ពីនេះ ពីនោះ
នយោបាយរបស់យុវជន មិនអាចកើតចេញពីយុវជនដែលខ្សោយទេ
× ភ្នំពេញ៖ ទោះបីគេនិយាយថា ជាអ្នកនយោបាយគេចមិនផុតពីរត់ចោលស្រុក ជាប់គុក ឬស្លាប់ខ្លួន វាមិនមែនជាពាក្យដែលរារាំងឆន្ទៈរបស់កូនខ្មែរមិនឲ្យគិតពីនយោបាយទេ ប៉ុន្តែជារឿងដែលកូនខ្មែរត្រូវដឹង និងមានភាពងាយស្រួលក្នុងការរៀបចំខ្លួនទទួលយកកិច្ចការមួយនេះ ។ ព្រោះកិច្ចការទាំងនេះគឺជាបន្ទុកដ៏ធំដើម្បីក្លាយទៅជាអ្នកធានាចំពោះមុខប្រជាពលរដ្ឋទូទាំងប្រទេស។
ពាក្យថាស្នេហាជាតិជាពាក្យដែលគេតែងតែឮចេញពីមាត់យុវជនសម័យថ្មីនេះស្ទើរគ្រប់គ្នា តែពាក្យបីម៉ាត់នេះ វាមិនងាយស្រួលនៅក្នុងការប្រតិបត្តិនោះឡើយ។ បើសិនជាយុវជនខ្មែរបានតាំងចិត្តច្បាស់លាស់ថា ចង់យល់ ចង់ដឹង ពីនយោបាយហើយ គឺត្រូវតែមានការចេះដឹងឲ្យបានច្រើន ព្រមទាំងស្គាល់ចិត្តគំនិតមនុស្ស និងសង្គមឲ្យបានច្រើន។ កិច្ចការនយោបាយគឺជាកិច្ចការរួម ដូច្នេះសិល្បៈបច្ចេកទេសទំនាក់ទំនងប្រមូលគ្នា និងថែរក្សាចំណងសាមគ្គីឲ្យបានល្អ នោះគឺជាការចាំបាច់។
ហេតុនេះ យុវជនខ្មែរ ទាមទារឲ្យមានការសិក្សាឲ្យបានខ្ពស់ មានពុទ្ធិទូលំទូលាយ ទាំងផ្នែកចំណេះដឹងបែបទ្រឹស្ដី និង ចំណេះដឹងផ្នែកអនុវត្តន៍ជាក់ស្ដែង។ ត្រូវចេះស្វែងយល់ពីទ្រឹស្ដីដែលបានសិក្សានៅសាលា រៀនពីសៀវភៅ ស្ដាប់រៀមច្បងដែលគេមានពិសោធមុន និងចូលប្រឡូកក្នុងវិស័យនេះដោយផ្ទាល់ប្រកបដោយភាពឆ្លាតវៃ ដើម្បីក្លាយខ្លួនជាសរសរទ្រូងជាតិពិតប្រាកដ។ មិនមែនជាមនុស្សដែលវិលវល់តាមតែការបង្គាប់បញ្ជារបស់អ្នកនយោបាយចាស់ឡើយ។
ត្រូវលុបបំបាត់ទស្សនៈមើលងាយអ្នកដទៃ មើលងាយអ្នកដឹកនាំចាស់ៗ មើលងាយប្រជាពលរដ្ឋខ្លួនឯង តែត្រូវមើលសមត្ថភាព របស់ខ្លួនវិញទើបជាការប្រសើរ។ ថ្វីត្បិតថា បច្ចុប្បន្ននេះមានមន្ត្រីមួយចំនួនគាត់មានវ័យចំណាស់ កម្លាំងកាយ និងប្រាជ្ញាដើរមិនទាន់បរិបទសង្គមទំនើបក៏ពិតមែន តែបើនិយាយពីសមត្ថភាព និងបទពិសោធន៍ជីវិត គឺពួកគាត់បានដឹងយ៉ាងច្បាស់។ យុវជនគួរណាស់តែនាំគ្នា ទៅឲ្យជិតបុគ្គលទាំងនោះ សិក្សារៀនសូត្រពីគាត់ សុំយោបល់ពីគាត់ រួចហើយនាំគ្នាកែច្នៃអ្វីដែលចាស់ឲ្យទៅគំនិតថ្មី ប្រើប្រាស់ក្នុងបរិបទថ្មី។ ចំណែកក្នុងនាមជាយុវជន ក៏មិនត្រូវតាំងខ្លួនឯងជាមនុស្សអស្ចារ្យ ចេះតែឯង ដឹងតែឯង យល់តែឯងនោះដែរ។ តែត្រូវមានជំហរត្រឹមត្រូវ យុត្តិធម៌ សច្ចភាព សុច្ចរិតភាព ចំពោះជាតិ ចំពោះប្រជាជនខ្លួនឯង និងមានសីលធម៌នៃការគោរពនៅក្នុងចិត្តជានិច្ច។ នេះទើបសបញ្ជាក់យ៉ាងច្បាស់នូវទឹកចិត្តដ៏មុះមុត ចេះឈឺច្អាលក្នុងបញ្ហាសង្គមជាតិពិត។
ម្យ៉ាងវិញទៀត ជម្លោះរវាងជាតិឯងវាមិនដែលចំណេញដល់ជាតិម្ដងណាឡើយ។ យុវជនត្រូវ យល់ឲ្យច្បាស់ថា អន្តរជាតិដែលនៅជុំវិញសព្វថ្ងៃ គេប្រាកដជាមិនឆោទល្ងង់ជាងខ្មែរឡើយ។ គេដឹងអំពីស្ថានភាពប្រទេសខ្មែរស្ទើតែទាំងអស់ ព្រមទាំងបញ្ហាគ្រប់យ៉ាងទៀតផង គេចាំមើលតែខ្មែរទេ ថាចេះការពារស្រុកទេសខ្លួនឯងដោយវិធីណា? ឬមួយ ពីរមួយថ្ងៃ ទៅមួយថ្ងៃគិតតែពីនាំគ្នារករឿង ចាប់កំហុសគ្នា ដើម្បីវាយបំបាក់ខ្មែរនិងខ្មែរគ្នាឯង៕
© រក្សាសិទ្ធិដោយ thmeythmey.com