កីឡាជាតិ
ជាតិ
សិក្ខាកាម៥០នាក់ទទួលបានការបណ្តុះបណ្តាលពីគ្រូឧទ្ទេស FIBA ASIA
× សិក្ខាកាមចំនួន៥០នាក់(ស្រី១៨នាក់) តំណាងឲ្យមន្ទីរ ស្ថាប័នអប់រំរាជធានី ខេត្ត ក្លិបជាសមាជិកសហព័ន្ធកីឡាបាល់បោះកម្ពុជា និងវិទ្យាស្ថានអប់រំកាយ និងកីឡា ទទួលបានការបណ្តុះបណ្តាលវគ្គបំប៉នអាជ្ញាកណ្តាលកម្រិតជាតិឆ្នាំ២០១៦ ពីគ្រូឧទ្ទេសជនជាតិឥណ្ឌា លោក NARESH CHANDER ដែលជាគ្រូបង្វឹកអាជ្ញាកណ្តាលនៅ FIBA ASIA និងជាគណៈគ្រប់គ្រង FIBA ASIA ដែលពោពេញទៅដោយជំនាញ និងបទពិសោធន៍លើប្រភេទកីឡាបាល់បោះ។
សិក្ខាកាមកម្ពុជាចំនួន៥០នាក់(ស្រី១៨នាក់)ទទួលបានការបណ្តុះបណ្តាលជំនាញ នៃវគ្គបំប៉នអាជ្ញាកណ្តាលកម្រិតជាតិឆ្នាំ២០១៦ ដែលមានគ្រូឧទ្ទេសជនជាតិឥណ្ឌាដែលពោរពេញទៅជំនាញ និងបទពិសោធ លោក NARESH CHANDER ដែលជាថ្នាក់ដឹកនាំគ្រូបង្វឹកកីឡាបាល់បោះអាស៊ី និងជាគណៈគ្រប់គ្រង FIBA ASIA។ វគ្គបណ្តុះបណ្តាលនេះធ្វើឡើងរយៈពេលបីថ្ងៃចាប់ពីថ្ងៃទី២៥ ដល់ថ្ងៃទី២៧ ខែកុម្ភៈ ឆ្នាំ២០១៦ នៅពហុកីឡដ្ឋានជាតិ ក្នុងគោលបំណង ដើម្បីពង្រឹងចំណេះដឹង និងសមត្ថភាព អាជ្ញាកណ្តាលក៏ដូជាគ្រូបង្វឹកឲ្យកាន់មានការរីកចម្រើន ដើម្បីត្រៀមខ្លួនក្នុងការធ្វើជាម្ចាស់ផ្ទះស៊ីហ្គេមលើកទី៣២ ឆ្នាំ២០២៣។
លោក NARESH CHANDER ជាថ្នាក់ដឹកនាំ FIBA ASIA និងអ្នកដឹកនាំអាជ្ញាកណ្តាលនៅ FIBA ASIA បានមានប្រសាសន៍ថា FIBA ASIA មានសមាជិកទាំងចំនួន៤៥ប្រទេស នេះជាលើកទីមួយហើយនៅអាស៊ី និងជាលើកទីមួយផងដែរសម្រាប់កម្ពុជាដែល FIBA ASIA បើកវគ្គបណ្តុះបណ្តាលបច្ចេកទេស ជំនាញ និងច្បាប់ថ្មីដែល FIBA ASIA បានភិវឌ្ឍន៍ ដល់មន្ត្រីអាជ្ញាកណា្តលកម្រិតជាតិដល់កម្ពុជា។ ហើយលោកសង្ឃឹមថា ការបណ្តុះបណ្តាលរយៈពេលបីថ្ងៃនេះនឹងទទួលបានលទ្ធផល ហើយសិក្ខាកាមទាំងអស់នឹងទទួលបានអ្វីដែលថ្មីសម្រាប់ខ្លួន ដើម្បីពង្រឹង និងអភិវឌ្ឍន៍ សមត្ថភាព និងបច្ចេកទេសឲ្យកាន់តែមានការរីកចម្រើន។
ជាមួយគ្នានេះ លោក អ៊ុក សិទ្ធិជាតិ អគ្គនាយកនៃអគ្គនាយដ្ឋានកីឡា នៃក្រសូងអប់រំយុវជន និងកីឡា និងជាអនុប្រធានសហព័ន្ធកីឡាបាល់បោះកម្ពុជា បានមានប្រសាសន៍ថា បច្ចុប្បន្នវិស័យកីឡានៅកម្ពុជាមានការរីកចម្រើនគួរឲ្យកត់សម្គាល់ ក្នុងនោះកីឡាបាល់បោះកម្ពុជាបាននឹងកំពុងជំរុញ និងបំផុសឲ្យមានសកម្មភាពជាបន្តបន្ទាប់ដូចជាការប្រកួតលីកប្រចាំឆ្នាំ និងការប្រកួតយុវជនផងដែរ។ ហើយលោកក៏បានកោតសរសើរដល់ FIBA ASIA ដែលបានផ្តល់វគ្គបំប៉នដល់មន្ត្រីអាជា្ញកណ្តាលកម្រិតជាតិកម្ពុជា ហើយលោកសង្ឃឹមថា បន្ទាប់ពីទទួលបានការបណ្តុះបណ្តាលសិក្ខាកាមទាំងអស់នឹងក្លាយជាអាជ្ញាកណ្តាល និងមន្ត្រីលើកទឹកតុ ដ៏ល្អទៅទៅថ្ងៃអនាគត៕
© រក្សាសិទ្ធិដោយ thmeythmey.com