ជាតិ
លោក លី សុវណ្ណ ថា មានអ្នកជំងឺផ្ដាសាយជ្រូក សម្រាកព្យាបាលជារៀងរាល់ថ្ងៃ
× អនុប្រធាននាយកដ្ឋានប្រយុទ្ធ នឹងជំងឺឆ្លង និងជាអ្នកនាំពាក្យនៃក្រសួងសុខាភិបាល លោក លី សុវណ្ណ បានបញ្ជាក់ថា នៅកម្ពុជាមានអ្នកកើតជំងឺផ្ដាសាយ H1N1 ដែលគេស្គាល់ថាជាផ្តាសាយជ្រូកនោះ មកព្យាបាលរាល់ថ្ងៃ រាល់សប្ដាហ៍ ហើយត្រូវបានព្យាបាលសះស្បើយ។
លោក លី សុវណ្ណ បានបញ្ជាក់ថា ជំងឺផ្ដាសាយប្រភេទនេះ គឺតែងមានឆ្លងជាធម្មតា ដែលមានអ្នកជំងឺមកព្យាបាលនៅតាមបណ្ដាសុខាភិបាល ។ តែលោកថា បើអ្នកកើតជំងឺផ្ដាសាយH1N1 នេះ មានការរលាកសួត នោះពួកគេត្រូវទទួលបានការព្យាបាលដោយត្រូវប្រើថ្នាំផ្សះ និងព្យាបាលពិនិត្យលើបាតេរីនោះ។
ថ្លែងប្រាប់សារព័ត៌មានថ្មីៗ លោកវេជ្ជបណ្ឌិតរូបនេះបញ្ជាក់ដូច្នេះថា៖«ជំងឺផ្ដាសាយH1N1នេះ គឺជាជំងឺផ្ដាសាយប្រភេទចាស់ ដែលយើងបានព្យាបាលជាធម្មតា ដូចជាការព្យាបាលបញ្ចុះកំដៅ ឲ្យអ្នកជំងឺគេងឲ្យបានគ្រប់គ្រាន់ និងហាត់ប្រាណឲ្យទៀងទាត់ជាដើម។ ហើយវាមិនមែនជាជំងឺដែលយើងមានការព្រួយបារម្ភដូចមុនឡើយ សូម្បីតែរាល់ថ្ងៃនេះក៏មានអ្នកមកព្យាបាលជំងឺនេះដែរ»។
បើតាមលោក លី សុវណ្ណ អ្នកដែលកើតជំងឺផ្ដាសាយH1N1នេះ ហើយប៉ះពាល់ដល់ជីវិតនោះ លុះត្រាតែភាពស៊ាំរបស់ពួកគេខ្សោយខ្លាំងពេក ដែលអាចធ្វើឲ្យមេរោគចូលក្នុងខ្លួនពួកគេ បង្កទៅឲ្យប៉ះពាល់ដលបេះដូង និងផ្លូវដង្ហើមជាដើម។ លោកថា ជំងឺផ្ដាសាយH1N1 អាចគឺកើតឡើងប្រែប្រួលតាមរដូវ ដូច្នេះកុមារក្រោមអាយុ៥ឆ្នាំ និងមនុស្សចាស់ចាប់ពីអាយុ៦៥ឆ្នាំឡើងទៅ គួរតែទៅចាក់វ៉ាកសាំងការពារជំងឺផ្ដាសាយនេះ និងជំងឺផ្សេងៗ។
ជំងឺផ្ដាសាយ H1N1 ដែលគេស្គាល់ថាជាផ្តាសាយជ្រូក បានផ្ទុះឡើងកាលពីឆ្នាំ២០០៩ នៅតាមបណ្ដាប្រទេសទូទាំងពិភពលោក ហើយជំងឺនេះក៏បានបង្កឲ្យប្រជាពលរដ្ឋកម្ពុជាស្លាប់បាត់បង់ជីវិតច្រើនផងដែរ ក្នុងអំឡុងឆ្នាំ២០០៩ និង២០១០ ។ នេះបើតាមលោកវេជ្ជបណ្ឌិត លី សុវណ្ណ៕
© រក្សាសិទ្ធិដោយ thmeythmey.com