ជាតិ
សង្គមជាតិ
សារព័ត៌មានថ្មីៗឧបត្ថម្ភថវិកាមួយចំនួនដល់សិល្បករចាប៉ីដងវែង គុយ ហ៊ីន ដែលកំពុងមានជំងឺ
× សិល្បករចាប៉ីដងវែងលោកព្រឹទ្ធាចារ្យ គុយ ហ៊ីន បានសម្រាកព្យាបាលជំងឺអស់រយៈពេលជាងកន្លះខែមកហើយនៅមន្ទីរពេទ្យរុស្ស៊ី។ ក្រោយពេលវះកាត់ជំងឺនៅថ្ងៃព្រហស្បតិ៍នេះ សិល្បករចាប៉ីដងវែងទីទ័លក្ររូបនេះ បានដង្ហោយរកជំនួយទាំងទឹកភ្នែក ដើម្បីចំណាយលើការព្យាបាលជំងឺរបស់ខ្លួន។ ព្រឹទ្ធាចារ្យចាប៉ីដងវែងរូបនេះ មានជំងឺស្ទះតម្រង់នោម និងជំងឺលើសឈាម។
កាលពីថ្ងៃព្រហស្បតិ៍អ្នកកាសែតនៃសារព័ត៌មានថ្មីៗ បានយកថវិកាមួយចំនួនជូនលោកតា គុយ ហ៊ីន ដើម្បីជាចំណែកដ៏តូចមួយលើការចំណារបស់ក្រុមគ្រួសារលោកតា។ នេះជាកម្មវិធីសប្បុរសធម៌របស់សារព័ត៌មានថ្មីៗ ដែលសារព័ត៌មាននេះ តែងតែជួយដល់កុមារកំព្រា និងជនចាស់ជរាទីទ័លក្រ ជាដើម។
តាមរយៈសារព័ត៌មានថ្មីៗ សិល្បៈករចាប៉ីដងវែងខងលើ ក៏បានអំពាវនាវរកជំនួយដោយសំឡេងខ្សាវៗយ៉ាងនេះថា៖«ខ្ញុំបាទ គុយ ហ៊ីន អ្នកចាប៉ី ដ៏កំសត់ សូមអំពាវនាវឲ្យសប្បុរសជនក្នុងប្រទេសនិងក្រៅប្រទេសជួយឧបត្ថម្ភដល់ខ្ញុំផង»។
លោក គុយ ហ៊ីន ជាសិល្បករចាប៉ីដងវែងដ៏មានទេពកោសល្យមួយរូបនៅកម្ពុជា បន្ទាប់ពីលោកតា ប្រាជ្ញ ឈួន និងលោកតា គង់ ណៃ។ កាលមិនទាន់ធ្លាក់ខ្លួនឈឺអ្នកចាប៉ី មកខេត្តពោធិ៍សាត់រូបនេះ តែងច្រៀងចាប៉ីជាមួយដៃគូមួយចំនួនដូចជា លោកតា គង់ ណៃ និងស្មៀន ប៉េ ជាដើមនៅតាមកម្មវិធីបុណ្យឬទូរទស្សន៍ក្នុងស្រុកមួយចំនួន៕
បើបងប្អូនចង់ឧបត្ថម្ភគាត់ សូមទាក់ទងលេខទូរសព្ទលោកតា គុយ ហ៊ីន ០១៧៨៥៦៣៩៦ ។
ដោយឡែកកាលពីថ្ងៃព្រហស្បតិ៍នោះដែរ សារព័ត៌មានថ្មីៗ ក៏ផ្តល់ថវិកាមួយចំនួនដល់អ្នកជំងឺម្នាក់មកពីខេត្តស្ទឹងត្រែង ដែលគ្មានថវិកា ហើយសម្រាកព្យាបាលនៅមន្ទីរពេទ្យរុស្ស៊ី៕
© រក្សាសិទ្ធិដោយ thmeythmey.com