ព្រះអង្គម្ចាស់ក្សត្រីយ៍ថៃ សិរិនថន យាងសម្ពោធសមិទ្ធផលជាច្រើននៅកម្ពុជា

ជាតិ

ព្រះអង្គម្ចាស់ក្សត្រីយ៍ថៃ សិរិនថន យាងសម្ពោធសមិទ្ធផលជាច្រើននៅកម្ពុជា

16, Feb 2016 , 8:52 am

រូបភាព

ដោយ: លាង ដឺលុច (Leang Delux)

ព្រះអង្គម្ចាស់ក្សត្រីយ៍ថៃ មហាចក្រី សិរិនថន នឹងយាងបំពេញព្រះរាជទស្សនកិច្ច៣ថ្ងៃនៅក្នុងប្រទេសកម្ពុជាចាប់ពីថ្ងៃទី២២ដល់ថ្ងៃទី២៤កុម្ភៈ ក្នុងសប្តាហ៍ក្រោយនេះ។ ព្រះអង្គម្ចាស់ក្សត្រីយ៍នឹងយាងសម្ពោធសមិទ្ធផលមួយចំនួនក្នុងវិស័យអប់រំ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។

នៅក្នុងប្រទេសកម្ពុជា ព្រះអង្គម្ចាស់ក្សត្រី មហាចក្រី សិរិនថន នឹងយាងធ្វើជាអធិបតីជាមួយសម្តេចនាយករដ្ឋមន្ត្រី ហ៊ុន សែន ក្នុងព្រះរាជពិធីបញ្ចុះបឋមសិលាសាងសង់វិទ្យាស្ថានបច្ចេកវិទ្យាកំពង់ស្ពឺក្នុងខេត្តកំពង់ស្ពឺ។

សេចក្តីប្រកាសព័ត៌មានរបស់ក្រសួងការបរទេសកម្ពុជាបានបញ្ជាក់ផងដែរថា ព្រះអង្គម្ចាស់ក្សត្រីយ៍ក៏នឹងយាងប្រគល់អគារប្រើប្រាស់ថាមពលពន្លឺព្រះអាទិត្យនៅវិទ្យាល័យកំពង់ឈើទាលក្នុងខេត្តកំពង់ធំ ជូនលោក ហង់ ជួន ណារ៉ុន រដ្ឋមន្ត្រីក្រសួងអប់រំផងដែរ។ ក្រៅពីនេះ ព្រះអង្គម្ចាស់ក្សត្រីយ៍ ក៏នឹងយាងចូលរួមក្នុងព្រះរាជពិធីសម្ពោធមណ្ឌលសុខភាពនៅខេត្តរតនៈគិរី និងស្លាកឈ្មោះថ្មីនៃវិទ្យាស្ថានបច្ចេកវិទ្យាកំពង់ឈើទាលនៅក្នុងខេត្តកំពង់ធំដូចគ្នា។ នេះបើតាមការសេចក្តីប្រកាសព័ត៌មានដដែល ដែលបន្ថែមថាព្រះអង្គម្ចាស់ក្សត្រីយ៍ក៏នឹងយាងទតសាលាបឋមសិក្សាមួយចំនួននៅតាមខេត្តនានាដែរ៕