កំណត់ពេលប្រឡងចេញថ្នាក់ជាតិសម្រាប់វិស័យសុខាភិបាល នៅថ្ងៃទី៥ មីនា

ជាតិ

កំណត់ពេលប្រឡងចេញថ្នាក់ជាតិសម្រាប់វិស័យសុខាភិបាល នៅថ្ងៃទី៥ មីនា

10, Feb 2016 , 7:59 am

រូបភាព

ដោយ: ថ្មីៗ

គណៈកម្មាធិការប្រឡងថ្នាក់ជាតិសម្រាប់ការបណ្តុះបណ្តាលក្នុងវិស័យសុខាភិបាល នៃទីស្តីការគណៈរដ្ឋមន្ត្រី ប្រកាសថា ការប្រឡងថ្នាក់ជាតិសម្រាប់វិស័យសុខាភិបាល នៅតាមគ្រឹះស្ថានបណ្តុះបណ្តាល វិស័យសុខាភិបាល នឹងប្រព្រឹត្តទៅនៅថ្ងៃទី៥ ខែមីនា ឆ្នាំ២០១៦។ នេះបើតាមសេចក្តីជូនដំណឹងរបស់គណៈកម្មាធិការប្រឡងថ្នាក់ជាតិ ចុះថ្ងៃទី៨ ខែកុម្ភៈនេះ។

បើតាមសេចក្ដីជូនដំណឹងស្ដីពី ការប្រឡងចេញថ្នាក់ជាតិ គណៈកម្មាធិការប្រឡងថ្នាក់ជាតិនឹងរៀបចំការប្រឡងចេញថ្នាក់ជាតិ ទាំងផ្នែកទ្រឹស្តី និងផ្នែក ជំនាញគ្លីនិក សម្រាប់និស្សិតទើបបានបញ្ចប់ការសិក្សា នៅតាមគ្រឹះស្ថានបណ្តុះបណ្តាលវិស័យសុខាភិបាល នៅឆ្នាំ២០១៥ និងនិស្សិតបានប្រឡងធ្លាក់ ឬមិនទាន់ចូលរួមការប្រឡងចេញថ្នាក់ជាតិកន្លងមក ក្នុងថ្នាក់ វេជ្ជបណ្ឌិតទូទៅ ទន្តបណ្ឌិតទូទៅ បរិញ្ញាបត្រឱសថ និងបរិញ្ញាបត្រគិលានុបដ្ឋាក ឆ្មប និងបច្ចេកទេសមន្ទីពិសោធន៍ ជាដើម។ ចំពោះការប្រឡងផ្នែកទ្រឹស្តី វិញ្ញាសាសំណេរ គឺជាប្រភេទសំណួរចម្លើយជ្រើសរើស Multiple Choice (MCQ) មានចំនួន ២០០ សំណួរ តាមមុខវិជ្ជា និងកាលបរិច្ឆេទកំណត់។

គណៈកម្មាធិការប្រឡងថ្នាក់ជាតិតម្រូវឲ្យបេក្ខជនបង់ថវិកា ១សែនរៀល សម្រាប់រៀបចំការ ប្រឡងចេញថ្នាក់ជាតិ រីឯគ្រឹះស្ថានបណ្តុះបណ្តាលវិស័យសុខាភិបាលទាំងរដ្ឋ និងឯកជន ត្រូវផ្គត់ផ្គង់សម្ភារៈបរិក្ខារ សម្រាបដំណើរការប្រឡងចេញថ្នាក់ជាតិផ្នែកជំនាញគ្លីនិក។

កាលបរិច្ឆេទ និងទីកន្លែងទទួលពាក្យប្រឡង ចាប់ថ្ងៃជូនដំណឹង ដល់ម៉ោង ៥រសៀលថ្ងៃទី១៩ ខែកុម្ភៈ ឆ្នាំ២០១៦ នៅតាមគ្រឹះស្ថានសិក្សាសុខាភិបាលរបស់និស្សិតផ្ទាល់ រួមមាន សាកលវិទ្យាល័យវិទ្យាសាស្ត្រសុខាភិបាល សាកលវិទ្យាល័យអន្តរជាតិ វិទ្យាស្ថានសុខាភិបាលកងយុទ្ធពលខេមរភូមិន្ទ សាកលវិទ្យាល័យឡាយហ្វ សាកលវិទ្យាល័យចេនឡា និងសាកលវិទ្យាល័យពុទ្ធិសាស្ត្រ។

បេក្ខជនអាចសួររកសំណុំលិខិតពាក្យសុំប្រឡងចេញថ្នាក់ជាតិ និងព័ត៌មានផ្សេងៗទៀត នៅតាមសាកលវិទ្យាល័យពាក់ព័ន្ធខាងលើ៕