ពីនេះ ពីនោះ
ជ្រូកទឹក សព្វថ្ងៃមាននៅតែខេត្តកំពត និងក្រុងកែបប៉ុណ្ណោះ
×
ភិនភាគ៖ វាមានទំហំធំប្រហាក់ប្រហែលនឹងផ្សោតដែរ ប៉ុន្តែវាធាត់ជាងហើយមានភ្លុក២ដូចដំរី ដែលដុះចេញពីអញ្ចាញធ្មេញ និងមានព្រុយចំហៀងធំរាងដូចច្រវាទូក។ វាមានស្បែករលោងពណ៌ត្នោត ឬប្រផេះក្រម៉ៅ និងដុះរោមមួយ។ រន្ធច្រមុះស្ថិតនៅទីតាំងចុងច្រមុះ ហើយមានសន្ទះគ្របសម្រាប់បិទនៅពេលវាមុជទៅក្នុងទឹក។ ប្រវែងទើបកើត ១-១,៥ម ពេញវ័យ ៣,៣-៤,១ម និងទម្ងន់ ទើបកើត ២៥-៣៥គ.ក ពេញវ័យ ១០០០ គ.ក ។
ជីវសាស្ត្រ៖ ជ្រូកទឹករស់នៅជាក្រុមដែលមានចំនួនរហូតដល់រាប់រយ ដោយធ្វើចលនាយឺតៗក្នុងល្បឿនមធ្យមប្រមាណ ១០គ.ម/ម។ ហើយចូលចិត្តរស់នៅតំបន់ដែលមានទឹករាក់ៗ និងសំបូរទៅដោយស្មៅសមុទ្រដែលជាចំណីអាហាររបស់វា។
រប៉ាយរស់នៅ៖ សត្វប្រភេទនេះមាននៅដែនសមុទ្រកម្ពុជាតាមតំបន់មានស្មៅសមុទ្រនៃខេត្តកោះកុង ឆកកំពង់សោម កោះរុង និងកោះរុងសន្លឹម ហើយសព្វថ្ងៃមាននៅខេត្តកំពត និងក្រុងកែបតែប៉ុណ្ណោះ។ គេបានរកឃើញផងដែរនៅតាមបណ្តោយឆ្នេរមហាសមុទ្រឥណ្ឌា និងប៉ាស៊ីហ្វិកប៉ែកខាងលិច។
ស្ថានភាពអភិរក្ស៖ ជ្រូកទឹកជាប្រភេទមានដោយកម្រ និងបានចុះបញ្ជីក្រហម IUCN (VU) ជាប្រភេទងាយរងគ្រោះលើពិភពលោក ប្រភេទនេះត្រូវបានចុះបញ្ជីឧបសម្ព័ន្ធ ១ របស់អនុសញ្ញា សាយតេស។
© រក្សាសិទ្ធិដោយ thmeythmey.com