មនុស្ស៣១នាក់ ត្រូវបានចាប់ខ្លួននិងគំរាមកំហែង ដោយសារបញ្ចេញមតិតាមហ្វេសប៊ុក

ជាតិ

មនុស្ស៣១នាក់ ត្រូវបានចាប់ខ្លួននិងគំរាមកំហែង ដោយសារបញ្ចេញមតិតាមហ្វេសប៊ុក

09, Feb 2016 , 7:39 pm

រូបភាព

ដោយ: ម៉ៅ សុផា

ព្រោះតែការបញ្ចេញមតិរបស់ខ្លួន នៅតាមបណ្តាញសង្គមហ្វេសប៊ុក មនុស្ស ៧នាក់ ត្រូវបានចាប់ខ្លួន ហើយ ២៤នាក់ផ្សេងទៀត កំពុងតែស្ថិតនៅក្រោមការគំរាមកំហែង ពីសំណាក់អ្នកមានអំណាច ដោយគិតត្រឹមខែ សីហា ឆ្នាំ ២០១៥ មកដលខែ កុម្ភៈ ឆ្នាំ២០១៦ ។ នេះបើតាមរបាយការណ៍ ស្តីពីការបង្ក្រាបទៅលើអ្នកប្រើប្រាស់ហ្វេសប៊ុករបស់មជ្ឈមណ្ឌលសិទ្ធិមនុស្សកម្ពុជា។

ក្នុងចំណោមជនរងគ្រោះ៧នាក់ ដែលត្រូវបានចាប់ខ្លួន ជនរងគ្រោះ៦នាក់ ត្រូវបានដោះលែង ហើយជនរងគ្រោះ១នាក់ កំពុងតែស្ថិតក្នុងពន្ធនាគាររហូតមកបច្ចុប្បន្ន។ ក្រៅពីចាប់ខ្លួនអ្នកប្រើប្រាស់ហ្វេសប៊ុកទាំង៧នាក់ខាងលើ អ្នកប្រើប្រាស់ហ្វេសប៊ុក ២៤នាក់ទៀត កំពុងតែត្រូវបាន គំរាមកំហែង ព្រោះតែការបញ្ចេញមតិនិងការរិះគន់របស់ពួក ទៅលើបណ្តាអ្នកនយោបាយ និងអ្នកមានអំណាចមួយចំនួន ។

មជ្ឈមណ្ឌលសិទ្ធិមនុស្សកម្ពុជា បានចាត់ទុកការបង្ក្រាបនេះ ថាជាទិដ្ឋភាពដ៏គួរឲ្យព្រួយបារម្ភ ដែលប្រជាពលរដ្ឋតែងតែត្រូវបានចាប់ខ្លួនឬព្រមាន ដោយសារតែការបញ្ចេញមតិ និងការរិះគន់របស់ពួកគេទៅលើប្រមុខរដ្ឋាភិបាល ឥស្សរជននយោបាយ ព្រមទាំងមន្ត្រីរាជការ តាមបណ្តាញសង្គមហ្វេសប៊ុក។

លើសពីនេះទៅទៀត អង្គការក្រៅរដ្ឋាភិបាលមួយនេះ ក៏បានលើកឡើងថា ការកើនឡើងនូវការចាប់ខ្លួន និងការគំរាមកំហែងនេះ គឺជាការរឹតត្បិតសិទ្ធិសេរីភាពនៃការបញ្ចេញមតិរបស់ពលរដ្ឋតាមប្រព័ន្ធអ៊ិនធើណិត ដែលប៉ះពាល់និងរារាំងដំណើរការនៃលទ្ធិប្រជាធិបតេយ្យនៅកម្ពុជា៕