កុំអាងកេរឪ!
-ថ្លែងពីគ្រួសារមហាសម្បូរ សម្បត្តិហៀរហូរសម្បូរមិនខ្វះ
ក្នុងទឹកមានត្រីដីរ៉ែព្រៃក្រាស់ កូនសប្បាយណាស់ចាយមិនស្រណោះ។
-លក់ចាយ ចាយលក់វក់នឹងហ៊ឺហា មិនដែលខ្វល់ថាមានថ្ងៃណាអស់
កេរឪចែកឲ្យក្រពះក្រៀមក្រោះ ខ្លួនឯងចាយអស់កូនចៅបានអី?
-ចំណេះមិនមានរៀនក៏មិនប្រឹង គេថាអាងខឹងប្រឹងប្រាប់កុំស្តី
គិតថាខ្លួនខ្លាំងតាំងជាសេដ្ឋី ចាយកេរខុសអីកេរឪខ្ញុំទេ។
-បើចាយភ្លេចគិតពិតណាស់ធ្លាក់ជ្រោះ មានគ្រាជូបគ្រោះព្រោះភ្លេចរិះរេ
អាងកេរស្តុកស្តម្ភមិនខំនឹងគេ ក្រែងដល់វ័យជ្រេជ្រែចេញលែងរួច។
-ឈប់អាងកេរឪប្រឹងទៅអ្នក នាង ឈប់ឈកាច់រាងសប្បាយច្រៀងហួច
ប្រឹងរកវិជ្ជាគិតគ្នាផ្តើមផ្តួច គំនិតគិតកួចផ្តួចផ្តុំផ្គុំទ្រព្យ។
-ខ្មាសអ្នកជិតខាងគេសាងស្នាដៃ ប្រឹងទាំងយប់ថ្ងៃគេកែច្នៃជាប់
ស្វែងគ្មានទំនេរគេខ្លាចអភ័ព្វ គេមិនទម្លាប់លក់កេរដូចយើង៕
និពន្ធដោយ ប៉ាកាខ្មៅ