ពីនេះ ពីនោះ
៣វិស័យរីកចម្រើន ប្រទេសនឹងខ្លាំងក្លា!
×
ភ្នំពេញ៖ លោក Plato ជាទស្សនវិទូជនជាតិក្រិច ដែលបានបន្សល់ទ្រឹស្តីជាង២ពាន់ឆ្នាំមកហើយ ទាក់ទងនឹងរដ្ឋគំរូ ដោយបានបែកចែកវិធីសាស្ត្រគ្រប់គ្រងយ៉ាងច្បាស់លាស់។ គាត់បានចែកមនុស្សជាបីក្រុម គឺក្រុមអ្នកដឹកនាំ ក្រុមអ្នកការពារ និងក្រុមអ្នកផលិត។
លោក ផ្លាតុង បានផ្តល់ទស្សនៈចំពោះរដ្ឋគំរូ ថាត្រូវតែមានយុត្តិធម៌។ ភាពយុត្តិធម៌ គឺស្ថិតនៅថាត្រង់ថា ពលរដ្ឋម្នាក់ៗត្រូវមានការងារធ្វើទៅតាមឧបនិស្ស័យ សមត្ថភាព និងបំណិនប្រសប់រៀងៗខ្លួន។ គាត់បានបែងចែកមនុស្សនៅក្នុងសង្គមជា៣ក្រុម គឺ៖
ក្រុមទី១៖ អ្នកដឹកនាំ គឺជាប្រភេទមនុស្សដែលមានចំណេះដឹងជ្រៅជ្រះ មានភាពវៃឆ្លាត និងមានគុណធម៌។
ក្រុមទី២៖ អ្នកការពារ គឺជាអ្នកដែលមានសេចក្តីក្លាហាន និងមានភាពស្មោះត្រង់។ ក្រុមនេះ ចង់សំដៅលើកងទ័ព នគរបាល កងរាជអាវុធហត្ថ…។
ក្រុមទី៣៖ អ្នកផលិត គឺសំដៅលើពួកសិប្បករ ពាណិជ្ជករ។ ពួកឈ្មួញ សិប្បករ និងម្ចាស់ដី គឺជាអ្នកផលិតសម្ភារៈដែលជាទ្រព្យរបស់នគរ។ ក្រុមនេះមិនអាចចៀសផុតពីលក្ខណៈប៉ះទង្គិចជាមួយរដ្ឋឡើយ។ លើសពីនេះ ការខិតខំសន្សំទ្រព្យសម្បត្តិ និងគ្រប់គ្រងទ្រព្យសម្បត្តិ គឺជាហេតុនាំឲ្យមានគម្លាតអ្នកមាននិងអ្នកក្រខ្លាំង។ បញ្ហានេះ អាចធ្វើឲ្យខូចរចនាសម្ព័ន្ធរដ្ឋគំរូ។ ដើម្បីរក្សានូវស្ថានភាពនេះ លោក ផ្លាតុង បានផ្តល់ទស្សនៈថា ត្រូវតែបង្កើតប្រព័ន្ធអប់រំ ពិសេសមួយ សម្រាប់អ្នកដឹកនាំ និងអ្នកការពារ។ ប្រព័ន្ធអប់រំទៀតសោត គឺត្រូវបញ្ចូលសិល្បៈតូរតន្ត្រី និងអត្តពលកម្ម ពីព្រោះ តូរតន្ត្រីពង្រឹងដល់ដួងព្រលឹង អប់រំឲ្យស្រលាញ់ជាតិមាតុភូមិ។ ចំណែកឯ អត្តពលកម្ម ជួយពង្រឹងរាងកាយឲ្យរឹងមាំ ក្នុងការរៀបចំពលរដ្ឋ ដើម្បីការពាររដ្ឋរបស់ខ្លួន៕ (ដកស្រង់ពីសៀវភៅ«វិទ្យាសាស្ត្រនយោបាយ និងប្រវត្តិគំនិតនយោបាយ» រៀបរៀងដោយ បណ្ឌិត ឈុន សារ៉េត
© រក្សាសិទ្ធិដោយ thmeythmey.com