សន្តិសុខត្រូវបានរឹតបន្តឹងនៅមុនកិច្ចប្រជុំអាមេរិក-អាស៊ាននៅSunnylands

ជាតិ

សន្តិសុខត្រូវបានរឹតបន្តឹងនៅមុនកិច្ចប្រជុំអាមេរិក-អាស៊ាននៅSunnylands

15, Feb 2016 , 10:21 am

រូបភាព

ដោយ: សៅ ផលនិស្ស័យ (Sao Phal Niseiy)

SunnyLands-សហរដ្ឋអាមេរិក៖ នៅមុនពេលមកដល់នៃកិច្ចប្រជុំអាមេរិក-អាស៊ាន សន្តិសុខត្រូវបានរឹតបន្តឹងយ៉ាងខ្លាំងនៅរមណីយដ្ឋានSunnylands រដ្ឋកាលីហ្វរនីញ៉ា។ ប្រធានាធិបតីអាមេរិកលោក បារ៉ាក់ អូបាម៉ា និងប្រមុខរដ្ឋ-រដ្ឋាភិបាលអាស៊ានភាគច្រើន ដោយរួមទាំងនាយករដ្ឋមន្ត្រីកម្ពុជាសម្ដេច ហ៊ុន សែន បានទៅដល់ទីក្រុង Rancho Mirageហើយ សម្រាប់ជំនួបកំពូលនេះដែលចាប់ផ្ដើមពីថ្ងៃទី១៥ដល់១៦ ខែកុម្ភៈ (ម៉ោងនៅអាមេរិក)។

ក្រុមមន្ត្រីអាមេរិកនិងអាស៊ានបានជួបគ្នាដើម្បីរៀបចំជាចុងក្រោយនូវកិច្ចប្រជុំអាមេរិក-អាស៊ាននៅរមណីយដ្ឋានSunnylands។ សន្តិសុខត្រូវបានពង្រឹងយ៉ាងខ្លាំងនៅទីកន្លែងប្រជុំ ដែលចូលរួមដោយប្រធានាធិបតីអាមេរិកនិងមេដឹកនាំរដ្ឋសមាជិកអាស៊ានទាំង១០ ខណៈមានការប្រកាសថានឹងមានការធ្វើបាតុកម្ម ប្រឆាំងនឹងវត្តមានមេដឹកនាំអាស៊ាននៅទីនោះ។
ភ្នាក់ងារសម្ងាត់អាមេរិកនឹងដឹកនាំលើការងារសន្តិសុខនេះ ហើយនឹងមានការចូលរួមពី ភ្នាក់ងារពិសេសFBI ព្រមទាំងប៉ូលិសប្រចាំតំបន់ផងដែរ។

កិច្ចប្រជុំរយៈពេល២ថ្ងៃនេះ នឹងជួយពង្រឹងកិច្ចសហប្រតិបត្តិការស៊ីជម្រៅរវាងអាមេរិកនិងរដ្ឋអាស៊ានដែលមានប្រជាជនជាង៦០០លាននាក់។ សម្រាប់ថ្ងៃទី១ ទំនាក់ទំនងសេដ្ឋកិច្ចអាចជាប្រធានបទចម្បងសម្រាប់កិច្ចប្រជុំនេះ ហើយកិច្ចព្រមព្រៀងភាពជាដៃគូអន្តរប៉ាស៊ីហ្វិក ក៏នឹងត្រូវលើកឡើងផងដែរ។ បញ្ហាសន្តិសុខ ការប្រយុទ្ធប្រឆាំងភេរវកម្ម គឺជាប្រធានបទសំខាន់ក្នុងថ្ងៃទី២ ខណៈបញ្ហាដែនសមុទ្រចិនសមុទ្រខាងត្បូងក៏ត្រូវដាក់តុពិភាក្សាផងដែរ៕ រាយការណ៍បន្ថែមដោយ តន ចាន់រិទ្ធារ៉ា