ជាតិ
សង្គមជាតិ
ក្រុមអ្នកជិះកង់នៅសៀមរាបត្រៀមរៀបចំព្រឹត្តិការណ៍ជិះកង់ដើម្បីពេទ្យគន្ធបុប្ផាលើកទី៣
× សៀមរាប៖ មន្ទីរពេទ្យកុមារគន្ធបុប្ផា គឺជាមន្ទីរពេទ្យដ៏ល្បីល្បាញ ហើយគេទទួលស្គាល់ថាជាមន្ទីរពេទ្យទេវតា ដែលបានទទួលព្យាបាលដោយឥតបង់ប្រាក់ដល់កុមារ និងស្ត្រីមានផ្ទៃពោះនៅក្នុងប្រទេសកម្ពុជា។ ជាង២៤ឆ្នាំកន្លងមក មន្ទីរពេទ្យគន្ធបុប្ផាបានព្យាបាលអ្នកជំងឺជាង១៤,៨៣លាននាក់ និងកុមារដែលឈឺធ្ងន់ធ្ងរប្រមាណ១.៥១លាននាក់។ ប្រសិនបើគ្មានមន្ទីរពេទ្យគន្ធបុប្ផាទេ កុមារអភ័ព្វចំនួន៣២០០នាក់នឹងត្រូវបាត់បង់ជីវិតជារៀងរាល់ខែនៅក្នុងប្រទេសកម្ពុជា។
មន្ទីរពេទ្យនេះទទួលរ៉ាប់រងព្យាបាលកុមារទីទាល់ក្រដែលមានជំងឺទូទាំងប្រទេសពី៨៥% ទៅ៩០% ពោលគឺពួកគេគ្មានលទ្ធភាពបង់ថ្លៃពេទ្យទាល់តែសោះ។ ជាអកុសល ថ្មីៗនេះ លោកវេជ្ជបណ្ឌិតបេអាត រីជន័រ ដែលជាស្ថាបនិកមន្ទីរពេទ្យគន្ធបុប្ផាបានប្រកាសពីការខ្វះខាតថវិកាជំនួយដើម្បីផ្គត់ផ្គង់ដល់ដំណើរការមន្ទីរពេទ្យនេះនាពេលអនាគត់ដ៏ខ្លី។ មូលហេតុនេះហើយ ទើបយើងខ្ញុំជាក្រុមអ្នកជិៈកង់ដើម្បីសហគមន៍ បានមូលមតិគ្នារៀបចំព្រឹត្តិការណ៍មួយឈ្មោះ ជិៈកង់ដើម្បីមន្ទីរពេទ្យគន្ធបុប្ផា ដើម្បីកៀងគរស្វែងរកថវិកាបន្ថែមជួយដល់មន្ទីរពេទ្យគន្ធបុប្ផា នៅថ្ងៃទី០៨ ខែឧសភា ឆ្នាំ២០១៦ ខាងមុខនេះ។
ក្រុមអ្នកជិះកង់ដើម្បីសហគមន៍ គឺជាក្រុមជិះកង់សប្បុរសធម៌មួយដែលមិនស្វែងរកផលចំណេញ។ យើងបង្កើតព្រឹត្តិការណ៍ផ្សេងៗទាក់ទងនឹងការជិះកង់ដើម្បីបុព្វហេតុសប្បុរសធម៌។ យើងបានរៀបចំព្រឹត្តិការណ៍នេះ ២ដងរួចមកហើយដោយលើកទី១ នៅថ្ងៃទី២៥ ខែឧសភា ឆ្នាំ២០១៤ យើងបានរៀបចំព្រឹត្តិការណ៍នេះប្រកបដោយជោគជ័យដោយប្រមូលបានថវិកាចំនួន២,៥៤៣ដុល្លារ ប្រគល់ជូនដល់មន្ទីរពេទ្យគន្ធបុប្ផាពីសំណាក់អ្នកជិះកង់ចំនួន២០៥នាក់ និងបណ្តាក្រុមហ៊ុនផ្សេងៗចំនួន២៣ក្រុមហ៊ុនដែលបានជួយឧបត្ថម្ភ។
លើកទី២ នៅថ្ងៃទី២៤ ខែឧសភា ឆ្នាំ២០១៥ យើងបានរៀបចំព្រឹត្តិការណ៍នេះ ជាលើកទី២ប្រកបដោយជោគជ័យដោយប្រមូលបានថវិកា ចំនួន៧,០៩៧ដុល្លារ ប្រគល់ជូនដល់មន្ទីរពេទ្យគន្ធបុប្ផាពីសំណាក់អ្នកជិះកង់ចំនួន៣៣៨នាក់ និងបណ្តាក្រុមហ៊ុនផ្សេងៗចំនួន៣៦ក្រុមហ៊ុនដែលបានជួយឧបត្ថម្ភ។
គំរោងលើកទី៣ នៅថ្ងៃទី៨ ខែឧសភា ឆ្នាំ២០១៦ យើងនឹងរៀបចំព្រឹត្តិការណ៍នេះ ជាលើកទី៣ហើយយើងសង្ឃឹមថានឹងមានអ្នកចូលរួមជិះកង់ប្រហែល៤០០នាក់ ដែលមកពីបណ្តាស្ថាប័នរដ្ឋ ឯកជន សិស្សានុសិស្ស និងបណ្តាក្រុមហ៊ុនផ្សេងៗដែលបានជួយឧបត្ថម្ភ ដើម្បីរកមូលនិធិជួយដល់មន្ទីរពេទ្យគន្ធបុប្ផាខេត្តសៀមរាប។
ក្រុមអ្នកជិះកង់ដើម្បីសហគមន៍ ពុំមានសមត្ថភាពគ្រប់គ្រាន់ដើម្បីជួយដល់មន្ទីរពេទ្យដោយខ្លួនយើងតែឯងឡើយ ប៉ុន្តែយើងសង្ឃឹមយ៉ាងមុតមាំថា ការឧបត្ថម្ភរបស់លោកអ្នក និងពីស្ថាប័នផ្សេងៗនឹងអាចធ្វើអោយមានភាពប្រសើរឡើងសម្រាប់មន្ទីរពេទ្យគន្ធបុប្ផាក្នុងការជួយសង្គ្រោះជីវិតកុមារកម្ពុជា។
ទទួលចុះឈ្មោះជិះកង់ចាប់ពីថ្ងៃទី១ មិនា រហូតដល់ថ្ងៃទី១០ ខែមេសា។ ចំណែកអ្នកចង់ចូលរួមឧបត្ថម្ភក្នុងព្រឹត្តិការណ៍ យើងនឹងចាប់ទទួលចាប់ពីថ្ងៃផ្សាយដំណឹងនេះ រហូតដល់ថ្ងៃទី១ ខែមេសា៕
យើងខ្ញុំសង្ឃឹមយ៉ាងមុតមាំថានឹងទទួលបានដំណឹងល្អពីលោកអ្នក។
ព័ត៌មានបន្ថែមអំពីការឧបត្ថម្ភ ទាក់ទង កញ្ញា ហង្ស សុវណ្ណារី ០១៦ ២៤៤ ២៥៥
អ៊ីមែល :
www.facebook.com/cyclingcommunityclub
សូមលោក លោកស្រីមេត្តាទទួលនូវការគោរពដ៏ខ្ពង់ខ្ពស់អំពីយើងខ្ញុំ
ប្រធាន ក្រុមអ្នកជិះកង់ដើម្បីសហគមន៏
គិម ប៊ុនថាន់
០១២៦៥២១១១ / ០១៥៦៥២១១១
© រក្សាសិទ្ធិដោយ thmeythmey.com