កីឡាប៉េតង់កម្ពុជា បង្កើតការប្រកួតក្របខណ្ឌសិស្ស ដើម្បីត្រៀមស៊ីហ្គេម

កីឡាជាតិ

ជាតិ

កីឡាប៉េតង់កម្ពុជា បង្កើតការប្រកួតក្របខណ្ឌសិស្ស ដើម្បីត្រៀមស៊ីហ្គេម

01, Mar 2016 , 8:39 pm

រូបភាព

ដោយ:

លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានសហព័ន្ធកីឡាប៊ូល និងប៉េតង់កម្ពុជា នាពីធីបិទការប្រកួតកីឡាប៉េតង់ដណ្តើម«ពានរង្វាន់ឧបនាយករដ្ឋមន្ត្រី សុខ អាន លើកទី៦ ឆ្នាំ២០១៦» បានមានប្រសាសន៍ថា នៅក្នុងឆ្នាំ២០១៦ នេះ សហព័ន្ធប៊ូល និងប៉េតង់កម្ពុជា នឹងបង្កើតឲ្យមានការប្រកួតពានរង្វាន់ក្របខ័ណ្ឌសិស្សអាយុក្រោម១៧ឆ្នាំ ដើម្បីជ្រើសកីឡាករថ្នាលសម្រាប់ត្រៀមខ្លួនធ្វើជាម្ចាស់ផ្ទះការប្រកួត SEA Games លើកទី៣២ ឆ្នាំ២០២៣។

សហព័ន្ធកីឡាប៊ូល និងប៉េតង់កម្ពុជា ក្រោមការសហការជាមួយក្រសួងអប់រំ យុវជន និងកីឡា នៅក្នុងឆ្នាំ២០១៦ នេះ នឹងបង្កើតឲ្យមានការប្រកួតដណ្តើមពានរង្វាន់ក្របខ័ណ្ឌសិស្សអាយុក្រោម១៧ឆ្នាំ តាមបណ្តាអនុវិទ្យាល័យ និងវិទ្យាល័យទូទាំងរាជធានី ខេត្ត ក្នុងប្រទេសកម្ពុជា ដើម្បីជ្រើសរើសកីឡាករកីឡាការិនីថ្នាលសម្រាប់ហ្វឹកហាត់ត្រៀមចូលរួមការប្រកួត SEA Games លើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

លោកឧបនាយករដ្ឋមន្ត្រី សុខ អាន មានប្រសាសន៍ថា៖«ចាប់ពីឆ្នាំ២០១៦នេះទៅ ក្រសួងអប់រំ យុវជន និងកីឡា នឹងរៀបចំឱ្យមានការប្រកួតកីឡាប៉េតង់ក្របខ័ណ្ឌសិស្ស ដើម្បីជ្រើសរើសយុវកីឡាករ កីឡាការិនី ដែលមានអាយុក្រោម១៧ឆ្នាំ សម្រាប់ហ្វឹកហាត់ត្រៀមចូលរួមក្នុងការប្រកួតកីឡា SEA Games នៅឆ្នាំ២០២៣ ដែលកម្ពុជាយើងនឹងធ្វើជាម្ចាស់ផ្ទះ»។

ប្រធានសហព័ន្ធប៉េតង់រូបនេះបានបន្ថែមថា ដើម្បីឱ្យការធ្វើម្ចាស់ផ្ទះរៀបចំព្រឹត្តិការណ៍ប្រកួតកីឡា SEA Games នៅឆ្នាំ២០២៣ ទទួលបានលទ្ធផលល្អប្រសើរ កម្ពុជាយើងត្រូវបង្កើនកិច្ចខិតខំប្រឹងប្រែងបន្ថែមទៀត ដោយត្រូវមានផែនការ និងយុទ្ធសាស្ត្រឲ្យបានច្បាស់លាស់ និងត្រូវមានកិច្ចសហប្រតិបត្តិការកាន់តែជិតស្និទ្ធរវាងក្រសួង ស្ថាប័នពាក់ព័ន្ធ ជាពិសេសគណៈកម្មាធិការជាតិអូឡាំពិកកម្ពុជា ក្រសួងអប់រំ យុវជន និងកីឡា ព្រមទាំងសហព័ន្ធកីឡាទាំងអស់។

