ជាតិ
កូរ៉េ ជួយ ៤លានដុល្លារ សង់មជ្ឈមណ្ឌលបណ្តុះបណ្តាលអភិវឌ្ឍន៍ជនបទនៅកំពង់ស្ពឺ
× ភ្នំពេញ៖ ប្រទេសកូរ៉េខាងត្បូងបានផ្តល់ជំនួយជាទឹកប្រាក់ចំនួន៤លានដុល្លារអាមេរិក ដើម្បីសាងសង់មជ្ឈមណ្ឌលបណ្តុះបណ្តាលអភិវឌ្ឍន៍ជនបទមួយកន្លែង ក្នុងខេត្តកំពង់ស្ពឺ។
មជ្ឈមណ្ឌលបណ្តុះបណ្តាលអភិវឌ្ឍន៍ជនបទមួយតម្លៃ ៤លានដុល្លារអាមេរិក ត្រូវបានសាងសង់ក្នុងខេត្តកំពុងស្ពឺ ក្រោមជំនួយរបស់រដ្ឋាភិបាលកូរ៉េខាងត្បួង។ មជ្ឈមណ្ឌលនេះ នឹងក្លាយកន្លែងបណ្តុះបណ្តាលធំមួយ ដល់មន្ត្រីមូលដ្ឋាន ដើម្បីអភិវឌ្ឍសហគមន៍ជនបទនៃខេត្តមួយចំនួន។ លើផ្ទៃដីប្រមាណ១០ហិកតា មជ្ឈមណ្ឌលនេះ ត្រូវបានសាងសង់ក្នុងសង្កាត់ច្បារមន ក្រុងច្បារមន ហើយនឹងដាក់ឲ្យប្រើប្រាស់នៅដើមឆ្នាំ២០១៧ខាងមុខ។មជ្ឈមណ្ឌលបណ្តុះបណ្តាលមួយនេះ គឺជាផ្នែកមួយនៃគម្រោងអភិវឌ្ឍន៍ជនបទរបស់ទីភ្នាក់ងាសហប្រតិបត្តិការអន្តរជាតិកូរ៉េ (KOICA)។
គួរបញ្ជាក់ថា កន្លងមក រដ្ឋាភិបាលកូរ៉េ តាមរយៈទីភ្នាក់ងារKOICA បានបង្កើតគម្រោងអភិវឌ្ឍន៍ជនបទ«ចលនាភូមិថ្មី»ដែលចាប់ផ្តើមពីឆ្នាំ២០១៤ ដល់ឆ្នាំ២០១៨ ក្នុងចំនួនទឹកប្រាក់ ៨លានដុល្លារអាមេរិក។គម្រោងនេះ ត្រូវបានអនុវត្តក្នុងខេត្តគោលដៅចំនួន៣ រួមមាន ខេត្តកំពង់ស្ពឺ ខេត្តតាកែវ និងខេត្តត្បួងឃ្មុំ។ ក្នុងនោះគម្រោងអភិវឌ្ឍន៍មូលដ្ឋានចំនួន២៧៨គម្រោងកំពុងត្រូវបានអនុវត្តន៍ក្នុងភូមិចំនួន ៣០ក្នុងខេត្តទាំងបីនេះ៕
ប្រភពពី AKP
© រក្សាសិទ្ធិដោយ thmeythmey.com