ពីនេះ ពីនោះ
ការវង្វេងក្នុងសេចក្ដីសុខ មិនមែនជាសុភមង្គលយូរអង្វែងរបស់មនុស្សទេ
× ភ្នំពេញ៖ ភាពស្រណុកសុខស្រួលគឺជាអ្វីដែលមនុស្សគ្រប់ៗរូបចង់បានសម្រាប់ជីវិតរបស់ខ្លួន។ ប៉ុន្តែចំណង់ទាំងវង្វេងចំពោះសេចក្ដីស្រណុក វាគឺជាអាសន្ន និងសេចក្ដីស្លាប់។ ព្រោះភាពស្រណុកស្រួលបែបនោះ វាជាទម្លាប់របស់មនុស្សខ្ជិលច្រអូស ដែលបណ្ដាលឲ្យពួកគេមានភាពអន់ខ្សោយ ទទួលបរាជ័យ មានភាពទុរគត និងបាត់បង់កិត្តិយស។
មនុស្សដែលមិនសកម្ម ស្នាក់នៅតែផ្ទះ គ្មានការប្រឹងប្រែង ហើយចង់បានសេចក្ដីសុខ រហូតរំពឹងមានអ្នកដទៃយកសេចក្ដីសុខមកឲ្យខ្លួន ថ្ងៃណាមួយបុគ្គលនោះនឹងក្លាយជា មនុស្សមានភាពកំសាក ហើយនៅពេលដែលខ្លួនប្រឈមនិងភាពលំបាក នឹងត្រូវបោះបង់ចោល លះបង់ការតស៊ូ។ នៅពេលដែលដំណើរទៅរកសុភមង្គល ដូចបុគ្គលប្រភេទនេះ រមែងជួបប្រទះនូវផល្ធផលដែលផ្ទុយស្រឡះពីការរំពឹងទុករបស់គេ។ គេអាចនឹងបាត់បង់អ្វីៗដែលខ្លួនកំពុងមាន ខណៈពេលដែលក្ដីប្រាថ្នាទាំងឡាយរបស់គេមិនទាន់ទទួលបានផង។
ទីបំផុតមនុស្សដែលចង់បានសេចក្ដីសុខ ហើយលះបង់ការតាំងចិត្ត ទឹកចិត្ត និងការព្យាយាមអាចប៉ះពាល់ដល់សេចក្ដីក្លាហាន និងភាពខ្លាំងក្លារបស់ខ្លួន ចំពោះអ្នកដែលនៅជុំវិញខ្លួន។ ផ្ទូយទៅវិញ សេចក្ដីស្រណុក សេច្ដីសុខពិតជាមិនអាចមានលក្ខណៈដាច់ខាត ចំពោះជីវិតរបស់បុគ្គលម្នាក់ឡើយ។ មានន័យថា សុខនិងទុក្ខ គឺដើទន្ទឹមគ្នា ជានិច្ច។ តែកាលមានការធ្វេសប្រហែសក្នុងការរក្សាសេចក្ដីសុខស្រួលតែបន្តិច រឿងអបមង្គលនឹងជ្រែកខ្លួនចូលមកភ្លាម។ អ្នកដែលអាចទទួលបានជោគជ័យជាមនុស្សដែលមានការតាំងចិត្ត ភាពអង់អាច និងមានទ្រព្យដែលនៅតែខិតខំបំពេញកិច្ចការរបស់គេរាល់ថ្ងៃ។ នោះក៏មានន័យថា លំបាក់រាល់ថ្ងៃ ខំប្រឹងរាល់ថ្ងៃ ព្យាយាមរាល់ថ្ងៃ នោះសេចក្ដីសុខវាដើរជាមួយគ្នារាល់ថ្ងៃ។ តែបើនៅស្ងៀមហើយរំពឹងថាបានសេចក្ដីសុខ ស្រណុកស្រួលវានឹងមិនអាចទៅរួចបានទេ៕
© រក្សាសិទ្ធិដោយ thmeythmey.com