ជាតិ
សង្គមជាតិ
រថយន្តពាក់ស្លាកលេខប៉ូលិសត្រូវបិទរូបសញ្ញានគរបាលជាតិ ឈ្មោះអង្គភាព និងអក្សរ POLICE
× ភ្នំពេញ៖ អគ្គស្នងការដ្ឋាននគរបាលជាតិបានបង្គាប់ប្រធានសេនាធិការដ្ឋាន នាយកដ្ឋាន អង្គភាព និងស្នងការនគរបាលទាំង ២៥រាជធានី ខេត្ត ឲ្យបិទរូបសញ្ញានគរបាលជាតិ ឈ្មោះអង្គភាព និងអក្សរ POLICE នៅទ្វារមុខសងខាងរថយន្ត និងលើគូទជលយានយន្តទាំងអស់ដែលពាក់ស្លាកលេខនគរបាល។ នេះបើតាមលិខិតជូនដំណឹងអគ្គស្នងការដ្ឋាននគរបាលជាតិ ចុះថ្ងៃទី១៥ ខែកុម្ភៈ ឆ្នាំ២០១៦នេះ។
បើយោងតាមលិខិតស្តីពី ការបិទរូបសញ្ញានគរបាលជាតិ នៅទ្វារមុខសងខាងរថយន្ត ឬលើគូទជលយានយន្តពាក់ស្លាកលេខនគរបាលដែលបានចុះបញ្ជីសារពើភណ្ឌទ្រព្យសម្បត្តិរដ្ឋក្រសួងមហាផ្ទៃ លោក គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិបានបង្គាប់ប្រធានសេនាធិការដ្ឋាន ប្រធាននាយកដ្ឋានកណ្តាល ប្រធាននាយកដ្ឋាន អង្គភាព និងស្នងការនគរបាលរាជធានី ខេត្តទូទាំងប្រទេស ឲ្យអនុវត្តតាមការណែនាំនេះ ដើម្បីបំពេញបែបបទសុំលតាបត្របង់ពន្ធយានយន្តជាបន្ទុករបស់រដ្ឋ។ តាមលិខិតខាងលើ សេចក្តីណែនាំនេះ ផ្អែកតាមប្រកាសលេខ ៣៥៥៩ ប្រកចុះថ្ងៃទី៧ ខែកក្កដា ឆ្នាំ២០១៣ ស្តីពី កាចុះបញ្ជី ការផ្តល់បណ្ណសម្គាល់ និងស្លាកលេខយានយន្តគ្រប់គ្រងដោយក្រសួងមហាផ្ទៃ។
លោក គៀត ច័ន្ទថារិទ្ធ បញ្ជាក់ថា៖«ចំពោះរថយន្ត និងជលយានពាក់ផ្លាកលេខនគរបាលដែល បានចុះបញ្ជីសារពើភ័ណ្ឌទ្រព្យសម្បត្តិរដ្ឋក្រសួងមហាផ្ទៃ តម្រូវឲ្យបិទរូបសញ្ញានគរបាលជាតិ ឈ្មោះអង្គភាព និងអក្សរ (POLICE) នៅទ្វារមុខសងខាងរថយន្ត ឬលើគូទជលយានយន្ត សម្រាប់បំពេញបែបបទសុំលតាបត្របង់ពន្ធយានយន្តជាបន្ទុករបស់រដ្ឋ»៕
Tag:
ប៉ូលិស
គៀត ច័ន្ទថារិទ្ធ
© រក្សាសិទ្ធិដោយ thmeythmey.com