈសម្បត្តិគ្រប់គ្រាន់ ដើម្បីទទួលបានគោរមងារជា «បណ្ឌិតសភាចារ្យ»។ « បន្ទាប់មកគណៈកម្មការនេះ បានបញ្ជូនឈ្មោះខ្ញុំថ្វាយព្រះមហាក្សត្រ ដើម្បីឲ្យព្រះអង្គប្រទានគោរមងារនេះ។ ហើយព្រះរាជក្រឹត្យចុះទី ២៧ ខែមករា បានផ្តល់គោរមងារដល់ខ្ញុំ»។ នេះជាការពន្យល់របស់លោក សុខ ទូច ដល់សារព័ត៌មានថ្មីៗ។
បើតាមលោក សុខ ទូច ដែលជាអ្នកវិភាគនយោបាយផងនោះ លក្ខណៈសម្បត្តិសំខាន់ដែលលោកទទួលបានងារនេះ ដោយសារគណៈកម្មការវាយតម្លៃ យល់ថា រូបលោកបង្កើតគំនិតច្នៃប្រឌិត និងស្រាវជ្រាវថ្មីៗ។ លោកបន្តអះអាងបែបនេះថា៖« ជាពិសេសលក្ខណៈសម្បត្តិសំខាន់មួយទៀតគឺខ្ញុំបានសរសេរសៀវភៅសំខាន់ៗចំនួន ៦ ក្បាល។ ពាក្យបណ្ឌិតសភាចារ្យនេះ គ្រាន់តែជាគោរមងារដែលខ្ពស់ជាងបណ្ឌិត និងអ្នកដែលចេះដឹងច្រើន។ ខ្ញុំមិនដឹងថា វាមាន័យបែបណាទៀតទេ»។
បើទោះបីជាពេញចិត្តនឹងគោរមងារនេះក៏ពិតមែន តែលោក សុខ ទូច មិនភ្លេចរម្លឹកពីលក្ខណៈសម្បត្តិរបស់ខ្លួនកាលពីជាង ១០ មុននោះទេ។ លោកថា តាមពិតគោរមងារនេះ លោកត្រូវទទួលបានតាំងពី ១០ ឆ្នាំមុនម្លេះ តែដោយសារតែការខ្វែងគំនិតគ្នារបស់សមាជិករាជបណ្ឌិត្យសភាកម្ពុជា ទើបលោកមិនអាចទទួលបានកាលពីពេលនោះ។
សូមបញ្ជាក់ថា បើតាមគេហទំព័ររបស់រាជបណ្ឌិត្យសភាកម្ពុជា ជនដែលទទួលបានគោរមងារជាបណ្ឌិតភាចារ្យ មានជាអាទិ៍ សម្តេច ហ៊ុន សែន លោក សុខ អាន លោក រស់ ចន្ត្រាបុត្រ លោក សូត្រ សំណាង លោកស្រី ខ្លូត ធីតា លោក ស៊ន សំណាង លោក ច័ន្ទ សំណព្វ លោក ស៊ុំ ឈុំប៊ុន លោក ខៀវ ថវិកា លោក ឆយ អូន លោក ព្រុំ ម៉ល់ លោក សោម សុមុនី លោក តិច សំណាង លោក សំ សោភាន់ លោក ជា ណេង។ ហើយបណ្ឌិតសភាចារ្យចំនួន ៥ រូបផ្សេងទៀត បានទទួលមរណភាព៕
Tag:
សុខ ទូច
បណ្ឌិតសភាចារ្យ
© រក្សាសិទ្ធិដោយ thmeythmey.com