ទន្ទឹមនឹងនេះ ដើម្បីជ្រើសរើសកីឡាករកីឡាការិនីដែលមានសមត្ថភាព និងទេពកោសល្យ សម្រាប់ចូលរួមប្រកួតក្នុងព្រឹត្តិការណ៍ជាតិ និងអន្តរជាតិ និងដើម្បីទទួលបានមេដាយពីព្រឹត្តិការណ៍ទាំងនេះទាមទារឲ្យ យើងធ្វើការសម្រិតសម្រាំងយ៉ាងខ្ពស់បំផុត ដោយឆ្លងកាត់ការប្រកួតជម្រុះដោយផ្អែកលើគុណភាពជាចម្បង។ កីឡាករកីឡាការិនីត្រូវគោរពវិន័យ និងក្រឹត្យក្រមកីឡា មានស្មារតីរឹងមាំប្រកបដោយភាពជឿជាក់ និងថែទាំសុខភាពឱ្យបានល្អ ខិតខំហ្វឹកហាត់បង្កើនសមត្ថភាពជាប្រចាំ ជាពិសេសបង្កើតឲ្យមានការប្រកួតផ្លាស់ប្ដូរបច្ចេកទេស និងដណ្ដើមពានរង្វាន់ ថ្នាក់ជាតិផ្សេងៗ។

ពាក់ព័ន្ធទៅនឹងគោលបំណងនៃការបង្កើតឲ្យមានការប្រកួតពានរង្វាន់ក្របខ័ណ្ឌសិស្សអាយុក្រោម១៧ នេះ លោកឧបនាយករដ្ឋមន្ត្រី សុខ អាន បានពន្យល់ថា ព្រោះសាលារៀនជាប្រភពថ្នាលមួយដ៏សំខាន់ ដែលពោរពេញទៅដោយអ្នកមានទេពកោសល្យល្អៗជាច្រើន និងដើម្បីឲ្យយុវសិស្សទាំងអស់បានបញ្ចេញសមត្ថភាពធម្មជាតិរបស់ខ្លួន។ ម្យ៉ាងទៀត វាជាវិធីសាស្ត្រដ៏ល្អក្នុងការចម្រាញ់រកអ្នកដែលមានទេពកោសល្យ ព្រោះការប្រកួតនេះយើងធ្វើការជម្រុះតាំងពីថ្នាក់អនុវិទ្យាល័យ រហូតដល់ថ្នាក់វិទ្យាល័យ។

លោកបានបញ្ជាក់ថា៖«ការប្រកួតក្របខ័ណ្ឌសិស្សវាជាប្រភពមួយដ៏សំខាន់ ព្រោះកីឡាតាមសាលានេះជាថ្នាលធំណាស់ សម្រាប់យើងជ្រើសរើសយកអ្នកដែលមានទេពកោសល្យ យើងទាល់តែមានថ្នាលទើបអាចជ្រើសរើសអ្នកដែលមានទេពកោសល្យ អ្វីដែលសំខាន់យើងទាល់តែមានលទ្ធផលចេញពីសាលាតាំងពីថ្នាក់ក្រោមរហូតដល់ថ្នាក់លើ ទើបអាចរកឃើញអ្នកដែលមានទេពកោសល្យ»។

គួរបញ្ជាក់ផងដែរថា កីឡាប៉េតង់អាស៊ីមានសមាជិកទាំងអស់ចំនួន២១ប្រទេស ប៉ុន្តែប្រទេសដែលសកម្ម និងមានធនធានប្រហែលជា១៤ ទៅ ១៥ប៉ុណ្ណោះ ក្រៅពីនេះកំពុងតែធ្វើការហ្វឹកហាត់ ដើម្បីពង្រឹងធនធាននៅឡើយទេ។ សមាគមប៉េតង់ពិភពលោក បាននឹងកំពុងរៀបចំដាក់បញ្ចូលកីឡាប៉េតង់នៅក្នុងអូឡាំពិកហ្គេម នាឆ្នាំ២០២៤ ខាងមុខ។

