ជាតិ
សាលារាជធានីចាប់ផ្ដើមគម្រោង«បញ្ជាភ្លើងស្ដុប បញ្ចៀសការកកស្ទះ» តាមស្តង់ដារជប៉ុន
× ភ្នំពេញ៖ សាលារាជធានីភ្នំពេញចាប់ផ្តើមគម្រោងប្រើប្រាស់បច្ចេកវិទ្យាបញ្ជាភ្លើងស្ដុប ដើម្បីដោះស្រាយការកកស្ទះចរាចរណ៍ តាមគំរូស្តង់ដារចរាចរណ៍ពីទីក្រុងតូក្យូប្រទេសជប៉ុន។ បច្ចេកវិទ្យាថ្មីនេះ នឹងត្រូវយកទៅបំពាក់ជាមួយភ្លើងស្តុបចាស់ដែលនឹងត្រូវកែលម្អ និងភ្លើងស្តុបថ្មីចំនួន១០០កន្លែង ក្នុងរាជធានីភ្នំពេញ។ គម្រោងនេះ នឹងត្រូវសម្រេចបានមុនចូលឆ្នាំខ្មែរខាងមុខ។
ក្នុងជំនួបពិភាក្សាការងាររវាងមន្ត្រីជំនាញសាលារាជធានីភ្នំពេញ និងមន្ត្រីអង្គការចៃកាជប៉ុន នៅថ្ងៃទី១២ខែកុម្ភៈ លោក ម៉ាសា ស៊ូកូតូ អ្នកជំនាញការជប៉ុនបានបញ្ជាក់ថា ការកែលម្អនិងដំឡើងភ្លើងស្តុបថ្មីនេះ ត្រូវបានធ្វើឡើងដោយមានការបំពាក់កាមេរ៉ាបញ្ជូនទិន្នន័យចរាចរណ៍ទៅកាន់ការិយាល័យត្រួតពិនិត្យ ដើម្បីបញ្ជាភ្លើងស្តុប បញ្ជៀសចរន្តយាន្តជំនិះចេញពីតំបន់កកស្ទះ។ គម្រោងនេះ ចាប់ផ្តើមអនុវត្តពីខែកុម្ភៈ ដល់ខែមេសា ក្រោមជំនួយឥតសំណងពីរដ្ឋាភិបាលជប៉ុន។
លោក ម៉ាសា ស៊ូកូតូ បញ្ជាក់ថា គម្រោងមួយនេះ គឺជាយុទ្ធសាស្ត្របញ្ចៀសការកកស្ទះចរាចរណ៍រយៈពេលខ្លី ខណៈយុទ្ធសាស្ត្ររយៈពេលវែងធ្វើឡើងតាមរយៈការសាងសង់ស្ពានអាកាស ផ្លូវក្រោមដី រថភ្លើងល្បឿនលឿន និងផ្លូវអាកាសល្បឿនលឿនជាដើម។ លោក ក៏បានស្នើឲ្យមានការចូលរួមគោរពច្បាប់ចរាចរណ៍ពីសំណាក់ប្រជាពលរដ្ឋផងដែរ ដើម្បីឲ្យការដោះស្រាយបញ្ហាកកស្ទះចរាចរណ៍ អាចទទួលបានជោគជ័យ។
អ្នកជំនាញការជប៉ុនរូបនេះ អះអាងថា ការដោះស្រាយបញ្ហាកកស្ទះចរាចរណ៍បានកាន់តែលឿនកាន់តែល្អ។ បើតាមលោក ម៉ាសា ស៊ូកូតូ ក្នុងមួយខែៗ បញ្ហាកកស្ទះចរាចរណ៍ក្នុងរាជធានីភ្នំពេញបាននាំឱ្យខាត់បង់ថវិការហូតដល់ជាង ៦លានដុល្លារអាមេរិក។ នេះនៅមិនទាន់រាប់បញ្ជូលពីការពីការខាតបង់ពេលវេលា និងគ្រោះថ្នាក់ចរាចរណ៍ទៀតផង៕
ប្រភពពី AKP
© រក្សាសិទ្ធិដោយ thmeythmey.com