ពីនេះ ពីនោះ
កំណាព្យ៖ ព្រឹកស្តាយលេខ ល្ងាចស្តាយលុយ!
× និពន្ធដោយ ប៉ាកកាខ្មៅ
កំណាព្យ បទពាក្យ ៨
-ព្រឹកឡើងស្តាយលេខល្ងាចនឹកស្តាយលុយ លេខដុះកន្ទុយមានអីដែលទៀង
ចាក់នៅត្បូងឃ្មុំយំដល់ស្វាយរៀង
កូនបានត្រឹមសៀងមេជប់លៀងស៊ុប។
-ខ្លះមិនរកស៊ីវក់វីរឿងល្បែង អស់ផ្ទះសម្បែងវក់លេងលក់គ្រប់
ស្រែលើស្រែក្រោមដីក្បែរទំនប់ អស់ពីអាគុបងប់លក់អាសង់។
-យូរៗត្រូវម្តងអួតបងអួតប្អូន ឪម៉ែហៅកូនជុំផឹករហង់
ភ្លេចកាលមុនចាញ់ស្ទើរអស់ទាំងកង់ ម្ចាស់លុយដំកង់មកជុំទារការ។
-ចាស់ថារឿងល្បែងមេមិនដែលក្រោម មិនដូចឆើតឆោមចាញ់ប្រែមុខខ្លា
រករឿងអ្នកផ្ទះយកលេសផឹកស្រា ចោលអស់កិច្ចការទាំងវស្សាប្រាំង។
-ចាស់ផ្តាំថាល្បែងតែងនាំវិនាស មន្ត្រីឬរាស្ត្រស្លូតកាចខ្សោយខ្លាំង
បើដឹងញៀនល្បែងប្រឹងប្រែងតតាំង ធ្វើចិត្តឲ្យខ្លាំងយកឈ្នះខ្លួនឯង៕
© រក្សាសិទ្ធិដោយ thmeythmey.com