សម្រាប់ការប្រកួតកីឡាប៉េតង់ដណ្តើម«ពានរង្វាន់ឧបនាយករដ្ឋមន្ត្រី សុខ អាន លើកទី៦ឆ្នាំ២០១៦» ដែលមានក្លិប-សមាគមចូលរួមជាង២០ និងមានកីឡាករកីឡាការិនីជិត៣០០នាក់ ដែលចាប់ផ្តើមប្រកួតតាំងពីថ្ងៃទី២៦ ដល់ថ្ងៃទី២៨ ខែកុម្ភៈ បានបញ្ចប់ហើយកាលពីម្សិលមិញ។ ក្នុងនោះពានសមាគម៣នាក់ទល់នឹង៣នាក់ ចំណាត់ថ្នាក់មេដាយមាសបានទៅលើក្រុមគីរីវង្ស ខណៈមេដាយប្រាក់បានទៅក្រុមរដ្ឋាករស្វយ័តភ្នំពេញ ចំណែកមេដាយសំរឹទ្ធបានទៅ ក្រុមយោធភូមិភាគពិសេស។ ចំណែកវិញ្ញាសា ៣នាក់ទល់៣នាក់ ផ្នែកវ័យចាស់ ម្ចាស់ជើងឯកមេដាយមាសបានទៅក្រុមទីស្តីការគណៈរដ្ឋមន្ត្រី II ខណៈមេដាយប្រាក់បានទៅក្រុមនាគព័ន្ធ ឬឯមេដាយសំរឹទ្ធបានទៅក្រុមឃោសនាព័ន្ធមាន។

វិញ្ញាសាវាយយកពិន្ទុផ្នែកយុវនារី(អាយុក្រោម១៧ឆ្នាំ) ម្ចាស់មេដាយមាសបានទៅកីឡាការិនី ស្រ៊ាង សុរ៉ាឃីម របស់ទីស្តីការគណៈរដ្ឋមន្ត្រី ខណៈកីឡាការិនី ហៀង វិជ្ជនី របស់ក្រសួងមហាផ្ទៃ ទទួលបានមេដាយប្រាក់ ចំណែកមេដាយសំរឹទ្ធ ធ្លាក់ទៅលើកីឡាការិនី ពៅ ច័ន្ទសុភក្ត្រា មកពីសាលាអន្តរជាតិវេស្ទលែនដ៍។ ចំណែកវិញ្ញាសាវាយយកពិន្ទុផ្នែកយុវជនមា្ចស់មេដាយមាសបានទៅកីឡាករ ភាព រ៉ាឃីម មកពីមន្ទីរ អ.យ.ក ខេត្តកណ្តាល ខណៈមេដាយប្រាក់បានទៅកីឡាករ មួង ទិតម៉ាណែត មកពីទីស្តីការគណៈរដ្ឋមន្ត្រី ចំណែកមេដាយសំរឹទ្ធបានទៅកីឡាករ ស៊ុម លីវិសាល មកពីអ.យ.ក ខេត្តស្វាយរៀង។

វិញ្ញាសា១ទល់១ ផ្នែកយុវនារី ចំណាត់ថ្នាក់មេដាយមាសបាន ពៅ ច័ន្ទសុភក្ត្រា ខណៈមេដាយប្រាក់បានទៅ អ៊ុំ ពុតទីយ៉ា ចំណែកមេដាយសំរឹទ្ធបានទៅ ហេង ច័ន្ទសុគន្ធា។ វិញ្ញសា ១ទល់១ ផ្នែកយុវជន មេដាយមាសបានទៅ ហេង ស៊ីណា ខណៈមេដាយប្រាក់បានទៅ ភាព រ៉ាឃីម ឬឯ មេដាយសំរឹទ្ធបានទៅ ស៊ីវ សុផានីត្រា។ វិញ្ញាសា៣ទល់៣ ចម្រុះផ្នែកយុវជន និងយុវនារី ចំណាត់ថ្នាក់មេដាយមាសបានទៅក្រុមក្រសួងមហាផ្ទៃ ខណៈមេដាយប្រាក់បានទៅលើក្រុមយោធភូមិភាគពិសេស ចំណែកមេដាយសំរឹទ្ធបានទៅក្រុមអគ្គភស្តុភាហិរញ្ញវត្ថុ កពជ។

វិញ្ញាសា៣ទល់៣ផ្នែកនារី ម្ចាស់មេដាយមាសបានទៅលើក្រុម អគ្គស្នងការនគរបាលជាតិ ខណៈមេដាយប្រាក់បានទៅក្រុមក្រសួងការពារជាតិ ឬឯមេដាយសំរឹទ្ធបានទៅក្រុមទីស្តីការគណៈរដ្ឋមន្ត្រី។ វិញ្ញាសាផ្នែកបុរសពានធំ ម្ចាស់មេដាយមាសបានទៅក្រុមអគ្គស្នងការនគរបាលជាតិ ខណៈមេដាយប្រាក់ បានទៅក្រុមនគររាជ ចំណែកមេដាយសំរឹទ្ធ ក្រុមអគ្គភស្តុភារហិរញ្ញវត្ថុក្រសួងការពារជាតិ៕