រដ្ឋមន្ត្រីការបរទេសអាស៊ាននិយាយគ្នាស្តីពីជំហរជាមួយចិន អាមេរិក និងរុស្ស៊ី

ជាតិ

រដ្ឋមន្ត្រីការបរទេសអាស៊ាននិយាយគ្នាស្តីពីជំហរជាមួយចិន អាមេរិក និងរុស្ស៊ី

01, Mar 2016 , 11:35 am

រូបភាព

ដោយ: ខន ចំប៉ា

រដ្ឋមន្ត្រីការបរទេសអាស៊ានបានពិភាក្សាគ្នាលើបញ្ហាជាច្រើន នៅក្នុងកិច្ចប្រជុំចង្អៀតថ្នាក់រដ្ឋមន្ត្រីការបរទេសអាស៊ាន ដែលបានរៀបចំរយៈពេល២ថ្ងៃនេះ នៅប្រទេសឡាវ។ បញ្ហាទាំងនោះរួមមាន ការអនុវត្តចក្ខុវិស័យសហគមន៍អាស៊ានឆ្នាំ២០២៥ និងការអនុវត្តផែនការលម្អិតរបស់សហគមន៍សន្តិសុខ និងនយោបាយអាស៊ាន ទំនាក់ទំនងក្រៅតំបន់ បញ្ហាសមុទ្រចិនខាងត្បូង បញ្ហាឧបទ្វីបកូរ៉េ និងបញ្ហាភេវរកម្ម និងក្រុមជ្រុលនិយម(ISIS-IS)។ នេះបើតាមសេចក្តីប្រកាសព័តមានរបស់ក្រសួងការបរទេសកម្ពុជា។

នៅក្នុងកិច្ចប្រជុំចង្អៀតរបស់ខ្លួន រដ្ឋមន្ត្រីការបរទេសអាស៊ាន បានសង្កត់ទៅលើការពង្រឹងតួនាទីស្នូល និងការឯកភាពរបស់អាស៊ាន ក្នុងទំនាក់ទំនងជាមួយប្រទេសមហាអំណាច ពិសេសជាមួយចិន អាមេរិក និងរុស្ស៊ី ដែលកំពុងតែប្រជែងឥទ្ធិពលគ្នាក្នុងតំបន់។ លោក ហោ ណាំហុង រដ្ឋមន្ត្រីការបរទេសកម្ពុជា ដែលមានវត្តមាននៅ ក្នុងកិច្ចប្រជុំដែលបានលើកឡើងថា តួនាទីស្នូលរបស់អាស៊ានគឺសំខាន់ណាស់។ អាស៊ាន ត្រូវបន្តរក្សាជំហររបស់ខ្លួន មិនត្រូវចូលរួមក្នុងយុទ្ធសាស្ត្រសាកលរបស់ប្រទេសមហាអំណាចណាមួយនោះទេ។

នាបច្ចុប្បន្ននេះ អាស៊ានត្រូវបានគេមើលឃើញថា ជាតំបន់ប្រទាញប្រទង់ឥទ្ធិពលរបស់មហាអំណាច ដែលនេះតម្រូវឲ្យអាស៊ានត្រូវប្រកាន់ជំហរកណ្ដាល និងត្រូវពង្រឹងតួនាទីស្នូលឲ្យបានខ្ជាប់ខ្ជួន។ វាពិតណាស់ថា មហាអំណាចទាំងនោះបានឲ្យតម្លៃនិងព្យាយាមអួសទាញសមាជិកអាស៊ានឲ្យងាកទៅរកខ្លួន ដើម្បីពង្រីកឥទ្ធពលមកក្នុងតំបន់។

សម្រាប់បញ្ហាសមុទ្រចិនខាងត្បូងវិញ ដើម្បីរក្សាសន្តិភាព ស្ថិរភាព និងសន្តិសុខ នៅក្នុងតំបន់ រដ្ឋមន្ត្រីការបរទេសអាស៊ានបាន ជំរុញឲ្យភាគីពាក់ព័ន្ធអនុវត្តន៍ឲ្យមានប្រសិទ្ធភាព និងពេញលេញ នូវសេចក្តីថ្លែងការណ៍ការប្រតិបត្តិរបស់ភាគីពាក់ព័ន្ធនៅសមុទ្រចិនខាងត្បូង(DOC)។ ជាមួយគ្នានោះ រដ្ឋមន្ត្រីការបរទេសអាស៊ានក៏ជំរុញការពិគ្រោះយោបល់ស្តីពីក្រមប្រតិបត្តិនៅសមុទ្រចិនខាងត្បូង(COC) ដើម្បីឈានទៅសម្រេចបានក្រមប្រតិបត្តិនេះឲ្យបានឆាប់។

ក្រៅពីនោះ បើតាមសេចក្តីប្រកាសព័ត៌មានដដែល រដ្ឋមន្ត្រីការបរទេសអាស៊ាន ក៏បានគូសបញ្ជាក់ពីសេរីភាពនៃការធ្វើវានាចរណ៍នៅក្នុងការហោះហើរលើសមុទ្រខាងត្បូងដែរ។ រដ្ឋមន្ត្រីការបរទេសអាស៊ានក៏ឯកភាពឲ្យមានជំនួបរវាងរដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសចិននៅពេលខាងមុខ ដើម្បីពិភាក្សាពីទំនាក់ទំនងអាស៊ាន-ចិន រួមទាងបញ្ហាសមុទ្រចិនខាងត្បូង ជាពិសេសរិះរកវិធានការសមស្រប ដើម្បីបន្ថយភាពតានតឹង និងដោះស្រាយជម្លោះនៅសមុទ្រចិនខាងត្បូង។

បញ្ហាតំបន់ និងអន្តរជាតិផ្សេងទៀត ពិសេសបញ្ហាភេរវកម្ម និងក្រុមជ្រុលនិយម(ISIS-IS) ក៏ជាក្តីកង្វល់របស់អាស៊ាន ហើយត្រូវបានរដ្ឋមន្ត្រីការបរទេសអាស៊ានលើកពិភាក្សា និងស្វែងរកវិធានការផ្សេងៗ ដើម្បីប្រយុទ្ធប្រឆាំង និងទប់ស្កាត់ការរីករាលដាលនៃបញ្ហាទាំងនេះមកក្នុងតំបន់។ រដ្ឋមន្ត្រីការបរទេសកម្ពុជាបានស្នើ អាស៊ានគួរពង្រឹងការអនុវត្តច្បាប់ ការផ្លាស់ប្តូរពត៌មានសម្ងាត់ និងការគ្រប់គ្រងព្រំដែន តាមរយៈការអនុវត្តផែនការការងារអាស៊ាន ស្តីពីការប្រយុទ្ធប្រឆាំងនឹងអំពើភវរកម្ម (២០១៦-២០១៨) អោយមានប្រសិទ្ធភាព ដើម្បីប្រយុទ្ធប្រឆាំងនឹងភេវរកម្ម និងក្រុមជ្រុលនិយមទាំងនោះ៕