ជាតិ
នយោបាយជាតិ
បើសង្គ្រោះជាតិឈ្នះឆ្នោត មន្ត្រី ប្តី ប្រពន្ធ កូន និងចៅមន្ត្រីត្រូវប្រកាសទ្រព្យសម្បត្តិទាំងអស់
× ភ្នំពេញ៖ លោក ហូ វ៉ាន់ សមាជិកសភា មកពីគណបក្សសង្គ្រោះជាតិ បានលើកឡើងថា ប្រសិនបើយើងចង់បានប្រសិទ្ធភាពនៅក្នុងការងារគ្រប់គ្រង ការងាររដ្ឋបាល បម្រើសេវាសាធារណៈដល់មហាជនឲ្យមានតម្លាភាព កាត់បន្ថយអំពើរពុករលួយ និងត្រូវតាមគោលនយោបាយរបស់រាជរដ្ឋាភិបាល នោះគឺមន្ត្រីទាំងអស់ត្រូវហ៊ានប្រកាសទ្រព្យសម្បត្តិ ។
លោក ហូ វ៉ាន់ ដែលជាប្រធានគណៈកម្មការ អង្កេត បោសសំអាត និង ប្រឆាំងអំពើពុករលួយនៃរដ្ឋសភា ផងដែរនោះ បានលើកឡើងអំពីជំហរបស់គណបក្សសង្គ្រោះជាតិ ដោយអះអាងថា ប្រសិនបើគណបក្សខ្លួន ឈ្នះឆ្នោតបានទៅដឹកនាំរដ្ឋាភិបាល នៅអាណត្តិទី៦ គឺនៅឆ្នាំ២០១៨ខាងមុខនេះ គ្រប់សមាជិកទាំងអស់ត្រូវតែក្លាយជាគំរូ និងបង្ហាញពីភាពស្អាតស្អំរបស់ខ្លួន។ លោកបានលើកឡើងបែបនេះ នៅក្នុងកិច្ចសម្ភាសជាមួយអ្នកសារព័ត៌មាន នៅក្នុងសន្និសីទស្ដីពី «ការប្រកាសទ្រព្យសម្បត្តិដោយស្ម័គ្រចិត្ត» ដែលរៀចំឡើងដោយ អង្គការគណនេយ្យភាពកម្ពុជា។
លោកបានបញ្ជាក់ថា នៅពេលឈ្នះឆ្នោត ថ្នាក់ដឹកនាំរបស់គណបក្ស ដែលត្រូវទទួលតំណែងនានាត្រូវតែប្រកាសទ្រព្យសម្បត្តិរបស់ខ្លួន មុនពេលដែលខ្លួនចូលកាន់តំណែង ហើយក្រោយពេលចប់អាណត្តិ ចប់តំណែងរបស់ខ្លួន ក៏ត្រូវប្រកាសទ្រព្យសម្បត្តិជាថ្មីម្ដងទៀត គឺដើម្បីធ្វើឲ្យប្រជាពលរដ្ឋមានការជឿទុកចិត្ត។ ប៉ុន្តែការប្រកាសនេះគឺមានលក្ខណៈពិសេសជាងអ្វីដែលច្បាប់បានកំណត់កន្លងមក។
លោកបានមានប្រសាសន៍ថា៖ « ការប្រកាសទ្រព្យសម្បត្តិនៅក្នុងច្បាប់សព្វថ្ងៃនេះ គឺត្រូវប្រកាសតែអ្នកដែលបម្រើការងារទេ។ ឧទាហរណ៍ថា ប្រសិនបើយើងជាប្រធាននាយកដ្ឋាន គឺយើងប្រកាសតែប្រធាននាយកដ្ឋានតែប៉ុណ្ណោះ។ ប៉ុន្តែចុះប្រពន្ធ ចុះកូន ចុះចៅទៀត ប្រសិនបើបុគ្គលនោះផ្ទេរទៅឲ្យកូន ឬចៅអស់ទៅ នៅពេលដែលប្រកាសទៅវានៅតែមិនច្បាស់លាស់ដដែល»។
លោក ហូ វ៉ាន់ ក៏បានបន្តថា៖ «ហេតុនេះគឺយើងត្រូវប្រកាសទាំងប្រពន្ធ ទាំងកូន ទាំងចៅ ដើម្បីបញ្ជាក់ថា ទ្រព្យសម្បត្តិយើងគឺមានតែប៉ុណ្ណឹង នោះទើបអាចបញ្ហាញពីតម្លាភាព និងគណនេយ្យភាពពិតប្រាកដបាន»៕
Tag:
លោក ហូ វ៉ាន់
សង្គ្រោះជាតិ
ទ្រព្យសម្បត្តិ
© រក្សាសិទ្ធិដោយ thmeythmey.com